¹ Josias baruyaya itsi pe najamatabü na pitsi nejja pakuenia jurenatsi Egipto jawerena, Diosonü nejja Jerusalen jota, bia pe jana owejanü ajara jjua nejja, namatajjai naya pa juemetota catorce (14) pa matakabita. ² Bajara ponü sacerdotewi jawabelia jumaitsi jjua nakuebijitsia tsipaeba pejjania kuene pe nakuenebi nejja Diosonü piaja bo jawata. ³ Bajara ponü jumaitsi Lewitawi jawabelia pe kujaruba nubenaewi Israel piaja jiwi yajawa pamonae Diosonü nejja natsata: "Pa buare Dioso piaja Arka Salomon piaja bo jawata pejjünato David, Israel piaja reinü nakuenebeta. Putsa baja matabüjüa pane wütakarata paka poname, Aekonojjaeta pa barüya taema Diosonü pa nija Dioso, pa itsimüre Israel piaja tomara nejja. ⁴ Pana jjanewaere pajjamü pa nija monaewimi piaja bo pe wünüanü kanakujitsia y pa peka jjanewaetsi kuenia, pakuenia David ba paka to yakinaruba, Israel piaja reinü, jjuanü ata Salomon, pejjünato. ⁵ Pa nubenare pa nija tajjunaenü jawa Dioso piaja bo jota, tsajota pa peka nobi kuenia pa nija monaewimi kanakujitsia, pa nija tomara piajiwi kanakujitsia, pa nore panija tajjunaenü pakuenia nobatsi pa nija monaewimi Lewitawi piaja bo jawanü kanakujitsia. ⁶ Pa bema pejana owejanü paskua nejja, pa najamatabü kuene jjawewaere, pa jjanewaere pejana owejanü pa nija monaewi nejja, pe na itsi nejja pakuenia pe jume liwaisi Diosonü jjua rajutatsi pe kobeta Moises. ⁷ Josias rajuta dajjita tomara nejja treinta mil (30 000) pa pejana oweja beje yajawa kabritojji bitsaüto to jebi nejja paskua peto itsi nejja dajjita jiwi pe nakaetuatsiwi. Bajara ponü pijinia rajuta tres mil (3000) pa baka pebitonü; reinü piaja nüanü. ⁸ Pe matakajinawanapae nüanü rajuta pe jamatabü kuenia tomara jawabelia, sacerdotewi, Lewitawi. Hilcias, Zacarias, Jehiel, Dioso piaja bo pe ewetsiwi, rajuta sacerdotewi jawabelia paskua nejja dos mil seiscientos (2600) pa becerojji pijinia tresciento (300) pa pebitobeje. ⁹ Pijinia Konanias, Semanias, Natanael, peyapijinü, Hasabias, Jeiel, Josabad, Lewitawi pe matakaponaponaenü rajuta Lewitawi jawabelia paskua nejja cinco mil (5000) pa becero beje yajawa quiniento (500) pa baka pebito beje. ¹⁰ Nejjata, pamonaeje jjanewaeta dajjita paskua nejja, sacerdotewi pe tajjunaeta nubena, Lewitawi yajawa pakuenia nobatsi, pe itorobi kueniatsi reinü. ¹¹ Pamonaeje bia pejana owejajji paskua nejja sacerdotewi pejanata tsikaba pamonaeje pe wekua pitsi jawa Lewitawi pekobeta y Lewitawi pejana owejajji wüsi kajjiuka. ¹² Pamonae jukarena pe tajuitanubenae jawa, pe tsanae nejja pe nubenae kuenia piaja tomaranü kanakujitsia, pe rajutsi nejja Diosonü, pakuenia yakinaruta Moises piaja bajjutota. Pamonaeje itsi ajara pakuenia baka pebitonüta. ¹³ Pamonaeje seba owejanü paskua nejja isototape itorobi kueniatsi. JJua peto tsatsijawa sajinaya Dioso nejja, pamonaeje jjorapa wajjianüta, kalderota, saerten jawata, bapijiayo pamonae tokaponalia jiwi nejja. ¹⁴ Pamonae ajara jjua kujinae nato itsi bajara pamonae nejja yajawa sacerdotewi nejja, tsipaji sacerdotewi, pejji Aaron, Akuenebi tsanubenae peto tajuitsi jawa yajawa penasitsi jawa merawi jawabelia, nejjata Lewitawi nato itsi bajara pamonae nejja yajawa sacerdotewi nejja, Aaron piaja monae jiwi. ¹⁵ Pamonae penajjüanawi, Asaf pejji, pekowüta nubena, pakuenia David to ruba, Asaf, Heman yajawa Jedutun pewajunae yabelia pe taenü reinü pia jiwitonü, pe ewetanübenaewi nubena dajjita baupanü jawa. Pamonae apo namatawenonae itsa jawabelia peponae jawa, tsipaji piaja monae Lewitawi to itsitsi bajara pamonae nejja. ¹⁶ Nejjata, bajara pa matakabi jawabelia dajjita penakuenebi jawa Diosonü nejja peto itsi nejja paskua yajawa pe tsitajübi nejja peto tajuitsi jawa Diosonü piaja ibojumanüta, pakuenia reinü Josias itoroba. ¹⁷ Israel tomara pia jiwi pe nubenaewi ajara jota na itsi paskua, ajara pa matakabita, bajara jjua kujiane paün pe yajinae ejjanae jawa nejewa siete (7) pa matakabilia beje. ¹⁸ Pakuenia pe itsi jawaje paskua taeto ata apo na itsi Israel jota Dioso pe jume paibinü kujinae Samuel, kae reinüta Israel jota apo itsi Paskua pakuenia Josias itsi, yajawa sacerdotewi, Lewitawi y dajjita pia jiwi Juda yajawa Israel pena nubenaewi, yajawa pejinawanapaewi Jerusalen jota. ¹⁹ Pa paskuaje na itsi dieciocho (18) pa wai beje pe jjainae kujinae Josias reinü kuenia. ²⁰ Dajjita jjua kujinaeje, pe itsi kujinae Josias jjanewaeta Dioso piaja bo, Egipto piaja reinü, Neko, tsimajjütsia pe barü nabe nejja Karkemis Eufrate mene jawata Josias barü nabeyojopalia. ²¹ baitsi jane Neko to najume itorobalia piaja jiwita pe jumaitsi nejja: ?De pitsi kuene jjanü jainajü jjamü jawabelia, Juda piaja reinü? JJanü apo katsimajjü renatsi ajena, sijinaya pa bo piajiwi barünabiajü. Dioso ne itoroba ta barünabe nejja, ajara jjuitsi, naitajjuto jemare jjua Dioso itoroba, neyajawa raja, itsajume ka werebiabiana. ²² Itsiata, Josias apo jitsipae pena wiatsi jawarena. Bajara ponü na itotjiana pe barünabe nejja. Bajara ponü apo jumekowünütsi Neko pe jumianü, Dioso pe jume liwaisianü; nejjata, bajara ponü barü nabeyojopalia Menguido ibo korotusatota. ²³ Butsabita pe tsekonaewi upajjuabatsi reinü Josias, y reinü jumaitsi pia pianiwi jawabelia: "Pan juremelia sajinaya, tsipaji bitsonü ." ²⁴ Nejjata, piaja pianiwi juliatsi karo jawata pe jutsi nejjatsi itsa karota. Pamonae kaponaliatsi Jerusalen jawabelia, tsajota tüpa. Bajara ponü buatatsi piaja monaewimi piaja mütjüta. Dajjita Juda yajawa Jerusalen pia jiwi matanüayaba Josias jawabelia. ²⁵ Jeremias najamatabü jjaina bitso Josias yabara; dajjita pe najjuanaenüanü y petiriawi yajawa najamatabü jaina josias yabara bajara pa matakabi jawabelia. Pa wajianüje na jjüanabiaba Israel jota; taema, jjuanüje yakinaruba Pe najamatabüjjainae wajianü kuenia. ²⁶ Itsa kuene jawanü yabara Josias pe itsi jawanü, pe jjania kuene jawanü pe itsi jawa jumekowünütsiaya Diosonü pe yakinarubi jawanü. ²⁷ Pe itsi jawa, pe tajjujjuabi kujinae pe kopia rukae jawabelia, yakinaruba Juda yajawa Israel piaja reyewi bajjutota.