¹ Treinta y seis (36) pa wai beje pe itorobanukaeta Asa, Baasa, Israel piaja reinu, pe ayai kuenia tsimajjulia Juda y nakuenebeta Rama, kae jiwi ata pe joneyenewa o pe pitsapae yenewa Asa piaja ira wekua, Juda piaja reinu. ² Nejjata Asa jukareka palata yajawa oro pejjania waetsi jawa Dioso piaja boo jawata, reinu piaja bo jawata, to itorobalia Ben Adad nejja, Aram piaja reinu, pe ponaponaenu Damasco jota. Bajara ponu jumaitsi: ³ "Kuikuijaitsi beje waja najamatabu jupae nejjaba, pakuenia waja beje najamatabu jupa beje. Taema, jjanu kato itorobaliatsi palata yajawa oro. Ne jamatabu jupae yenewa Baasa, Israel piaja reinu, tane jamatabu tonotsi yenewa." ⁴ Ben Adad jumetane rei Asa jawabelia ajara jjua yabara itorobalia pemata kajinawanapae wajabitsau nuanupe tsimajju ponae nejjalia Israel piaja tomaranu. Pamonaeje tsekoneta Ijon, Dan, Bel Main y Neftali piaja tomaranu tsajota pe jjainaejawanu jjenawaetejeba. ⁵ Pakujinae Baasa jumetane jjuaje, penakuenebi jawa Rama nakobe kopata, penakuenebi jawa nakobe kopatsia ejjana. ⁶ Nejjata Asa reinu kalia dajjita Juda pia jiwi. Pamonaeje kapona ibotonu yajawa nae jawanu Rama wekua ajara jjuanuta Baasa pe nakuenebetsi nejja tomara. Nejjata reinu Asa ajara jjua jawanuta nakuene banuta Geba yajawa Mizpa. ⁷ Ajara pa matakabi jawalia Hanani pe wajunayabelia pe taenu lia Asa jawabelia, Juda piaja reinu, pe jumaitsi nejja: "De jjuitsia saya jjamu jjania jai tame reinu Aram, y apo jjania jai tame Diosonu ta nija Dioso, reinu Aram piaja wajabitsau monae baja apo kajume kowunutsi. ⁸ Apo ayai wajabitsauto jjaneto Etiope y libio monae , karo yajawa kaballonuta monae? Itsiata dejjuitsia apo najamatabu rutsimu Diosonuta, Bajaraponu ka amayebia ejjana ajara pamonae jawabelia. ⁹ Tsipaji Diosonu pitajjuto taene dajjita nakuanu, pe tsitajutsi nejja pesau pamonae jawabelia pejjania kuenia najamtabu ruta bajaraponu jawabelia. JJamu baitsi jane jjaniawaetsi apo itsimu jjuaje, aekonojjaeta kujinae, nekuayabi jjainaename." ¹⁰ Nejjata Asa bara anaepana pe wajunaeyabelia petaenu jawabelia; nanekonitsia ejjaneta, tsipaji bara anaepana pejumaitsi jjaetsi. Bajara pa matakabi jawalia, Asa pebisia kuene itsi tomara pia jiwi jji jawabelia. ¹¹ JJua Asa itsi, pe tajjujjuabi kujinaeje pe kopatsi jawabelia, yakinaruba piaja bajjutota Juda yajawa Israel piaja reyewi. ¹² Treinta y nueve (39) pa wai beje kujinae pe itorobi jawa reinu kuenia, Asa romaebatsi petajju jawata; piaja domae bitso ayai kuene. Itsi ata, bajaraponu apo na wajukae Diosonu jawabelia, u pewaubiwi jawabelia saya. ¹³ Asa nawiata piaja monaeta; bajaraponu tupa cuarenta y uno (41) pa wai beje pe itorobanukae kujinae reinu kuenia. ¹⁴ Pamonae buata mutjuta piaja kuata pe nato kueyabuatsi jawata David piaja tomarata. Bajara pamonae buata pe jjania tujju dere ekae jawata yajawa dajjita kuene wiriajawa pe itsi jawa pe yaputaewita. Nejjata pamonaeje itajurutaeta isoto jjaneto bajara ponu pewunuta.