¹ Siete (7) pa waita jawalia, Joiada nasaü itajuta yajawa barü kuikuijai cien (100) ponü beje pe itorobi nüanü jawabelia: Azarias pejjünato Jeroham, Isamael pejjünato Johanan, Azarias pejünato Obed, Maasias pejjünato Adaia y Elisafat pejjünato Zicri. ² Bajara pamonae junua Juda jawata kaetuata lewitawi dajjita Juda piaja tomaranü jawa, pijinia pe itorobiwi piaja bonüjawa Israel jawata, yajawa bajara pamonae pona rena Jerusalen jawaberena. ³ Dajjita pe nakaetuatsiwi barü kuaikuaijai reinü Dioso piaja bo jawata. Joiada jumaitsije: "Pa taename, reinü pejjünato raja itorobiana, pakuenia Diosonü paka jumaitsi David pejji jiwi jawabelia. ⁴ JJüa ra maje pa ejjanaenameje: Akuayabi pa bitsaütomü beje kae bitsaüto sacerdotewi lewitawi pe yawenonae otjopaewi sabado matakabita, baupa ewetsiwi tsane. ⁵ Itsa yajawünüwi reinü piaja bo jawata tsane, itsa bitsaüto nubenaena Dioso piaja bo baupata. Dajjita tomara Dioso piaja bo panabota nubenaena. ⁶ Pütsa pa joneya ejjanamae kae jiwi yo ata Diosonü piaja bo yalia, kae monae sacerdotewi yajawa lewitawi monae pe to nakuenebi wanapaewi. Pamonae jonejitsipa tsipaji pamonaeje to najjanewaeta ajara jjua nejja, itsa dajjita itsiata monae Diosonü pe jume kowünütsi nejja. ⁷ Lewita monae reinü jawabelia ya ewetsiana dajjita jawa, kae nü kanakujitsia piaja nae pe kobeta ka nukaena. "Itajju tejema jiwi ata natsi jonejinaelia bajara pa bo jawabelia, jema beyajjubianatsi. Pa yajawamüre reinü pakujinae bajaraponü jonelia yajawa pitsapae rena." ⁸ Nejjata lewitawi yajawa dajjita Juda to nakueneba dajjita pe itoirobi kuenia Joiada sacerdotenü. Kaenü kanakujitsia pita pia jiwi, pamonae peto nakuenebi nejja sabado matakabi, y pamonae pitsapajetsia ajara pa matakabita, tsipaji Joiada, sacerdotenü, apo kopatsi kae bitsaüto ata. ⁹ Ajara jjua kujinae Joiada, sacerdotenü, to ka rena pe itorobiwi jawabelia kuerebonü yajawa pe nayakaranatsi panüjji, y pepajjanetonü piaja wanümü reinü David Dioso piaja bo jawata pe bo enaejawa. ¹⁰ Joiada noba dajjita wajabitsünüanü, kaenü kanakujitsia piajanaenü yajawa kobena nubena, pe kujuawelia kujinae pe tsaweno jawabelia Dioso piaja bo jota, imojjoyo jota altar y Dioso piaja bo, matatoyorona reinü. ¹¹ Nejjata, pamonae reinü pejjinato kapona rena, reinü kuenia matajjata, pe najumetai bajjutonü rajutatsi. Nejjata pamonaeje reinü kuenia itsi tsanutsi, Joiada pejji yajawa mata kaikinatsi. Nejjata pamonae jumaitsi: "Reinü bajaya jebita asaü". ¹² Pakujinae Atalia jumetane jiwi bitsaüto pe kujinae jinae jawarena pe barüyatae jawa r einü, bajara powa tomara yaberena rena Diosonü piaja boyaberena. ¹³ Bajara powa tane, naükotsia reinü pe nukae jawa baupa naebonü mujjuneneta, pe itorobinüanü yajawa pe obiwi reinü yenepana nubena. Dajjita ira pia jiwi barüya y oba, penajjüanaebi rakata pematakaponaewi peto barüya wajianü. Nejjata, Atalia titita ukuta piaja eseto yajawa wawajai tsajjuabi: "!Pakayamajju itoroba! !Pakayamajju itoroba!" ¹⁴ Nejjata Joiada, sacerdotenü, ka rena pe itorobinüanü cien (100) pa jiwi beje pe matakajina wanapaewi wajabitsaü y jumaitsi: "Bajara pa bürüto werena pa kaponare mena; pa jiwi bajara powa pün ponena, jema beyajjuabianatsi espadata." Tsipaji sacerdotenü jumaitsi: "Pütsa pa beyajjuabame Diosonü piaja bo jawata." ¹⁵ Nejjata bajara pamonae na tijjiba bajara powa pelia nejja, bajara powa lia kaballonü piaja baupa namutualia reinü piaja bo jawalia, ajara jotalia pamonaeje beyajjuaba. ¹⁶ Nejjata Joiada na jumetane beje, dajjita tomara yajawa pijinia reinü ata, bajara pamonae Diosonü piaja tomara jitsia. ¹⁷ Nejjata dajjita tomara Baal piaja bo yabelia ponalia y tojjuabaya. Pamonaeje tojjobaba ibo jumanü Baal piajawa yajawa pejumepianü pemujjupajji tsanubena, y pamonaeje beyajjuaba Matan, Baal piaja sacerdotenü, ajarapa ibo jumanü mujjuneneta. ¹⁸ Joiada nuba pe matakaponae nüanü sacerdotewi peyawenonaewi nejja Diosonü piaja bo jota, lewitawi, David itapetatsi Diosonü piaja bo jota nejja, pe to tajuitsiwi Diosonü nejja, pakuenia yakinaruta Moises piaja bajjutota, najua baruyaya najjuana, pakuenia David itoroba. ¹⁹ Joiada itoroba pe ewetanubenaewi nejja Diosonü piaja bo baupa, kae jiwi ata apo pe najjania waetsiwi pe jone yenewalia. ²⁰ Joiada barülia pe itorobiwi cien (100) pa jiwi beje kanakujitsia, reinü pe yawenonaewi, tomara pe itorobiwi y dajjita bajara pa nakua pia jiwi. Bajara ponü reinü karunaika Diosonü piaja bo jawetsika; dajjita jiwi baupa jjaneto jawa pona rena reinü piaja bo jawata pe etsi nejja reinü piaja pepo pejjania tapita. ²¹ Nejjata dajjita nakua pia jiwi barüya, tomara pia jiwi jamata ejema. Pijinia Atalia, pamonaeje beyajjuaba espadataje.