¹ Joás pejjainaenüta siete (7) pa wai beje pakujinae tajjujjuaba pe itorobanukae jawa; itoroba cuarenta (40) pa wai beje Jerusalen jota. Pena pewünü Sibia Beerseba piajawa. ² Joás Diosonü itajjutua pe jjania kuene itsi Joiada pe ponaponae matakabi, sacerdotenü. ³ Joiada ukua anija (2) wa beje, ajara ponü pejjünatoyonü yajawa pejjünatonü jjaina. ⁴ Ajara jjua kujinae, Joás na jamatabu ruta pe jjanebi nejja Diosonü piaja bo. ⁵ Kaetuata sacerdotewi, yajawa lewitawi y jumaitsije: "Kae wai kanakujitsia pa ponaename Judá piaja tomaranü jawa pane kaetuatsi nejja pe namotamatsi jawanü dajjita israel pia jiwi jawa, jjanebijitsiatsi Diosonü piaja bo. pe epijiayo tsane." Lewitawi apo itsi itsakuene jawata ajenata. ⁶ Nejjata reinu junata Joiada jawabelia, sacerdotenü, pe jumaitsi nejja: "¿De jjuitsia saya apo itorobimi lewitawi Judá yajawa israel jawerena pe kaponae nejja rena pe jumaitsi kuenia Moisés Diosonü pia jiwitonü, piaja bo nejja?" ⁷ Baitsi Atalía pejji, be akuene bejewa, bijianeta Dioso piaja bo yajawa rajuta dajjita Diosonü piaja bo jawata pe kajayabi jawanü kaenü nejja Baal monae jawabelia. ⁸ Nejjata reinü itoroba pe itsi nejja kajayo, buata ajena jonejitsia Diosonü piajo bo jawalia. ⁹ Nejjata najumetae ejjana Judá yajawa Jerusalen jawa, jiwi pe kaponae nejjarena Diosonü nejja pakuenia Moisés to ruta israel pia jiwi jawabelia petsewi ira jawata. ¹⁰ Dajjita pe itorobiwi y dajjita tomara piajiwi barüyaya kaponarena jeba kajata palata pe wünütsi jawabelia. ¹¹ Pakujinae pina kaja tó kapona rena lewitawi pekobeta, reinü piajiwi jawaberena, itsa tayabiaba ayai jawa palata, junata biaba reyenü pia jiwitonü peya yakinae nejja yajawa sacerdotenürenatsabiabi beje, kaja pe wekua jukae nejja, juta biaba ajara jjua kujinae pekowüta buatabiabalia. Pamonaeje kaematakabi kanakujitsia, kaetuata palata monae. ¹² Reinü, Joiada beje rajuta pe kaetuatsi jawanü pe jjanebiwi nejja Diosonü piaja bo. Pamonaeje junata pe katsanaewi, naejawanü pe kanakuenebiwi pe yajjanebi nejja Diosonü piaja bo, pijinia pamonae kanakueneba jiero yajawa bronce. ¹³ Nejjata pe nakuenebi nejja nakueneba, kabitsojina penakuenebiwi pe yajjanebi jawa; Pamonae Diosonü piaja bo pekowü kuenia jjanebeta pejjania kuenia yaübeta. ¹⁴ Pakujinae nakuene wereta, pe nakopatsi palata to kaponaretsi reinü yajawa Joiada jawaberena. Pa palatata itsi ejjana tapi jawanü Diosonü piaja bo nejja, pe kajayabi jawanü ofrenda pe itsi jota, kutsarilla y pewayanae jiero jawa yajawa palata. Pamonaeje tó tajuita ofrenda Diosonü piaja bo jota dajjita matakabi Joiada piasaü matakabita. ¹⁵ Joiada baja perujunüyo, ajara jjua kujinae wekuanawiata; jjaina ciento treinta (130) pa wai beje pakujinae tüpa. ¹⁶ Mütjütatsi David piaja tomarata reyewi müjjuneneta, baitsi pejjania kuene itsi israel jota, Dioso jawabelia y Dioso piaja bo jawalia. ¹⁷ Joiada pe tüpae kujinae, Judá pe itorobiwi reinü jawaberena pona pe jjania kuene pe itsi nejja. Nejjata reinü jumetane. ¹⁸ Pamonae natsata Dioso piaja bo wekua, piaja monaewimi piaja Dioso, yaiyatae y jumekowünuta Asera piaja diosowi yajawa pejumepianü. Dioso pe anaepanae jamatabükuene tsijopatsi Judá yajawa Jerusalén pamonaeje pe itsi jjae pe bisikuene. ¹⁹ Itsi ata itorobalia profetawi pekanawiabi nejja Diosonü jawaberena; profetawi paeba Dioso pe jume liwaisi ajara pamonae yabara, pamonaeje apo jume tajetsipae. ²⁰ Zacarías, pejjünato Joiada profetanü, tsijamatabü patajopatsi Dioso pejamatabü kuene; Zacarías israel pia jiwi jawabelia jumaitsi: "Dioso raja jumaitsije: ¿De jjuitsia Dioso pe jume liwaisi jema pataneme, ajara jjua yabara jjania waetsia apo pa jinawanapaemü tsane? Diosonü pane naitajjuto jematsi jjae, pijinia paka naitajjuto jematsiana." ²¹ Baitsi jane siwa najumetanetsi; reinü pe jumeta, pamonaeje ibotonüta tsekona Diosonü piaja bo panabota. ²² JJua pe itsi jjae, Joas, reinü, apo najamatabüna pitsi kowü, pejjania kuene pe itsi jawa Joiada, pajja Zacarías, ajara ponü jawabelia. Tó beyajjuaba pejjünato Joiada. Pakujinae tüpa najebalia Zacaría, jumaitsi: "Diosonü raja tane jjuaje y kajunatsiana ne matamotsi nejja." ²³ Ajara pa wai kopia jawalia Aram piaja wajabitsaü tsimajjü ponaya Joás. Pamonae Judá yajawa Jerusalén jota pata; pamonae dajjita tomara pe itorobanübenaewi beyejeba penamotamatsi jawanü to itorobalia Damasco piaja reinü jawabelia. ²⁴ Arameowi piaja wajabitsaü atsi bitsaütoyo ponae ata tsina, itsiata Diosonü amoneyabia ejjana wajabitsaüto jjaneto jawabelia, Judá pe wekua natsatsijjae Diosonü, piaja monaewimi piaja Dioso. Pijinia pakueniaje arameowi yamatamata Joás jawabelia. ²⁵ Pa matakabita arameowi nawiabalia, Joás ayai kuenia kakuata jjuabatsi. Piaja pieniwi barajamatabü kuene natsipaeba pe beyajjuabaijjae Joiada pejjünato, sacerdotenü. Beyajjuabuatatsi pebokae jawata, y tüpa; David piaja tomarata mutjütatsi, itsiata apo reyewi mujjuneneta. ²⁶ Pamonae ra maje bara jamatabü kuene natsipaebaje ajara ponü jawabelia: Zabad pejjünato Simeat, amonitanü. Jozabad pejjünato Simrit, moabitanü. ²⁷ Pijinia pe itsi jawanü pejji jiwi, Dioso pe jume liwaisianü pe tsimujju kuikuijai jawatsi, yajawa pe nakuenebi jawa Dioso piaja bo, yakinaruba pe liwaisi reyewi piaja bájjutota. Juya Amasías, pejjünato reinü tsanukae.