¹ Manases pe jjainae nüta doce (12) pa wai beje pakujinae tajjujjuaba pe itorobi jawa reinü kuenia; itorobanuka cincuenta y cinco (55) pa wai beje Jerusalen jota. ² Ejjana pe bisiakuene Diosonü itajjutua, pakuenia ejjana itsa monae pa tomaranü Diosonü jukalia Israel pia jiwi itabü nejewa. ³ Tsipaji bajara ponü ya jjaneba atjübütatsia pa tajjunaenü pajja Ezequias pikani pijiana, nakueneba ibo jumanü Baalewi nejja, ejjana naejawanüta Asera jumepe, jjaniatane dajjita atjübütatsia pe rubenae jawa, barüyatane. ⁴ Manases nakueneba ibojuma tsotonü Diosonü piaja bo jota, Diosonü itorobi ata: "Jerusalen jota raja ne wünü taerutsiana dajjita matakabi jawabelia." ⁵ Bajara ponü itsi ibojumanü dajjita atjübütatsi pa tulupu nejja anija mujju nenia beje Diosonü piaja bo jota. ⁶ Ben Hinom ibo korotusatota bajara ponü pejji tajuita. Na kujaruba pe tae nejja pe wajunae yabelia yajawa pe najorobi jawa; leba jjua najetarukajetsia; jumeyanijoba pa monae barükuikuijai petüpaewi yajawa pa monae pe jumepianü barükuikuijai. Itsi bitso pebisia kuene Diosonü itajjutua pe anaepanae ejjanae nejja Dioso jawabelia. ⁷ Asera pe jumepe pe itsi jawa bajara ponü, nota Dioso piaja bo jawata. Pa bo yabaraje Dioso jumaitsi David yajawa pejjünato jawabelia Salomon; Bajara ponü jumaitsi: "Pa bo jota tsaneje yajawa Jerusalen jota, JJanü itapetajü dajjita Israel wiriawi jota, JJanü ta nawünü yapütaya ejjanae nejja dajjita matakabi jawabelia. ⁸ JJanü apo tijjitsinü tsane Israel pia jiwi pa ira kewuaje JJanü tarajutsi jawa piaja monaewi jawabelia, itsa pamonaeje ne jumejjaniajai taene ta itorobi jawa, pakuenia yakinaruba pe itorobi jawata, pe najumetae jota yajawa jjua JJanü jumaitsinü pa monae jawabeliaje Moises jawa." ⁹ Manases tsita itsi Juda yajawa pe jinawanapaewi Jerusalen jota pe bisiakuene bitso ajura jibia pa nakuanü mata tojjenetsiyo Diosonü werebiaba Israel tomara itabü nejewa. ¹⁰ Diosonü barü kuikuijai Manases jawabelia, yajawa piaja tomara, baitsi jane pamonaeje apo namujjuna eweta. ¹¹ Nejjata Diosonü tsimata ka rena pe mata kajinawanapae nüanü wajabitsaü Asiria piaja reinü, waetaba kadenata manases, pe nanekonitsinü kuenia ka pona Babilonia jawabelia. ¹² Pakujinae Manases bitso ajamatabü kuene saü jibi, Diosonü jawabelia bitso najamatabüruta, piaja Dioso, ayai kueneta nabijiobita piaja monaewimi piaja Dioso jawabelia. ¹³ Bajara ponü wajüka Diosonü jawabelia; Dioso itajjuto bijiobia tane, Dioso jumetane pe wajükae jawa Jerusalen jawaberena kaewüa ka rena ejjana, piaja nakua yaberena. Nejjata Manases yapütane pepo Diosonü kuene Dioso. ¹⁴ Bajara jjua kujinae, Manases nakueneba itsa itapa pe yanakaranatsi jawa David piaja tomara jota, Gihon mujjunene welia, petusato jota, dujuai baupa jota. Ya itajjata Ofel unu ayai itapatatsia pe yanakaranatsi jawa. Bajara ponü noba pe itatsaka wajabitsaünüanü dajjita pe ya naitajjatatsi tomaranü jawa Juda. ¹⁵ Ajibia ejjana saya nayawi piaja diosowi, pejumepe jawanü wekua juka Diosonü piaja bo, dajjita ibo jumanü pe itsi tsanubi jawa Diosonü piaja bo unuta yajawa Jerusalen jota, tomara wekua penelia. ¹⁶ Bajara ponü yajjaneba ibo juma Diosonü piajawa yajawa ajara jota pe rajutsi nejja Dioso pe yawenonae jjaetsi pe jamatabü kuene barüyae jjae; bajara ponü itoroba Juda pia jiwi jawabelia Diosonü piaja pianiwi nejja Israel piaja Dioso. ¹⁷ Itsiata, jiwi atjübütatsia patajjunaenü jumata tsiteka rajutabiaba Dioso, baitsi jane Diosonü nejja, piaja Dioso. ¹⁸ Itsa kuene jawanü yabara Manases, pe nawajukae jawa piaja Dioso jawabelia, pe jumaitsi jawanatsi pe wajünae yabaelia pe taewi jjuanü jumaitsitsi Diosonü pe wünüta, Israel piaja Dioso, yakinaruba pe itsi jawanü jota Israel piaja reyewi. ¹⁹ Jotaje saya paeba pa liwaisi pa kujinae nawajüka, pakuenia Dioso itajjuto bijiobi tanetsi. Pijinia paeba dajjita pe bisiakuene jawanü pe itsi jawa, yajawa tsajota nakueba atjübüyo pa tajjunaenü Asera jumepianü naejawanüta ruba, pe nabijiobitsi wajünaya , yakinaruba tsajota pe wajünayabelia pe taewi jjuanü itsi. ²⁰ Manases piaja monaewi mujjuneneta tüpa, pamonae mütjüta piaja bo jota. Pejjünato, Amon, reinü naejjana pe kowüta. ²¹ Amon pe jjainaenüta veintidos (22) pa wai beje pakujinae tajjujjuaba pe itorobi jawa reinü kuenia; itoroba anija (2) wai beje Jerusalen jota. ²² Bajara ponü pe bisiakuene itsi Diosonü itajjutua, pakuenia Manases, pajjami ba itsi. Amon rajuta dajjita jumepianü nejja Manases pajjami pe itsi jawanü, yaiyataya barüyatane. ²³ Bajara ponü apo yaiyatae Diosonü jawabelia, pakuenia Manases pajjami itsi. Bitso saya Amon pebisia kuene ejjana kae matakabi kanakujitsia. ²⁴ Piaja pianiwi yabara najumetanetsi y beyajjuabatsi piaja bo jota. ²⁵ Itsiata bajara pa nakua pia jiwi beyejeba dajjita pamonae najumetane pe peyajjuabi nejja reinü Amon jawabelia, pamonaeje nota Josias, pejjünato, reinü kuenia pe kowüta.