¹ Pakujinae dajjita baja ajibi, pe nubenaewi dajjita tomara Israel pia jiwi ajara jota, ponalia Juda tomaranü jawa tojjobabia ibo naenü tsikababa Asera ibo naenü, tojjobaba atjübütatsi pe nubenae tajjunaenü ibo jumanü dajjita Juda, Benjamin, Efrain y Manases jota, pe ajibia ejjanae jawabelia dajjita. Nejjata dajjita Israel tomara piajiwi nawiaba kae jiwi kanakujitsia piaja tomaranü jawa. ² Ezaquias juta pakuenia sacerdotewi y Lewitawi najua nakuenebijitsia, kaenü kanakujitsia pe itsi nejja jjua nakuenebia ejjanatsi, sacerdotewi Lewitawi yajawa. Bajara ponü to tajuitsia ejjana y rajuta na piaja monae kuenia, pe to jai nejja, pejjania kuene wajalia, Dioso piaja bo baupata dajjita kuenenta barüyataejetsia. ³ Pijinia reinü rajuta jjua to tajuitijitsia, pe kobe kowüjaba, ajara jjua pe tajuitsi nejja bajayakunua y kaniwiyo, pijinia pa matakabi apo nakuenebi, pejana juemeto jota y peto barüya matakabianü, pakuenia yakinarüta Diosonü pe itorobi kuenia. ⁴ Itsiata, bajara ponü itoroba pa tomara pe jinawanapaewi Jerusalen jota pe rajutsi pe jumatsi jawatsi Sacerdotewi yajawa Lewitawi nejja, bajara pakuenia pamonaeje pe itsi nejja Diosonü pe jume liwaisi kuenia. ⁵ A jena juta pe itorobi kuenia, Israel tomara rajuta pejjania jamatabü kuenia pejana kaetuatsi jjutonü, pejana jukae uwa ranü, mantekara, jabura yajawa dajjita pe kaetuatsi jawa pe ubi jota. Pamonae kapona rena die jjua jawami beje kae jawa dajjita pewünüta, jjuaje ayai jawa jjanetoje. ⁶ Israel y Juda tomara pia jiwi, pe jinawanapaewi Juda tomaranü jota, pijinia kaponarena piaja die jjua jawami beje kae jawa bakanü y obejanü, pejjania jawanü Diosonü peto tsatsi jawa piaja Dioso nejja, ayai jawa jjanetonü najuma jeba. ⁷ Akuayabi pa juemeto jota pakujinae tajjujjuaba pe kaetuatsi jawa pe jebi nejja najuma kaetuateta, siete (7) pa juemeto jota nakobe wereta. ⁸ Pakujinae Ezequias y pe matakajina wanapaewi pona-rena y tane penajuma kaetetuatsi jawanü, pamonae pejjania jumenü Diosonü jawabelia jumaitsi Israel tomara yajawa. ⁹ Nejjata Ezequias yanijoba sacerdotewi y Lewitawi jawabelia penajuma kaetuatetsi jawanü yabara. ¹⁰ Azarias, sumo sacerdotenü, Zadoc yajawünü, jume pita y jumaitsi: "Jiwi pe kaponae kujinaerena pe rajutsi nejja Diosonü piaja bo jawaberena, jjanetesi wajapene jawabelia, y ayai jawa nakopaba, tsipaji Diosonü pejjania kuene rajuta piaja tomara nejja. JJua ramaje nakopatekaje. ¹¹ Nejjata Ezequias itoroba pe itsi nejja Diosonü piaja bo jota tsajota kaetuata ponaejetsia pamonae ejjaneta. ¹² Nejjata pamonae pe jumaitsi kueniatsi pe rajutsi jawa nejja kapona rena, die jjuami beje kaejawa yajawa Diosonü piaja wanü nejja. Konanias, Lewitanü, pamonaeje pe matakaponaponaenü yajawa Simei, pejuyapijinü, pe yawenonaenü. ¹³ Jehiel, Azarias, Nahat, Asael, Jerimot, Jozabad, Eliel, Ismaquias, Mahat, Benaia pe yawenonaewi Konanias y pejuyapijinü Simei, pe itorobi kuenia Ezequias, reinü, y Azarias, pe itorobinü Dioso piaja bo jota. ¹⁴ Kore, pejjünato Imna Lewitanü, pe baupa ewetanu kaenü pe mutua bereka, ewetanuka pe jamatabü kuenia Dioso nejja pe kapatsi jawa, pe to jeba najetarukae nejja Diosonü jjuanü to kapatsi sajinaya pepo pejjania jawanü. ¹⁵ Pe yawenonaewitsi Eden, Miniamin, Jesua, Semanias, Amarias, Secanias, sacerdotewi piaja tomaranü jawa. Pamonae pe tsanaewi nejja jjanewaetsia, rajutijitsia piaja monae kanakujitsia, dajjita jiwi nejja. ¹⁶ Pamonae pijinia rajuta pewajji nüjji akuayabi (3) pa wai beje kujinae pe jjainaewi, pamonae wünü rubena piaja monaewimi kanakujitsia pe joneyabiabiwi Diosonü piaja bo jawata, pakuenia kae matakabi kanakujitsia itsi tsabiabi, pe nakuenebi nejja peyapütae jota. ¹⁷ Pamonae noba sacerdote piaja monaewi pe wünü rubenae jota kanakujitsia, bajara pakuenia itsi Lewitawi jawabelia veinte (20) pa wai beje pe jjainaewi o bebeliyo, pe nakuenebi jawa kanakujitsia. ¹⁸ Pamonae yajawa wünü kajunua atsi nakuetojji, pe barüjinawanapae wanü, pejji yajawa pejjünatoyonü, dajjita tomarajji yajawa, piaja kuata najamatabü eweta wanapa. ¹⁹ Sacerdotewi, Aaron yajawünüwi, pe jinawanapaewi piaja tomaranü wekua tajuyo, kae tomara kanakujitsia, nubena pe wünü kanakujitsia pe nobiwitsi pe tsanawi nejja dajjita pebi jiwi jawabelia sacerdotewi jota, yajawa dajjita pe wünü rubenaewi piaja monaewi yajawa piaja monaewi Lewitawi. ²⁰ Ezequias ejjana dajjita jjuaje Juda jota. Bajara ponü itsi pejjania kuene, pe itorobi kueniatsi Diosonü itabaü nejewa, piaja Dioso. ²¹ Kae jawa kanakujitsia jjua tajjujjuaba pe itsi jawa Dioso piaja bo jawata, pe itorobi jawanatsi, jjuanü yakinaruba, Dioso pe jaitsi nejja, bajara ponü itsi dajjita jamatabü ütjütota, dajjita jjanewaetsia to pitsapatsi.