¹ Amasias pe jjainaenuta veinticinco (25) pa wai beje pakujinae tajjujjuba pe itorobi jawa reinü kuenia; bajara ponü itoroba veinticinco (25) pa wai beje Jerusalen jawata. Pena pe wünü Joadan Jerusalen jota pe ponaponaewa. ² Bajara ponü itsi pe jjania kuene Diosonü itajjutua, itsia pe jjania kuenia apo to najamatabü rutsi. ³ Itsa tajjujjuaba pekujinaya pe ewetsi jawa pe jjaneponae kuenia petajjujjubi kujinae, bajara ponü bia pa monae piaja pianiwi pe to beyajjuabiwitsi pajja, reinü. ⁴ Baitsi jane pejji apo to beyejebi, itsiata itsi pakuenia yakinaruta pe itorobi bajjutota Moises, pakuenia Diosonü itoroba: "Pajja jiwi akuenebi pe tüpae jawa pejji yabara, pejji ata pajja jiwi yabara. Itsiata, kae jiwi kanakujitsia tüpaena pe bisia kunene petsijjae." ⁵ Pijinia, Amasias kaetuata pia jiwi Juda wünü yakina piaja monaewimü kanakujitsia, pe kobeta pe mata kajinawanapaewi mile yajawa pe mata kajinawanapaewi cien pa jiwianü, dajjita Juda yajawa Benjamin pia jiwi. Bajara ponü namatajüta veitne (20) pa wai beje kujinaelia, dajjita jawa treciento mile (300 000) pe itapetsiwitsi. Pe nabe nejja pekuene kapanepaewi, pamonae kuererebo y peyanakaranatsi pa kapanepa. ⁶ Bajara ponü pijinia junuta cien mile (100 000) ponü beje Israel piaja wajabitsaunüanü matamota cien (100) pa talento beje palata jawanü. ⁷ Baitsi jane Dioso piaja jiwitonü tayojo pa renatsi y jumaitsitsi: "Rei, pütsa barüliamü Israel piaja wajabitsaü, tsipaji Diosonü apo yajawa Israel pia jiwi, pijinia Efrain pia jiwi ata. ⁸ JJamü ne aitatsakanü ata ne ayainü ata ne nabe nejja, Dioso ka amaneyabia ejjanaena nekuayanü itabü nejewa, tsipaji Dioso kuene kajüpatsi pe yawenonae nejja o pe najjubia ejjanae nejja. ⁹ Amasias jumaitsi Dioso pia jiwitonü jawabelia: ?De itsi tsane nejjata pa palata jjaneto matamotajü Israel piaja wajabütsaü jawabelia?" Dioso piaja jiwitonü jume kanawiata: " Diosonü raja karajutsipa ajara jjua matatojjenetsiyo." ¹⁰ Nejjata, Amasias tsata pa wajabitsaü ponaina Efrain jawetwsina; piaja bo jawa nawiabia ejjana. Nejjata, pamonaeje bitso bara anaepana Juda pia jiwi jawabelia, nawiaba piaja bojji jawa anae panaya. ¹¹ Na jamatabü kuene saüta nejja Amasias matakalia piaja tomara pia jiwi yajo ibo korotusato jawabelia; ajara jota amaneyaba diez mile (10 000) pa wajabitsaünü beje Seir piaja jiwi. ¹² Juda piaja wajabitsaü kaponalia itsa diez mile (10 000) ponü beje. Pamonae kaponalia ibo itapajanito jawabelia penetsika ajawetsika kujinae, dajjita pamonae tsapata junujunuatsia. ¹³ Pa pebi jiwi wajabitsaü nüanü Amasias nabiabia ejjanalia, pe püta pe nabe yenewalia, tsimajü pata Juda piaja tomaranü Samaria jota kujinae Bet Horon jawabetsia. Pamonaeje bia tres mil (3000) tomara pia jiwi y pepo aayi jawea wekua pita. ¹⁴ Ajara jjua kujinae, pe nawiatsi ta rena Amasias pe beyebi kujinae edomitawi, karena Seir pia jiwi piaja diosowi, nuba piaja diosowi nejja. Bajara ponü to barüya y to tajuita pe tujjudere ekae naenü. ¹⁵ Nejjata, Diosonü bara anaepana Amasias jawabelia. Bajara ponü itorobalia pe tsipaebi nejja pe jume liwaisi bajara ponü jawabelia, jumaitsitsi: "?De jjuitsia saya jaitame itsa diosowi pamonae apo yawenonae piaja tomara jawabelia ne kobe wekua?" ¹⁶ Pakujinae barü kuikuijai tsanükae Dioso jume liwaisi kaponaenü, reinü jumaitsi: "?Paka notatsi ne mujjujiobi nejja reinü? !Jumetaema! ?Jitsipame tsiji ne tüpaejaba?" Ajara jjua kujinae Dioso jume liwaisi paebinü moyatsajune y jumaitsi: "JJanü yapütaniji Dioso penajamatabü jjainae jawa peka ajibia ejjanae nejja tsipaji apo kuene jjanepanaemü pijinia apo ne jume jjaniataemü." ¹⁷ Nejjata, Amasias Juda piaja reinü yanijoba pe yawenonabiabiwitsi jawabelia y to najume itorobalia Joas pejjünato Joacaz pejjünato Jehu, Israel piaja reinü jawabelia jumaitsije: "renamüre, nakajjitajara bianatsi beje waja nabe nejja beje." ¹⁸ Baitsi jane Joas Israel piaja reinü itoroba liwaisi kaponaenüta Amasias nejja Juda piaja reinü, jumaitsilia: "Pe nukae naeyo Libano jota to najume itoroba Libano jota penukae nae jjaneto jawabelia, jumaitsiliaje: 'Rajure nejjunatoyo piaja wa nejja tajjünato,' baitsi jane unutiribota peponaponaenü tsapanata jjuaba bajara ponaeyo jawabelia. ¹⁹ JJamü jumaitsimü: 'Taema, jjanü biajü Edom pia jiwi jawabelia.' Nejamatabü kueneta natsi ayai nümü. Natsita ayai nümü ne amaneyabi jjae, nija boyota saya nukare, baitsi ?De jjua yabara natsi jaitame liwaisi, nejopae nejja , yajawa Juda jjamüta?" ²⁰ Baitsi jane Amasias apo jumetae, tsipaji bajara jjua Dioso pe jamatabü kuene, bajara ponü pekuene kajüpae nejjatsi pe rajutsi nejja Juda piaja tomara pekuayabi pe kobeta, tsipaji bajara pamonae jaita pe yawenonae nejjatsi Edom piaja diosowi. ²¹ Nejjata, Joas, Israel piaja reinü, barü nabia, bajara ponü yajawa Amasias, Juda piaja reinü, nakajjitajaraba beje Bet Semes jota, piajawata Juda. ²² Juda amaneyabatsi Israel piaja jiwi, rüküpeta kae jiwi kanakujitsia piaja bojji jawa. ²³ Joas, Israel piaja reinü, waetaba Amasias jawabelia pejjünato Joas pejjünato Joacaz, Juda piaja reinü, Bet Semes jota. Bajara ponü ka rena Jerusalen jawaberena y jjuabaya Jerusalen pe ya itajjata tetsijawa, Efrain baupa jawelia kujinae pemujjunene baupa jawabelia, cuatrociento (400) pa majjusolito beje apialia. ²⁴ Bajara ponü pita oro yajawa palata, dajjita jjuanü kajjitaraba Diosonü piaja bo jota Obed Edom, yajawa penamatamatsi jawanü reinü piaja bo jota, pijinia kapona jiwi, y Samaria jawabelia nawiata. ²⁵ Amasias pejjünato Joas, Juda piaja reinü, ponapona quince (15) pa wai beje pe tüpae kujinae Joas, pejjünato Joacaz, Israel piaja reinü. ²⁶ Itsi kuene liwaisianü Amasias yabara, pe tajjujjuabi kujinae pe weretsi jawabelia, taejitsipame, ?Apo yakinarubi tsaja Juda e Israel piaja reyewi bajjütota? ²⁷ Aekonojjaeta, Amasias pe wekua natsatsi kujinae Diosonü, pamonaeje tajjujjuaba pe yabara kuikuijai jawa pe pünüwelia Jerusalen jota. Bajara ponü najetabiji rewa Lakis jawabelia, pamonaeje pebijiwi tsitorobalia Lakis jawabelia pekowüwelia ajara jotalia beyajjuabatsi. ²⁸ Pamonae kanawiabarena kaballonüta y mütjütatsi piaja monaewi jota Juda piaja tomarata.