^{1 2 3} Josafat Juda piaja reinü jamata ejemaya nawialia Jerusalen piaja bo jawabelia. Nejjata Jehu pejj ⁴ Josafat pe ponaponaenümü Jerusalen jota; bajara ponü kaewüalia pona tomara piajiwita Beerseba jota kujinae Efrain unu nakua jawabereka, kaewüalia Diosonü jawabelia jumejjania jai tane, pajja jiwimü piaja Dioso. ⁵ Bajara ponü ira jawa noba liwaisi yapütaenüanü (Jueces) dajjita peyanaitajjatsi jawa Juda piaja tomaranü jawa, kae tomara kanakujitsia. ⁶ Bajara ponü jumaitsi liwaisi yapütaewi jawabelia: "Pa yapütaneme jjua pa jamatabü itsi, tsipaji apo pane to itsi nejja pebi jiwi, Diosonü nejja raja; Bajara ponü paka yajawa tsane pakujinae pa jamatabü itsinü. ⁷ Aekonojjae nejjata, pa najamatabü na pire Diosonü jawabelia. JJania waetsi pa taema jjua pa itsimüjitsia, tsipaji Diosonü pebisia kuene apo tsijamatabü ekaetsi, kae jiwita apo jamatabü komüatatsi." ⁸ Pijinia, Jerusalen jota Josafat yawünü noba Lewitawi bajara pakuenia sacerdotewi, pe matakajinawanapaewi Israel piaja monaewimi piaja bo jawa, pe itsi nejja pakuenia Diosonü itorobatsi pe ejjanae nejja, penajamatabü jüpae ejjanae nejja. Pamonae jinawanapa Jerusalen jota. ⁹ Bajara ponü jumaitsi, jjua itsijitsia: "Pajjamü pa yawenonaename Diosonü jawabelia pejjania jamatabü kuenia, pa jume kowünütsianame, dajjita jamatabü kuenia. ¹⁰ Pakujinae itajjutejema liwaisi paka to kaponarena pa nija monae pe jinawanapaewi pa nija tomarata, pe beyajjuabi yabara, o pa liwaisi to yakinaruta, jjua itoroba, pajjamü pane jumaitsi nejja, bajara pamonae pe nanekonitsi yenewa Diosonü itabarata, pa peka bara anaepanae yenewa pajjamü pijinia pa nija monae jawabelia. Pajjamü jjua pa itsimü tsane pane nane konitsi yenewa. ¹¹ Pa taema, Amarias pe matakaponaponaenü sacerdotewi, paka yajawa tsaponaponae dajjita Diosonü piaja liwaisita. Zebadias pejjünato Ismael, pe itoroba ponaponaenü Juda piaja bo jota, eweta ponapona dajjita piaja jawanü reinü. Pijinia, Lewitawi pa peka yawenonaewi tsane. Pa itatsakamüre y pajume kowünüre jjua paka itoroba, Diosonü yajawa tsanetsi pamonae jamatabü kuene liwaisi jjanepana.