¹ JJua kujinae, Moab yajawa Amon tomara, bajara pamonaeta itsa meunitawi tsimajji nayanatsi Josafat pe barü nabe nejjatsi. ² Nejjata po narena kae jiwijji Josafat jawaberena, pe jumaitsi nejjatsi: "Piayai bitsaüto katsi majjü najetarubena tajüwerena kujinae petüpae manue mene, Edom jawerena kujina. Taema, pamonae nubena Hazezon Tamar jawata", Gadi raja jjuaje. ³ Josafat nabenajaka ajara jjua yabara jaita Diosonü. Bajara ponü jumaitsi dajjita Juda pia jiwi pe jjae yenewa itsakuene jawa ata. ⁴ Dajjita Juda pia jiwi nakaetuata Diosonü pe jumetae nejjatsi; pamonaeje jaita otjoparena Diosonü dajjita Juda piaja tomaranü jawa. ⁵ Josafat pe nakaetuana jawata Juda y Jerusalen pia jiwi nuka, Diosonü piaja bo jota, pe itapata pe jana panabota. ⁶ Bajara ponü jumaitsi: "Diosonü, waja monaewimi piaja Dioso, ?Tsipaji apo nija Dioso atjübütatsiarü? Apo ne itorobinü dajjita nakua jawa? ne kobeta dajjita kuene kapanepame, ajara jjuitsia kae jiwi ata apo ka kuene kapanepae. ⁷ Waja Dioso, ?Apo jutsimi jjamü pa nakuata pe jinawanapaemi nija tomara Israel pitabü nejewa, ne rajutsi nejja dajjita matakabi jawabelia Abraham pejji? ⁸ Pamonae ajara jota jinawanapa y ajara jota ibo jumatsuto kato ejjaneta newüta, jumaitsije: ⁹ 'Itsa pebisiakuene nakatsi jopaena- espada, naka yaliwaisibiana, o domae, o janibo tsane- pajjanü nasaütsianatsi pa bo jawataje, nitabü nejewa (Tsipaji newünü ruka pa bo jotaje) pajjanü asaüta pa nuenajü patabijiobi jota, jjamü pane jumetaename y pane asaü ejjanaename.' ¹⁰ Taema aekonojjae, jota nubenaje Amon, Moab yajawa Seir Unu tomara pia jiwi pa monae jjamü apo to kopatsimü Israel pe jonejawalia pakujinae bajara pamonae pitsaparena Egipto ira wekua; kara nata biji Israel pia jiwi wekua poneka tajü apo werebiabi. ¹¹ Taema pakuenia pamonae pane matamaba; pamonae rubena najebarüna piaja ira wekua pane jukae nejja, jjua pane rajutsi jawamü. ¹² Pa taje Dioso mü, ?Apo nekobimü tsane? Tsipaji pajjanü apo pane kuene kajüpae pata namotamatsi nejja patane tsimajjü ponaewi rena pa wajabitsaüto jjaneto. Pa jjanü apo payapütaena jjua pa itsinüjitsia, itsiata paka itajjutua tsi." ¹³ Dajjita Juda pia jiwi nubena Diosonü itabarata, atsi jiwijji, piaja wajji yajawa pejji . ¹⁴ Nejjata pena kaetuana nubenae, Diosonü pe jamatabü kuene tsipatajopatsiJahaziel, Zacarias pejjünato, Benaia pejjünato, Jeiel pejjünato, Matanias pejjünato, lewitanü, Asaf pejjünato wajawününü. ¹⁵ Jahaziel jumaitsi: "Pa jumetaema, dajjita Juda y pajjamü pane jinawanapewi Jerusalen jota, y jjamü reinümü Josafat. JJua raja Diosonü paka jumaitsije pajjamüje: 'Pa junawijitsipame; pa kuene faefaenajitsipame pa wajabitsaüto yabaraje, tsipaji pa jjamü apo pane nabe nejja, bajara jjua Dioso nejja. ¹⁶ Pajjamü merawia pa barü nabename bajara pamonae. Pa taema, bajara pamonae juna najetarubenaina Sis jawatsina. Pajjamü pa kajjitara bianame ajara pamonae jawabelia ibo korotusato kopia tareka, patsi nejewa Jeruel tsebi ira tareka. ¹⁷ Pajjamü apo panamata wenonaemü pane barü nabejawa. Pa nubenare kae jiwi kanakujitsia tsajota paka noba, rowia panubenare pa taename Diosonü pakuenia paka yawenonaena, Juda yajawa Jersalen. Pütsa pajunawame pa jamatabü kuene faefaename yajawa. merawia patsimaü otjopare, Diosonü pajjamü paka yajawa. ¹⁸ Josafat ira belia na itabara buata. Dajjita Juda yajawa pe jinawanapaewi Jerusalen jota Diosonü itabüta ira belia pe itapata jaita pe yaiyatae jjae. ¹⁹ Lewitawi, pamonae pejji tsaponae Coatitawi yajawa Coretitawi, nonobapuna Diosonü pe barüya tae nejja, Israel piaja Dioso, ayai jumeta. ²⁰ Bajayakunua pamonaeje namata koba y ponalia petsi ira Tecoa jawabelia. Pakujinae pamonae pitsapa najetarubena, Josafat nukojopa pe jumaitsi nejja: "!Pane jumetaema, Juda y pajjamü pane jinawanapaewi Jerusalen jota! pa najamatabü rure Diosonü jawabelia pa nija Dioso, pajjamü paka yawenonaena. ²¹ Pa jume jjaniajae taema Dioso jume liwaisi paebiwi jawabelia, pajjamü dajjita kuene pa jjainaename." Peyanijobi kujinae tomara piajiwi jawabelia, bajara ponü itapeta pamonae Diosonü to najjüa najetsia y pe to wawajai nejja pe ayai yabara, pakujinae pamonae pitsapaerena wajabitsaü wajünaya, yajawa jumaitsi: "Diosonü pa barüya taema, tsiapji pe jumaitsi jawa dajjita matakabi jawabelia tsane." ²² Pakujinae pamonae to najjüana y barüyatane, Diosonü itoroba pe tsimajjü otjopae nejja Amon, Moab yajawa Sier unu piaja tomara, pe tsimajjü ponaewi Juda jawa berena. Pamonae najjuaba penabe jawa. ²³ Tsipaji Amon y Moab tomara pia jiwi barü nabia Seir unu piajiwi jawabelia, pe beyejebi y pe werebeyebi jawabelia. Pakujinae pamonaeje Seir unu pia jiwi werebiaba, dajjita ü pamonae nawerebabia. ²⁴ Pakujinae Juda patajopa patajjunaeta napebeta petsewi ira jawabelia, Pamonae naükolia wajabitsaü jawabelia. Jotaje, pamonae tüpanubena, bobena ponaya; kae jiwi ata apo panepae. ²⁵ Pakujinae Josafat piaja tomara yajawa pita otjopalia pe kaponae jawa bajara pamonae, dajjita kuene kajjibarüba, pe najjatabi jawa, pe namatamotsi jawanü, wekua nota piajawanü nejja, apo pekapana pae jamatabü kuene. Akueyabi pa matakabi beje pe wekua notsi jawanü jota, ayai bitsaüto bobena. ²⁶ Ajara jjua kujinae itsa matakabianü jawabelia cuatro (4) pa matakabi beje pamonae nakae tuana Beraca ibo korotusatota. Bajara jota Diosonü barü yatane, ajara pa tajjunae pewünü Beraca ibokorotusato" ajena pa matakabi jawabelia. ²⁷ Ajara jjua kujinae pamonae nabiabeka, dajjita pebi jiwi Juda yajawa Jerusalen, Josafat namata jjaina, peponae nejja Jerusalen jawabelia barü yaya, tsipaji Diosonü bitso barüyaya ejjanatsi pekuayawi jumata. ²⁸ Pamonae ponalia Jerusalen Diosonü piaja bo jawabelia rakata najetarubena arpa, oba trompeta, taĩ, taĩ jai tsanajetarubena lira jawanüta. ²⁹ Dajjita nakua piaja reyenüanü najuna wiaka Dioso jawabelia pe jumetaeta Disonü pe nabe ejjanae jawa Israel pe kuayawi jawabelia. ³⁰ Nejjata, Josafat piaja nakua dajjita jamata ejema, tsipaji piaja Dioso jamata ejema jinawanapae ejjanatsi dajjita jiwi jawabelia. ³¹ Josafat itoroba reinü kuenia Juda jota; pe jjainae nüta treinta y cinco (35) pa wai beje tajjujjuaba pe itorobi jawa, itoroba reinü kuenia Jerusalen jota veinticinco (25) pa wai beje. Pena pe wünü Azuba, pejjünatoyo Silhi. ³² Bajara ponü pajja Asa piaja namutua pona, bajara ponü apo natsatsi; itsi Diosonü itajjutua pe jjania kuene. ³³ Itsiata, atjübü tatsi patajjunaenü apo ajibia ejjanae. Jiwi ata abajjü apo najamatabü rutsi pajja jiwi piaja Dioso jawabelia. ³⁴ Itsi kuene jawanü pe itsi jawa Josafat, pe tajjujjubi kujinae y pe kopatsi jawabelia, yakinaruba ajara pa liwaisianü Jehu pejjünato Hanani, jjuanü jjania waetaruba Israel piaja reyewi piaja bajjutonüta. ³⁵ JJua kujinae Josafat, Juda piaja reinü, najume tane Ocozias beje, Israel piaja reinü, ponüje pebisia kuene itsije. ³⁶ Na jume tane beje pe nakuenebi nejja pinijamo jjanetonü Tarsi jawabelia pe ponae nejja. Pamonae nakueneba pinijamo jjanetonü Ezion Geber jawata. ³⁷ Nejjata, Eliezeer pejjünato Dodova Meresa piajanü, Dioso pe jume liwaisi tsipaeba Josafat jawabelia; bajara ponü jumaitsi: "De jjuitsi saya yajawamü Ocaozias, Diosonü bijiana jjua ne itsi jawanü". Bajara pamo jjanetonü abeje ajara jjuitsia pamonaeje apo yaponae Tarsis jawabelia.