¹ Ezaquias itoroba liwaisi jume kaponaenv dajjita tomara Israel, Juda, to yakina Efrain pe jume bajjuto yajawa Manases, bajara pakuenia pekuene kajüpaetsi nejja pe patsi jawa Diosonü piaja bo Jerusalen jota, pe to itsi nejja Diosonü piaja fiesta, Israel piaja Dioso. ² Tsipaji reinü, pia jiwi, yajawa dajjita penakaetuatsiwi Jersalen jota najua yanijoba, peto itsi nejja fiesta anija juemeto jawabelia. ³ Pamonaeje akuenebi peto itsi jawa epijiyo, tsipaji bewelia sacerdotewi pe nakuene janewaetsiwi, jiwi ata apo nakaetuatsi Jerusalen jawata. ⁴ Ma pajume liwaisi tsita jjanepanatsi reinü itajjutua yajawa dajjita pe nakaetuata nubenaewi. ⁵ Bajara jjuata, pamonae kae liwaisi najumetane dajjita Israel nejja, Berseba jota kujinae Dan jawabereka, tomara pia jiwi pe ponae nejjatsina pe najamatabüna pitsi nejja pakuenia Diosonü jutatsi piajamonaewimi, Israel piaja Dioso, Jerusalen jota. Baitsi jane pamonaeje apo tae ayai jiwi bitsaüto jjaneto, pakuenia baja yakinaruta. ⁶ Nejjata, liwaisi kaponaewi pe itorobi yajawa reinü pe yakinae liwaisianü kapona dajjita Israel y Juda jawa, pe itorobi kueniatsi reinü. Pamonae jumaitsi: "Pajjamü, Israel tomara, pa nawiabare Diosonü jawabelia, Abraham piaja Dioso, Isaac e Israel, bajara ponü pa kayajawünü kanawiabi nejja pa jiwijji wekua panepeka Asiria piaja reinü ⁷ Pütsa be panija monaewimü o be pane matapijiwi, pebisia kuene ejjana Diosonü itajjutua, pa nija monaewimü piaja Dioso, wereta jjubia ejjanatsi, pakuenia pataneme. ⁸ Aekonojjae, pütsa panajamatabü ataja ejjaname, pakuenia pa nija monaewimü ejjana; saya, Diosonü jawabelia pa najamatabü ruta pa pona-remena piaja tajjunae jawaberena, jjua bajara ponü jjaniawaeta dajjita matakabi jawabelia, pa to barüyamüre Diosonü pa nija Dioso, pa peka bara anaepae jawa bitso ajibi tsanajetaru kajetsia. ⁹ Tsipaji pajjamü itsa pa nawiabame Diosonü jawabelia, pa nija monae pejji yajawa tsita pijiobi tsane pe kaponaewitsi tajü, pamonaeje piaja ira berena nawiabiana. Tsipaji Diosonü nija Dioso, pe jjania jamatabü kuenenü, pitajjuto tsonia taenü, kaeto ata apo pakanako funatsi tsane pajjamü, itsa pa nawiabame bajara ponü jawabelia. ¹⁰ Bajara pakuenia, liwaisi kaponaewi tomara kanakujitsia najetarubena dajjita piaja nakua jawa Efrain yajawa Manases, dajjita namuto jawa Zabulon jawabereka, dajjita jiwi kapokaponatsi. ¹¹ Itsiata, itsa nüanü pia jiwi Aser, Manases pijinia Zabulon jume jjaniajai tane y Jerusalen jawabetsina ponaina. ¹² Juda jota pijinia yajawatsi Dioso pe kobe, kae jamatabü kuene pejjainae nejja, pe itsi nejja pe itorobi kuenia reinü yajawa pe matakajinawanapaewi Diosonü pe jumeta. ¹³ Jiwi bitsaüto, nakaetuananuka, Jerusalen jota nakaetuana barüyaya paün pe yajinae ejjanae jawa nejewa pe jjae nejja anija juemeto jota beje. ¹⁴ Pamonaeje penelia Jerusalen jawata penubenae jawanü, dajjita petujjudere ekae jawa ibojumanü; pamonaeje penereka Cedron najeto jawareka. ¹⁵ Bajara jjua kujinae, pamonaeje pejana obejajji pia paskua nejja, catorce (14) pa matakabi jawalia anija juemeto jota. Sacerdotewi yajawa Lewitawi, au-ra tsanubena, nejjata najamatabü kuene jjanewaeta petajuitsi jawanü pekaponae nejja rena Diosonü piaja bo yabe-rena. ¹⁶ Pamonaeje nubena pe nobi jawatatsi, pejumaitsi kueniatsi Moises pe jume liwaisi jawata, Dioso piaja jiwitonü. Sacerdotewi tsikaba pa jana jawata Lewitawi pe kobeta to yotabia barenatsi. ¹⁷ Tsipaji bitso ayaibitsaüto pe nakaetuatsi apo najamatabü najjawaetsiwi. Bajara jjuitsia, Lewitawi bia pejana obejajji paskua pijinüanü dajjita pamonae nejja apo najamatabü jjanewaetsi, yajawa akuenebi pe rajutsi jawa pe to jjanewaetsi jawa Diosonü nejja. ¹⁸ Tsipaji ayai jiwi bitsaüto jjaneto, ajara payajawünüwi Efrain, Manases, Isacar yajawa Zabulon pia jiwi, apo najamatabü kuene jjanewaetsi, ajara pakuenia jjane paskua pejjae jawa, itsakuenia yakinaritsi ata. Itsiata Ezequias ajara pamonae jawabara Dioso jawabelia to wajüka, jumaitsije: " Diosonü pe jjania jamatabü kuenenü dajjita pamonae na jamatabü kuene ruta Dioso pe jaitsi nejja, ¹⁹ Diosonü, pa nija monaewimü piaja Diosonü, apo najamatabü jjanewaetsi ata pakuenia ruta pa tajjuinae jota nejjaje." ²⁰ Nejjata, Diosonü jumetane Ezequias jawabelia y jamata ejema jiwi. ²¹ Israel tomara pe nubenaewi Jerusalen jota barüyaya na jjane peyajinaeya ejjanae jawa apo peka ponae paün büanü barüraya bitso tsanajebilia siete (7) pa matakabi beje. Lewitawi yajawa Sacerdotewi kae matakabi kanakujitsia barüyatane Diosonü jawabelia, to najjüana pe ajume yai jawanüta Diosonü nejja. ²² Ezequias pejjania kuenia kuikuijai dajjita lewitawi jawabelia pamonae jumetane Diosonü piaja pianinü nejja. Bajara jjua yabara pamonae jjane dajjita pe barüya matakabianüta siete (7) pa matakabi beje, rajuta najebalia pejjania kuene pe jinawanapae nejja, pijinia na nekoni paeba Diosonü jawabelia, piaja monaewimü piaja Dioso. ²³ Dajjita pe nakae tuatsiwi najumetane pe itsi nejja itsa siete (7) pa matakabi beje, pamonae bitso barüyaya itsi. ²⁴ Baitsi, Ezequias Juda piaja reinü rajuta jiwi jawabelia mil (1000) pa baka pebito beje yajawa siete mil pa obeja beje be perajutsi kuenia Diosonü; pe matakajina wanapaewi pijinia rajuta penakatuatsi jawabelia mil (1000) pa baka pebito beje yajawa diez mil (10 000) pa obeja yajawa kabrajji. Sacerdote bitsaüto nakuene kanewaeta. ²⁵ Dajjita pe nakaetuatsiwi Juda pia jiwi, Sacerdotewi, Lewitawi , dajjita tomara nakaetuata Israel jota, tajü werena ata pia jiwi pe ponaewi-rena Israel nakua jawerena pamonaeta pe jinawapanaewi Juda jawata, dajjita pamonae jamatabü barüya bitso. ²⁶ Nejjata, jamatabü barüya Jerusalen jota, tsipaji Salomon pejjünato David kujinae, Israel piaja reinü, apo itsi ata pe pitsi jawa Jerusalen jota. ²⁷ Ajara jjua kujinae, Sacerdotewi, Lewitawi, nonobapüna pejjania kuene to wajüka tomara jawabelia. Jumetanetsi, pe wajükae jawa atjübüabetsia pata, Dioso tsajotatsi ponapona.