¹ Dajjita jjuanü kujinaeje, pe jume kowünütsi kujinae, Senakerib, Asiria piaja reinü, Juda jawaberena joneyojo pa rena. Tsimajjü natajjunaeba pe yanakaranatsi tomara, tsipaji najamatabü jjaina pe wekua petsi jawa. ² Pakujinae Ezequias tane Senakerib pe tsimajju rena jawa pe barünabe nejja Jerusalen, ³ Bajara ponü jume yanijoba piaja jiwi jawabelia pe matakajinawanapaewi, yajawa pia jiwi pe apa ajjayowi, pe yatu ukutsi nejja mera pa najetonü tomara kujinalia najetarubena; pamonae yawenonatsi pe itsi nejja. ⁴ Nakaetuata ayai bitsaüto yakaranata dajjita mera pe najeto jawa, pe pitsabaru benae jawa ira tutuju jawetsina. Pamonaeje jumaitsi: "?De jjuitsia Asiria piaja reyewi ponajetsiparena y kajjibara bijitsipa mera monae?" ⁵ Ezequias nakuene saüta pe barü nakuenebi nejja dajjita pe ya itakaranatsi nejja ibo bürüta jjua bijiana. Bajara ponü nakueneba ibo jawanü atjübüwetsika pe naitajjuto kaewetsi nejja, pijinia panabolia itsa ibo bürüto. Pijinia bajara ponü David piaja tomara Milo ibo jawata ya itakaranateta, yajawa itsi pe kanabe nejja piaja nainü y penayajiwi karanatsi pa. ⁶ Bajara ponü nuba wajabitsü pe itorobinüanü tomara jawata. Barü nakaetuata tomara baupata pijini tusato jota pe jjania jumeta barü kuikuijai ajara pamonae jawabelia. Bajara ponü jumaitsi: ⁷ "Pa najamatabü saüre y payaimüre. Pütsa pa junawame pa kujunawijitsipame Asiria piaja reinü yajawa dajjita piaja wajabitsaü pe barü renawi, tsipaji naka yajawa bitso pepo ayainü bajara pamonae matatojjenetsiyo. ⁸ Bajara ponü yajawa ponapona saya pebi jiwi pesaü, wajjaitsi naka yajawa Diosonü, waja Dioso, waja nakayawenonae nejja, waja naka yabara nabe nejja." Nejjata jiwi jamata ejematsia pe jumeta Ezequias, Juda piaja reinü. ⁹ Bajara jjua kujinae, Senakerib, Asiria piaja reinü, piaja pianiwi itorobalia Jerusalen jawabelia (Bajara ponü aekonojjae nuka Lakis jota, dajjita piaja wajabitsaü yajawa), Ezequias jawabelia, Juda piaja reinü, dajjita Juda pia jiwi yajawa pe jinawanapaewi Jerusalen jota. Bajara ponü jumaitsi: ¹⁰ "JJua maje Senakerib, Asiria piaja reinü, jumaitsi je: '?De patsata pa najamatabü rutame pa ne jamata ejema nejja pa peka ya enebi jawa Jerusalen jota? ¹¹ ?Apo paka yamajü itorobi Ezequias, pa peka tüpae ejjanae nejja pa nijani o mera nejewa, pakujinae jumaitsi: 'Diosonü, waja Dioso, naka yawenonaena Asiria piaja reinü pe kobe jawerena?' ¹² ?Ajara pa Ezequias tsiji apo penetsia pa tajjunaenü atjübüyotsia nubena piaja ibo jumanü yajawa itoroba Juda y Jerusalen, Ibo jumajota pato barüyamü tsane, ajara pa ibo juma wereka pato tajuitsianame. ¹³ ?Pajamü apo paya pütaemü jjua jjanü yajawa tajamonaewi pa itsinü dajjita jiwi pa nakuataje? ?Pa tomara piaja diosowi kapanepajetsipa pe yawenonae jawa pata kobe werena? ¹⁴ Dajjita pa nakua piaja diosowi tajamonaewimü werebiaba, ?Itsa dioso ata yawenona pia jiwi jawabelia ta kobewelia? ?De jjuitsia nija Dioso kapane pajetsipa pa peka yawenonae nejja ta saü wekua? ¹⁵ Pütsa pana yamajjü itorobia ejjaname Ezequias jawabelia o pa jumejjania jai taneme, tsipaji kae dioso nü ata itsa nakua piaja reinü apo yawenonae kapanepae jawa piaja tomara ta kobe jawelia, o pe kobelia taja monaemi. ?Be welia biji nija Dioso pa peka yawenonae nejja ta kobewelia?" ¹⁶ Piaja pianiwi Senakerib bara kuikuijai Diosonü yajawa piaja pianinü yabara Ezequias. ¹⁷ Senakerib pijinia to yakina pe bajjutonü pe kenetsia jumaitsi nejja Diosonü, Israel piaja Dioso, pe yabara kuikuijai. Bajara ponü jumaitsi: "Pakuenia pa ira nakuata piaja diosowi apo yawenonae piaja jiwi, baraja pakuenia Ezequias piaja Dioso apo yawenonae kapanepae tsane piaja tomara." ¹⁸ Pamonae judiowi jumeta wawajai Jerusalen tomara pe yanakaranatsi jota pe nubenaewi jawabelia, bitso pe benajakae nejja, ajara pakuenia pe wekua pitsi nejja piaja tomara. ¹⁹ Pamonaeje bara kuikuijai Jerusalen piaja Dioso, pakuenia bara kuikuijai itsa tomara jawa pa nakuanü piaja diosowi, pebi jiwi ra saya pe kobeta pe nakuenebinü. ²⁰ Ezequias, reinü, Isaias, Amoz pejjünato, profetanü, jjua yabara wajüka y bajara ponü wawajai atjübüabetsia. ²¹ Diosonü itoroba Angelenü, beyejeba wajabitsaü nüanü, pe matakajinawanapaewi y reyenü piaja jiwi wayafo tusatota. Nejjata Senakerib piaja nakuayabelia ya uraya nawiata. Pakujinae bajara ponü joneyojopa piaja bo jota piaja dioso, espadata pejji peyajjuabatsi ajara jota. ²² Pa kueniaje, Diosonü yawenona Ezequias jawabelia yajawa pe jinawanapewi Jerusalen jota Senakerib wekua pesaü, Asiria piaja reinü, dajjita jiwi pe kobe wekua jamata ejemaya jinawanapaeya ejjana dajjita jawa. ²³ Ayai bitsaütonü pe rajutsi nejja Diosonü to kaponarena Jerusalen jawaberena, pe jjania jawanü pe rajutsi nejjatsi Ezequias Juda piaja reinü, nejjata, dajjita nakuanü itabü nejewa ayainü ejjanatsi, pa matakabi kujinaeliaje. ²⁴ Bajara pa matakabi jawalia, Ezequias romaibanukatsi ü petüpae nejja. Bajara ponü nawajüka Diosonü jawabelia, barü kuikuijaitsi to rutatsi pe jamatabü jjanepanae nejja. ²⁵ Itsiata Ezequias Diosonü jawabelia apo najamatabü rutsi pe yawenonae jawatsi Diosonü, tsipaji na tsita ayai jamatabükuene jjaina. Nejjata pe anaepanae jawa tsi jopatsi, Juda yajawa Jerusalen. ²⁶ Itsiata, Ezequias na pijiobia ejjana pe jamatabü kuenia, be pe jinawanapaewi Jerusalen jota, nejjata, Diosonü pe anaepanae jawa pamonaeje apo tsijopaetsi Ezequias pe itorobi matakabi. ²⁷ Ezequias bitso dajjita kuene jjaina pijinia bitso yaiyatanetsi. Bajara ponü pijikuata nato itsi bonü pe jjanewaitsi nejja palata, oro y pejjania ibotonü, pijinia pe yanakaranatsi panü yajawa dajjita kuene penamatamatsi jawanü. ²⁸ Bajara ponü pijinia jjaina bonü pe jjanewaitsi nejja pe kaetuatsi jawa pejju, pejana uwa ra, manteka, yajawa pe yakaranatsi jawanü dajjita kuene nüjji. Pijinia jjaina owejajji peyakaranatsi jota. ²⁹ Pijinia, nato itsi tomaranü yajawa owejanü y baka bitsaütonü, tsipaji Dioso rajutatsi dajjita kuene. ³⁰ Bajara ponü rabaja kaenü Ezequias pijinia yatu ukuta pe fubia tsarukae mera Gihon jawata, pe katsika nejja David piaja tomara mujjunenia be rena. Ezequias pejjania kuene to pitsapa najebaliatsi dajjita jjuanü ejjana. ³¹ Itsiata, pe ponaewilia reinü pejji Babilonia piaja jiwi, pe itorobiliawitsi bajara ponü jawabelia, pe yanijobi nejjatsi peyapütaewi jawabelia, jjua pepo pe ayapü beje jawanü Dioso itsi pa irataje, Dioso kopata bajara ponü jawabelia, pe yapütae nejja, jjua jjaina pe jamataütjütota. ³² Itsa kuene jawanü Ezequias pe itsi jawa, jjua jumekowünüta pe itorobi jawa, pajjamü pa tajetsipame pe yakinarubi jawa profetanü petae jawa Isaias , Amoz pejjünato, yajawa reyewi Juda yajawa Israel piaja bajjuto. ³³ Ezequias tüpa piaja monaemiwita, pamonaeje mütjüta David piaja monaewimi. Dajjita Juda yajawa pe jinawanapaewi Jerusalen yaiyataeya buatatsi. Pe kowüta pejjünato Manases itorobanüka reinü kuenia.