¹ Dioso pe jamatabu kuene tsi patajopatsi Asarias Obed pejjunato. ² Bajara ponu kajjitajaraba jopalia Asa jumaitsi ajara ponu jawabelia: "Ne jumetaema, Asa, dajjita Juda yajawa Benjamin piajiwi: Diosonu kayajawa, pa matakabi jjamu yajawamu bajara ponu. Itsa jaitsianame, kajjitajara bianame; itsa jane jjamu wekua natsatsianame bajara ponu, bajaraponu apo ka wekua natsatsiana. ³ Bajaya kujinae, Israel Dioso nejewa jinawanapa, sacerdotenu pekujaraubi nejjatsi y pematabu kuenia jinawanapa. ⁴ Itsiata pakujinae jamatabu kuene bujai, pamonaeje Diosonu jawabelia najamatabu ruta, Israel piaja Dioso, jaita, pamonaeje kajjitaraba. ⁵ Pa matakabianu jawabelia ayapu beje bitso pe ponaewi nejja itsa jawabelia, o pe patsiwi nejja; ayai kuene pe jinawanapaewi pa nakuataje. ⁶ Dajjita itsa nakuanu, tomaranu, amaneyabatsi, tsipaji Dioso bijiobia ejjanatsi dajjita kuene jawanuta. ⁷ Itsiata pa najamatabu saure, pa akuene saumure putsa pa kobe faefaetame, tsipaji panenakuenebi jawa matamo pitsianame. ⁸ Pakujinae Asa jumetane pa jumenuje, Azarias Dioso jume liwaisi pe paebijawa, pejjunato Dioso pe jumeliwaisi pe kaponaenu Obed, bajaraponu nakuene sauta Juda y Benjamin piaja ira wekua tijjita pe bisia kuene jawanu, yajawa pa tomaranu bajara ponu wekua nota dajjita unu jawa Efrain, bajaraponu yajjaneba Diosonu pa ibojumata to tajuitabiaba, jjua Diosonu piaja bo pe jone itapata nuka. ⁹ Bajara ponu kaetuata dajjita Juda yajawa Benjamin pia jiwi, pamonae ajara jota nakopaba, Efrain, Manases y Simeon pia jiwi. Tsipaji pamonaeje Israel jawerena ayai bitsauto ponarena, pakujinae tane Diosonu, piaja Dioso yajawatsi. ¹⁰ Nejjata, Jerusalen jawata nakaetuata, akueyabi jumetota, quince (15) pa wai beje Asa pe itorobanukae kujinae. ¹¹ Ajara pa matakabi Diosonu nejja to tajuitejeba pe yajawunu yakajurubi jawanu pekaponae jawanu rena: Seteciento pa toro jjaneto beje y siete mil pa obeja beje yajawa kabra jawanu. ¹² Bajara pa monae Diosonu jawabelia pacto ejjana peajitsi nejja Diosonu, piajamonaewimi piaja Dioso, dajjita pe jamatabu kuenia yajawa pe najamatabu jjainae kuenia. ¹³ Pamonae najume taena itajjutejema jiwi ata apo jume jjaniajai tae Diosonu jawabelia, Israel piaja Dioso, tupaena, pewajjinu ata o pekunuanu ata, petiriwa o pebi ata. ¹⁴ Pamonaeje Diosonu jawabelia ayai jumeta dajjita matakabi jawabelia pe jume kowunutsi nejja, wawajaiya, oba pemata etonuta. ¹⁵ Dajjita Juda pia jiwi baruya jjua yabara, tsipaji pamonaeje dajjita jamatabu kuenia pejume kowunutsi nejja, jaitabiaba Dioso ayai kuenia, pamonaeje kajjitaraba. Diosonu dajjita jawa pejjania kuenia jinawanapae ejjana. ¹⁶ Pijinia tijjita Maaka, piaja akue, pe itorobiwa kuenia, tsipaji ajara powa pe ayai jumepe Asera jawa itsi tsanutsi. Asa jjuabaya pe jumepe katanutsi jawa, puruba beyeta yajawa tajuita Cedron naejeto jawata. ¹⁷ Baitsi jane atjubuyo pa tajjunaenu apo ajibia ejjanae Israel jawata. Itsiata, Asa najatabu kuene jjanewaeta dajjita matakabi jawabelia. ¹⁸ Bajara ponu ka rena Dioso piaja bo yaberena pajjami pekobekowuanu piajawanu yajawa jjuanu Diosonu piajanu: oro yajawa palata jawanu. ¹⁹ Be beliyo ajibi nekoni matapania treinta y cinco pa wai beje pe itorobanukae kujinae Asa.