5 ¹ Au sa vamamasu vakoya vei ira na qase ni lotu ena ikonu maliwa me vaka e dua sa qase ni lotu voki lia ka sa vadinadinatakia oti na sotavi ni veivararawataki i Karisito, ka'u na vakaivotavota voki lia ena veika lagilagi sa varau vatakilai: ² Mo ni vakania na qele ni sipi ni Kalou era sa tiko ena ikonu maliwa; me kakua ni ka ni veivasaurarataki, ia me caka lia ena yalo makutu me vaka sa vinakatia vei ikonu na Kalou; me kakua ni ka ni vaqaqara i sau lia, ia ena yalo lia e taleitakia me veiqaravi. ³ Ni kakua ni valavala vaboso vei ira o ni sa qaravia, ia mo ni dau i varaitaki vinaka lia vei ira na qele ni sipi. ⁴ Ia ni sa rairai mai o koya na i Vakatawa Liu, o ni na rawatia kinia na i sala lagilagi sa yali ni takali rawa na kena i serau. ⁵ Oi ikonu na i tabagone, mo ni vamalumalumutaki ikonu vakinia vei ira era qase cake vei ikonu. Sa dodonu kinia vei ikonu vayadua mo ni vakaisulutaki ena yalomalumalumu ena vuku ni nomuni veiqaravi vakai ikonu, ni sa volai, “Sa vorati ira sa viavialevu na Kalou, ia sa lomani ira lia sa yalomalumalumu.” ⁶ Ni vayalomalumalumutaki ikonu kinia ena ruku ni liga kaukauwa ni Kalou, ni na vacerecerei ikonu o koya ena nona gauna taudonu. ⁷ Ni dainia vua na nomuni lomaocaoca kece lia, ni sa daunanumi ikonu o koya. ⁸ Ni yalomatua, ni yadra tiko! Sa veiqaiyaki voli na nomuni meca na tevoro, me vaka na laione sa tagi ni sa vasaqara eso me tilomia. ⁹ Mo ni tudei sara ena nomuni vabauta ka vorati koya, ni o ni sa kila ni sa yaco voki tiko lia na veivararawataki vakoya vei ira na wekamuni e vuravura taucoko. ¹⁰ Ia ni sa oti na nomuni vararawataki, na Kalou ka sa sinai ena lolomasavu, o koya ka kacivi ikonu mo ni vakaivotavota ena nona lagilagi yali ni mudu ena vuku i Karisito, ena qai vayacori ikonu mo ni vinaka sara ka solia na yalodei, kaukauwa, kei na yavu dei. ¹¹ 11Me nona na lewa ena gauna kece lia ka yali ni mudu! Emeni. ¹² Au sa vola yani na i vola lekaleka koya ena veivuke i Silivenusi, o koya ka'u sa okatia me noda i tokani Vakarisito sa yalodina. Au gadrevia me'u vayaloqaqataki ikonu ka'u sa vadinadinatakia ni sai koya koya na lolomasavu dina ni Kalou. Ni tudei tiko lia kinia. ¹³ Era sa loloma yani vei ikonu na i soqosoqo lotu e Papiloni, o ira sa digitakia voki lia mai vua na Kalou me vataki ikonu, ka vaka voki lia kinia na luvequ o Marika. ¹⁴ Ni veikidavaki vakai ikonu ena i regu ni veilomani Vakarisito. Me qai tiko yadudua vei ikonu kece sara sa nei Karisito na vacegu. Emeni.