¹ Josias pe jjainaenüta pakujinae tajjujjuba pe itorobi jawa reinü kuenia; bajara ponü itoroba treinta y dos (32) pa wai beje Jerusalen jota. ² Pejjania kuene itsi Diosonü itajjutua, ponapona piaja monaenümi David pa namutua ponapona, jume jjania jai tane Dioso jjua itoroba. ³ Tsipaji ocho (8) pa wai beje pe itorobinukae kujinae reinü kuenia, abajjü pewüjüatota, jaita piaja Dioso David, piaja monaenümi. Doce (12) pa wai beje kujinae, bajara ponü tajjujjuaba pe ajibia ejjanae jawa Juda y Jerusalen jota atjübüyo pa tajjunaenü, Asera jumepe naenü, naejawanüta pejumepe rubi jawa yajawa jieru jawata pe jumepe itsi tsanubi. ⁴ Tomara piajiwi bijiana Baalewi rajutabiaba pa ibojumanüta pitabü nejewa; bajara ponü epa ukubabeyeta tsajota petujjudere ekae jawa to tajuita pe bokae jawa ajara pamonae mujjuneneta. Tsikababa Asera pe jumepe pa naejawanüta rubena, yajawa jieru jawanüta pe pürü pe naejjanae jawaabelia. Bajara ponü pe pürü tsimata kayajata pa mütjüanü pamonae to bia pe rajutsi nejja. ⁵ Bajara ponü to tajuita piaja sacerdotewi pesitonü piaja ibojumanü jota. Pakueniaje, bajara ponü ajibia ejjana pebisia jawanü Juda yajawa Jerusalen jota. ⁶ Bajara ponü itsi bajara pakuenia piaja tomaranü jota Manases, Efrain yajawa Simeon, Neftali jawabereka ata, pijinia tsajjuayo abeje tsanubenae. ⁷ Bajara ponü bijiana ibojumanü, tsikababa Asera nae jawanü pejumepianü pe rubenae jawa pürübabia, ajibia ejjana dajjita pe tujjudere ekae jawa pe tajuitabiabi jota dajjita Israel piaja nakuanü jawa; nejjata nawalia Jerusalen jawabelia. ⁸ Aekonojjae, Dieciocho (18) pa wai beje pe itorobinü reinü kuenia, pe jjanewaitsi kujinae Josias pa nakuaje yajawa Dioso piaja bo, bajara ponü itorobalia Safan pejjünato Azalia, yajawa Maasias, pe matakanukaenü tomara, Joa, pejjünato Joacaz dajjita jawanü pe yawenonaenü, pe yajjanebi nejja Diosonü piaja bo piaja Dioso. ⁹ Pamonaeje tae otjopalia Hilcias, pe matakaponaenü sacerdotewi, tsikobe ruta palata Dioso piaja bo jawabelia pe kaponae jawa, jjua Lewitawi, baupa ewetsiwi, kaetuata Manases, Efrain, dajjita penakopatsita Israel jota, Juda yajawa Benjamin, y pe jinawanapaewi Jerusalen jawata. ¹⁰ Pamonaeje tsikobe ruta palata pamonae pe nakuenebiwi naitajjuto kaeweta Diosonü piaja bo jota. Bajara pa jiwi matamota pe nakuenebiwi pamonae yajjaneba pe kowü kuenia Dioso piaja bo. ¹¹ Pamonae matamota nae jawanüta pe nakuenebiwi yajawa bo nakuenebiwi pe komuakae nejja pe kajjiukae ibotonü yajawa naejawanü pe kayaübi nejja, pe nobi nejja ibo nasiturutonü jjua itsa reyewi Juda piajiwi tsabanae ejjana. ¹² Pebi jiwi nakueneba pe itorobi kueniatsi. pe taenü beje pe nakuenebi jawa Jahat, Abdias, Lewitawi, Merari moane pejji; Zacarias yajawa Mesulam, Coat monae pejji. Itsa Lewitawi yajawa, dajjita pamonae pe yawaji jjaniwaitsiwi, barü nakueneba. ¹³ Pa Lewitawije tae wanapa jjuanü na jota pe nakuenebi jawa nejja pijinia dajjita pa pebi jiwi na nakueneba wanapa. Pijinia itsa Lewitawi pe ya yakina ponaewi, pe yakinaewi jjua kapata o juta yajawa baupa ewetsiwi. ¹⁴ Pakujinae pamonae kaponarena palata pe kaponae jawalia Diosonü piaja bo jawabelia, Hilcias sacerdotenü kajjitaraba Diosonü pe jumeliwaisi bajjuto jjua to kanawiatatsi Moises jawabelia. ¹⁵ Hilcias jumaitsi Safan peya yakinaenü: "kajjitajarabajü pa bajjuto nakato najume pueneta Diosonü piaja bo jota". Hilcias to ka rena ajara pa bajjuto Safan jawaberana. ¹⁶ Safan ajara pa bajjuto reinü jawabelia to kalia, pijinia tsipaeba dajjita, jumaitsi: "Nija pianiwi dajjita kuene nakueneba jjua na itoroba ajara pamonae jawabelia. ¹⁷ Pamonae baja kaetuata palata Diosonü piaja bo jota, to kanawiata pe naitajjuto kaewetsiwi pe barünakueneba wanapaewi." ¹⁸ Safan pe yakinaenü reinü jawabelia jumaitsi: "Hilcias sacerdotenü neto kanawiata pe bajjuto." Nejjata Safan tsimujju leba reinü jawabelia. ¹⁹ Pakujinaeta reinü jumetae wereta pa liwaisi pe itorobi jawatsi, penajjatatanukae jawa titinajjuaba. ²⁰ Reinü itoroba Hilcias jawabelia, Ahikam pejjünato Safan, Abdon, pejjünato Micaias, Safan peyakinaenü y Asaias, piaja pianinü, jumaitsije: ²¹ "Paponaremelia pa neto yanijobianame jjua Dioso jutsipa ta itsi jawa, pijinia pamonae nakopaba Israel yajawa Juda jota, pa liwaisi yabara pa bajjutota pitabuapa. Tsipaji ayai jamatabü kuene anaeya Diosonü naka tsijjuaba. Ayai kuene, tsipaji wajamonaewimi apo jumetae pa liwaisi rubena pa bajjutotaje pe jumekowünütsi nejja dajjita pe yakinarubi jawa ajara jota." ²² Nejjata, Hilcias yajawa pamonae pikani reinü itoroba, tae otjopalia Hulda Dioso jume liwaisi paebiwa, Salum pe barüponaponaewa Pejjünato Tikba pejjünato Harhas, penajjatabi jawa pe jjaniawaetsinü (Pe ponaponaewa Jerusalen jota pe tajjuabi jawa tomara kujinaereka) pamonae barükuikuijai bajara powa jawabelia jjua yabaraje. ²³ Powaje jumaitsi: "JJua ra maje Diosonü, Israel piaja Dioso, jumaitsi: Jumaitsi müre pa jiwitonü jjanü jawaberena paka itorobarena, ²⁴ JJua ra maje Diosonü jumaitsi: 'Taema, jjanü ra baja ü tatsijjuabi nejja pa nakuaje yajawa pe jinawanapaewi ajara jota, dajjita pebisia kuene jawanü jjuanü yakinaruba pa bajjutota pamonaeje leba Juda piaja reinü itabü nejewa. ²⁵ Tsipaji pamonaeje ne nakofünüta to tajuita pe tujjudere ekae naenü itsa diosowi jawabelia, nejjata, pamonaeje ne anaepanaeya ejjana dajjita jawa pe jinarutsiwi ejjana, bajara jjua yabara ta anaepanae jawa tsikayajatara bianajü pa nakuataje, kaetobata apo werewerekae tsane. ²⁶ Baitsi Juda piaja reinü, pa peka itorobinürena pajjamü pane yanijobi nejja Diosonü jjua pe itsi nejja, jjua ramaje pajjamü pa jumaitsimü tsane ajara ponü jawabeliaje, Diosonü, Israel piaja Dioso jjua jumaitsije: 'Pa liwaisi jjamü jumetaneme, ²⁷ tsipaji ne jamatabü jjanepanaenü , jjamü nabijiobitame Dioso itabü nejewa pakujinae jumetaneme jjua itsijitsia pa nakua y jota pejinawanapaewi jotaje, pijinia nabijiobitame ta itabü nejewa y najuma ese titiname y nuame ta itabarata, JJanü pijinia kajume tanetsi', jjua ramaje Diosonü jumaitsije. ²⁸ 'Taema, JJamü tüpaename jamata ejema, ne itajjuto apo tae tsane pebisia kuene jawa ata jjua JJanü tsijjuabianajü pa nakua pia jiwije.' " Pa liwaisije paeba otjopaliaje reinü jawabelia. ²⁹ Bajara jjua kujinae reinü najume itoroba pe nabarü nakaetuatsi nejja penaweretsivanü Juda yajawa Jerusalen pia jiwi. ³⁰ Nejjata reinü tsia Diosonü piaja bo yabetsia, dajjita pebianü piajiwi Juda yajawa pejinawanapaewi Jerusalen jota, sacerdotewi, Lewitawi, dajjita jiwi pekunuawi yajawa atsijji ata. Ajara jjua kujinae bajara ponü to leba tomara jawabelia dajjita pa liwaisi yakinaruta pe najume tae bajjutota pe pitabuatsi jawa Diosonü piaja bo jota. ³¹ Reinü piaja tajjunaeta nonotapuna Diosonü jawabelia najamatabü ruta, Diosonü piaja namutua pe ponae nejja, pe jumekowünütsi nejja, jjuanü to yakinarubatsi, dajjita jamatabü kuenia y dajjita pe najamatabü rutsikuenia, pe jumekowünütsi nejja pa liwaisi yakinarüta pa bajjutotaje. ³² Bajara ponü itsi dajjita jiwi pe jinawanapaewi Jerusalen y Benjamin jota pe nubenae nejja pe najumetae jota. Jerusalen pe jinawanapaewi itsi pakuenia itorobatsi Dioso pe jume jawata, piaja monaewimi piaja Dioso. ³³ Josias ajibia ejjana dajjita pebisia jawanü piaja ira wekua Israel tomara. Bajara ponü itsi dajjita Israel pe jumejjania tae nejja Diosonü, piaja Dioso. Dajjita matakabi jawabelia, pamonaeje apo wekua natsatsi Diosonü, piaja monaewimi piaja Dioso.