¹ Dajjita Juda pia jiwi itapeta Uzias, pe jjainaenü dieciseis (16) pa wai beje, reinü kuene itsitsi pajja Amasias, pekowüta. ² Bajara ponü yajjaneba Elot yajawa jjanewaeta Juda. Ajara jjua kujinae, reinü piaja monaewimi jota tüpa. ³ Uzias pe jjainae nüta dieciseis (16) pa wai beje pakujinae tajjujjuaba pe itorobi jawa reinü kuenia. Bajara ponü itoroba cincuenta y dos (52) pa wai beje Jereusalen jota. Pewünü pena Jekolias; Jerusalen jota pe ponaponaewami. ⁴ Bajara ponü itsi pejjane ponae kuene Diosonü itajjutua, itsi jjuanü pajja, Amasias ejjana, dajjita kuene jawalia. ⁵ Bajara ponü najamatabü ruta pe jaitsi nejja Dioso jawabelia pa matakabita Zacarias itobora, yapütaya pe jumekowünütsi nejja Dioso. Pakujinae bajara ponü jaita Diosonü, Dioso yawenonatsi. ⁶ Uzias barünabeyopalia Filisteowi. Bajara ponü jjubaya Gat tomara pe yanaitajjatatsi jawa, Jabnia y Asdod; nakueneba tomaranü Asdod nakuata Filisteowi tutujuta. ⁷ Dioso yawenona pebarünabe jota filisteowi, arabe monae pe jinawanapaewi Gurbaal yajawa meunitawi. ⁸ Amonitawi matamota Uzias jawabelia, dajjita wünü tanetsi, Egipto jawabelia ata, tsipaji bajara ponü bitso ayainü tsaponae. ⁹ Pijinia, Uzias nakueneba Jerusalen jota ibo jawanüta atjübüwetsika pe naitajjuto kaewetsi nejja, baupa petoroto jota, baupa ibo korotusato jawata, yajawa pe yanakaranatsi kopiatalia, tjijai ejjana. ¹⁰ Bajara ponü nakueneba ibo jawanüta atjübüwetsika pe naitajjuto kaewetsi nejja petsewi irata, kua ayai mütjüanü mera nejja, tsipaji bajara ponü jjaina ayai baka bitsaüto, pe sanabo irata pijinia wayafo jawata. Bajara ponü pe to ubiwitsi pe to nakuenebiwitsi uwanaenü unu tiribota yajawa piaja irata pe narubi jawata, tsipaji pepo pe ubijitsi paenü. ¹¹ Pijinia, Uzias jjaina piaja wajabitsaü pe nabewi nejja ponabiaba pe bitsaüto kanakujitsia, dajjita namata jjuta jjaniawaetsia, namata jüta Jeiel, pe yakinabiabinü, yajawa Maasias, pe itorobinü, matakaponatsi Hananias, pepo pitorobinü reinü. ¹² Dajjita pe matakaponaewi piaja monae jiwi kanakujitsia, wajabitsaünüanü, dos mil seisciento (2 600) ponü beje. ¹³ Pe itorobiwi, itsa wajabitsaü tresciento siete mil quiniento (307 500) ponü beje pe nabewi ayai kueneta peyawenonae nejja pekuayawi reinü. ¹⁴ Uzias ejjana bajara pamonae nejja- dajjita wajabitsaü nejja- peyanakaranatsi jawa, kuererebonü, pe namatajjatatsi jawanü, pe kayenae pananü, bitsabianü, yajawa ibotonü pe bijja bajarabi nejja. ¹⁵ Jerusalen jota, nakueneba makinanü, pe yapütaewi pe nakuenebi jawa, atjübütatsi y peyanakaranatsi jawata pe nobi nejja, pe bijja bajarabi nejja jjuatabonü iboto jjanetonü. Dajjita nakua jawa wünü taerutatsi, tsipaji bitso yawenonatsi pepo bitso ayainü nejja. ¹⁶ Baitsi naje pakujinae Uzias bitso ayainü naejjana, natsita ayai tsajinae nejjata pebijia kuene ejjana; Diosonü apo jume kowünütsi, piaja Dioso, tsipaji bajaraponü joneyojopa Diosonü piaja bo jawata pe tajuitsi nejja petujjujjuwi jawa ibo jawata tsajota tajuita biaba petujjujjuwi jwa. ¹⁷ Azarias, sacerdotenü püna jopalia, yajawa ochenta (80) pa sacerdotenü beje pe aitatsakanüanü. ¹⁸ Pamonaeje apokopatsi Uzias, reinü, jumaitsije: "JJamü raja, Uzias, akuenebi netajuitsi jawa pe tujjudere ekae jawa Diosonü nejja, sacerdotewi nejja raja, Aaron pejji, pamonae ü jjua nejja natsata pe tajuitsi jawa petujju dere ekae jawa. Pitsaparemelia jota wekuaje, tsipaji apo jume kowünütsinü Pejjania kuene Diosonü apo katae. ¹⁹ Nejjata, Uzias anaepana. Bajara ponü waetabanuka pe tujjudere ekae nae pe tajuitsi nejja. Pe anaepanae jawata sacerdotewi, sacerdotewi itabü nejewa itapatjai tsabanaya Diosonü piaja bo jawata, Pe tajuitabiabi jawata petujjudere ekae jawa mujjuneneta. ²⁰ Azarias, sacerdotewi mata kaponaponaenü, dajjita itsa sacerdotewi yajawa tane, naükota, pe itapa tsabanae jawatsia. Pamonaeje epijiyo juta jjua rena. Bajara ponü pijinia epijiyo pitsata ba rena, tsipaji Diosonü domae tsijjuabatsi. ²¹ Uzias, reinü, tsabanaya petüpae jawabelia sajinaya bo jawata ponaponaya ejjanatsi pe tsabanae jawa pe kajüpae jjaetsi, tsipaji Diosonü piaja bo jota kaükuta jjuabatsi. Jotam, pejjünato, nuka reinü piaja bo jawata yajawan itobora bajara pa nakuata. ²² Itsa kuene jawanü Uzias yabara, pe tajjujjuabi kujinae pe weretsi jawabelia, rubena Isaias, pejjünato Amoz, profetanü, yakina. ²³ Nejjata, Uzias tüpa piaja monaewimi jota; pamonaeje mütjüta imojjoyo reyewi pe mütjünü jota, tsipaji pamonaeje jumaitsi: "Bajara ponü petsabanaenümü". Jotam, pejjünato, reinü naejjana pekowüta.