2 ¹ O koya ko ya mo ni qai dainia tani kece kinia na veika ca; me sa kua na lasulasu se na veivakaisini, se na veivuvutaki, se na vosa ni veivakacacani. ² Mo ni vakataki ira na gone era se qai sucu, ni ra sa dau karamacatakia wasoma na wai ni sucu vakayalo ka savasava, mo ni tubu cake kinia ka vakabulai ni sa somicia. ³ Me vaka sa kaya na i Vola Tabu, “O ni sa tovolea oti na yalovinaka ni Turaga.” ⁴ Ni qai mai vua na Turaga, o koya na vatu bula era a catia na tamata, ia sa digitaki koya lia na Kalou ka dokai koya vakalevu. ⁵ Ni qai mai me vaka o ni sa vatu bula sa vakayagataki ena kena tara na valenisoro vakayalo, ka qaravia kinia na vakacaboisoro vakayalo sa vinaka vua na Kalou ena vuku i Jisu Karisito, me vaka o ni sa kena matabete yalosavasava. ⁶ Ni sa tukunia na i Vola Tabu, “Raicia, au sa digitakia e dua na vatu talei, ka'u sa vaduria me i vakadei ena tutu ni vale mai Saioni; Ia o koya sa vabauti koya ena yali sara ni vamaduataki.” ⁷ Sa talei sara na vatu koya vei ikonui sa vabauta, ia vei ira era yali ni vabautia: “Na vatu era a catia na dau tara vale, Sa yaco me i vakadei ni tutu ni vale.” ⁸ kei Na vatu era sa tarabe kina, kei na vatu era sa bale kina; ni ra sa tarabe e na vosa, ni ra sa talaidredre: era sa lesi voki lia me ra vakakinia. ⁹ Ia sai ikonu na kawa tamata digitaki, na matabete vakatui, na matanitu yalosavasava, na mata tamata sa taukenia na Kalou, mo ni varaitakia kinia na veika cecere sa vayacoria o koya sa kacivi ikonu mai na butobuto ki na nona rarama veivakurabuitaki. ¹⁰ E na dua na gauna, o ni a yali tu kinia na nona tamata na Kalou, ia o ni sa qai nona tamata koya; ena dua na gauna, o ni a yali tu kinia ni kila na yalo veivosoti ni Kalou, ia o ni sa qai ciqomia koya na nona yaloveivosoti. ¹¹ Oi ikodou sa lomani, au sa vamasuti ikodou, ni dou sa vakataki ira na vulagi kei ira era dau veiqaiyaki, mo dou tarovi ikodou mai na gagadre ca ni yago, sa veivala kei na yalo; ¹² me dodonu na nomudou i valavala e na kedra maliwa era sa yali ni lotu: me ka oqori era varokorokotakia kinia na Kalou e na siga ni veiqaivi, e na vuku ni valavala vinaka era na raicia, ko ira era sa dauvosavakacacataki ikodou me vaka ni dou sa tamata caka ca. ¹³ Ni varorogo ki na veiliutaki vakatamata kece lia ena vuku ni Turaga: ki vua na tui, o koya na ulu ni veiliutaki, ¹⁴ se kivei ira na kovana, o ira sa talai mai vua na tui me ra totogitaki ira era caka cala ka vakacaucautaki ira era caka dodonu. ¹⁵ Ni sa vinakatia na Kalou mo ni vagalui ira na tamata yalowai mai na nodra veitalanoa lialia ena veika vinaka o ni vayacoria. ¹⁶ Ni bula tiko me vaka na tamata sa sereki, ia me kakua ga ni vayagataki na nomuni galala me i ubi ni nomuni caka ca; ia mo ni bula tiko lia me vaka na tamata bobula ni Kalou. ¹⁷ Doka na tamata kece lia. Lomani ira era sa nei Karisito. Rerevaka na Kalou. Varokorokotakia na tui. ¹⁸ Oi ikonu na dauveiqaravi, e dodonu mo ni dau varorogo vei ira na nomuni turaga ena yalo e veidokai; me kua wale lia ni vayacori vei ira sa yalovinaka ka yalomalua, ia vei ira voki lia sai tovo kaukauwa. ¹⁹ Ena vakalougatataki ikonu na Kalou ena vuku ni ka koya kevaka o ni sa vosotia rawa na veika rarawa sa caka vatawadodonu vei ikonu, baletia ni o ni sa yalodina tiko ki na loma ni Kalou. ²⁰ Se o ni na vavinavinakataki li vaevei kevaka o ni sa vosotia na nomuni motulaki ena vuku ni nomuni cala? Ia kevaka o ni sa vosotia na vararawataki ni o ni sa caka dodonu, ena vakalougatataki ikonu kinia na Kalou. ²¹ Ni sai koya na ka koya sa kacivi ikonu kinia na Kalou, baletia ni sa vakararawataki na Karisito ena vukumuni, ka sa dainia tu vei ikonu na kena i dusidusi, mo ni muria na we ni yavana. ²² A sa yali lia ni caka e dua na i valavala ca o koya, ka sa yali voki lia ni kune e gusuna na veivakaisini. ²³ Ni sa vasewasewani, a sa yali voki ni veivasewasewani lesu; ni sa vararawataki, sa yali ni yalatakia me na sauma lesu; ia sa nuitakia lia na Kalou, o koya na daunilewa yalosavasava. ²⁴ A sa colatia vakai koya o Karisito na noda i valavala ca ki na kauveilatai ena yagona, me rawa kinia me da mate ki na i valavala ca ka bula ki na i valavala dodonu. Ia na we ni kena kuita o ni sa vabulai kinia. ²⁵ O ni a vataki ira tu na sipi sa lako sese, ia koya o ni sa qai saumaki voki mai ka muri koya na i Vakatawa ka Dauveimaroroi ni yalomuni.