¹ Josafat tüpa y mütjutatsi piaja monaewimi jota David piaja tomarata; pejjünato Joram, pekowüta reinü naejjana. ² Joram jjaina piaja monae, pejji Josafat: Azarias, Jehiel, Zacarias, Azaryahu, Micael yajawa Sefatias. Dajjita pamonaeje pejji Josafat, Israel piaja reinü. ³ Pajja ko kanawiatatsi ayai kuenia rajutatsi palata, oro itsa jawa penamotamatsi jawanü, pijinia nayapü karanata Juda piaja tomaranü, itsiata to kopata pe itorobi nejja Joram, tsiapaji bajara ponü matapijinü. ⁴ Pakujinae Joram tajjujjuba pajja pe itorobi nakuatami, na yaitae ejjana reinü kuenia, bajara ponü beyejeba dajjita peyapijiwi espadata pijinia ayai bitsaüto Israel jota pe matakanübenaewi. ⁵ Joram pe jjainae nüta treinta y dos (32) pa wai beje pakujinae tajjujjuaba pe itorobinü jawa reinü kuenia, itoroba reinü kuenia ocho (8) pa wai beje Jerusalen jawata. ⁶ Bajara ponü itsi tsaponaponae pakuenia itsi reimonae Israel jawata, pakuenia itsi tsawanapae piajiwi Acab, tsipaji baja ra ponü pita ponapona pejjünato Acab, bajara ponü itsi pebijia kuene Diosonü itajjutua. ⁷ Itsiata, Diosonü apo jitsipae pe werebiabi jawa David pia jiwi, pe najume kapane paejja david jawabelia; abaja ra ponü dajjita matakabi jawabelia pe yawenonaeje tsiajjae bajara ponü yajawa piaja monae jawabelia. ⁸ Pakujinae Joram itoroba, Edom anaepana piaja itorobijitsia Juda jawata, pamonae juta reinü pe itorobi nejjatsi. ⁹ Nejjata Joram barü nikabalia wajabitsaünüanü yajawa dajjita piaja karo jawanü. Merawi tsanukae pakujinae barü nabia edomitawi pamonae pikani matatoyorotatsi ajara ponü piaja wajabitsaü y karonü yajawa. ¹⁰ Bajara pakuenia Edom bara anaepana ponapona piaja itorobijitsia Juda jawata pa matakabi jawabelia. Libna ata anaepana pa matakabi jawalia pe itorobi jawa yabara, tsipaji Joram wekua natsata Diosonü, piaja monaewimi piaja Dioso. ¹¹ Apo jamatabü kajopaetsi, Joram pijinia nakueneba unu juma tsutonü jawa Juda jawata, bajara ponü itsi Jerusalen piaja jiwi pe jinawanapae nejja be penakenetsiatae nunubenaewi kuenia, Juda piaja jiwi pe bijia namutua ponaya ejjana. ¹² Kuyeleta bajjuto Dioso jumeliwaisi paebinü Elias to yakinalia Joram. Pakuenia jumaitsi twsarukaeje: "JJuaje Diosonü, David piaja Dioso, nija monaenümü, jumaitsi: 'De jjuitsia jjamü apo na ponaponaemü pa pakuenia katsu ponapona Josafat, nija apa, Asa piaja namutua ata, Juda piaja reinü, ¹³ tsipaji ponaponame pakuenia Israel piaja reyewi jinawanapa, itsimü Juda yajawa Jerusalen piaja jiwi pe itsi nejja be penakenetsiataya ejjanaewi, pakuenia itsi Acab piaja monae- de jjuitsia pijinia beyejebame neyapijiwi pakae ajja piajiwimi ata espadata, jjamü matatojjenetsiyo pekuene jjanepanaewi- ¹⁴ taema, Diosonü pepo pebijia kuene katsi jjubiana nija tomara jawabelia, nejji, ne barüponaponae wanü y dajjita nekobekowü jawa yajawa. ¹⁵ JJamü ata bitso awi taemü tsane domae yabara ne ünüta, ne ünü otjopae jawabelia domae yabara, kae matakabi kanakujitsia." ¹⁶ Diosonü tsimata jjuaba Joram filisteo monae yajawa arabe monae piaja jamatabü kuene pamonae nubena imojjoyo jawata etiope monaeta. ¹⁷ Pamonaeje tsimajju patajjuaba Juda, wekuapitatsi, kapona dajjita penamotamatsi jawanü jjua kajji baraba reinü piaja bo jawata. Pamonae pijinia kojji kaponatsi yajawa piaja wa jiwi ata. kaenü Joacaz, juyapijinü to kopatanutatsi. ¹⁸ Dajjita ma jjuaje kujinaeje, Diosonü aünü tane ejjanatsi waü apo petsi jjainae jawata. ¹⁹ Tsipata jopatsi piaja matakabi jawalia, anija wai beje kopia jawalia, ünü otjopa domae yabara, pepo pebijia wijjae ya tüpa. Piaja tomara pia jiwi pewünüta isotonü apo itajurutsi pakuenia itsi tsabaibi piaja monaewimi jawabelia. ²⁰ Bajara ponü tajjujjuba pe itorobi jawa reinü kuenia pakujinae jjaina treinta y dos (32) pa wai beje; itoroba Jerusalen jawata ocho (8) pa wai beje, kae jiwi ata apo wü najamatabü jjaina jjuabitsi. Bajara pamonae mütjüta David piaja tomarata, itsiata apo pa mütjüanü jawata reyewi nejja.