¹ JJua maje itsije, pakujinae Roboam piaja nakua jawata reinü kueneta nakopatanuka yajawa akuene saü, Diosonü pe liwaisi kopatojopa, dajjita israel pia jiwi yajawa. ² Cinco (5) pa wai beje pe jjainaeta Roboam reinü kuenia, Sisac, Egipto piaja reinü, tsimajjü rena Jerusalen, tsipaji tomara pia jiwi apo jumekowünütsi Diosonü jawabelia. ³ Bajara ponü ka rena mil dosciento (1200) pa karo beje y sesenta mil (60 000) ponü beje kaballonüta. Piayai bitsaüto jjaneto wajabitsaü barü rena Egipto jawerena: Libio pia jiwi, suquieno pia jiwi, yajawa etiopewi. ⁴ Bajara ponü junua peya naitajjatatsi tomaranüta piajawa Juda yajawa rena Jerusalen jawaberena. ⁵ Ajara jjua kujinae, Semanias Dioso jume liwaisi paebinü, Roboam taeyojoparena yajawa pe itorobiwi Juda jota pe nakaetuatsiwi Jerusalen jota Sisan pe jamatabü kuenia. Semanias jumaitsi ajara pamonae jawabelia: "JJua ramaje Diosonü jumaitsije: 'Pajjamü pane nakofunütame, nejjata JJanü Sisac pe kobe jawabelia paka kopatsianatsi.'" ⁶ Ajara jjua kujinae Israel piaja reinü pejji yajawa reinü nabijiobita y jumaitsi: "Diosonü bitso pe robia ponaponaenü." ⁷ Pakujinae Diosonü tane pamonaeje pe najamatabü biobitsi jawa, Diosonü peliwaisi tsijamatabü patajopatsi Semanias, jumaitsije: "Pamonaeje najamatabü bijiobita. JJanü apo werebiabinü tsane pamonaeje; JJanü bewelia wajüto yawenonaenajü, ta anaepanae jawa Jerusalen apo tsijopae tsanetsi pe kobeta Sisac. ⁸ Itsiata, pamonaeje piaja pieniwi tsane, yapütajetsia pakujinae nejume jjaniatane, yajawa piaja pieniwi itsa nakua wi pe itorobiwi. ⁹ Nejjata Sisac, Egipto piaja reinü, tsimajjü rena Jerusalen pia jiwi to nota pe namatamatsi jawanü Diosonü piaja bo jota, yajawa pe namatamatsi jawanü reinü piaja bo jota, Bajara ponü dajjita kapona; pijinia kapona penakaranatsi jawa Salomo pe itsi oro jawa. ¹⁰ Reinü Roboam itsi juya bronce jawanü tsikobe ruba pe matakajinawanapaewi pewetsiwi, pamonae ya baupa eweta biaba reinü piaja bo jota. ¹¹ Kae joneyabiabi kujinaelia pina reinü Diosonü piaja bo yalia, pe ewetanubenaewi yenerabiabalia; pamonae kaewua kaponabiabarenape ewetanubenaewi piaja bo jawa berena. ¹² Pakujinae Roboam na jamatabübijiobita, Diosonü pe anaepanae jawa to kaewatsi, pe werebia nejja jawa; pijinia itsa kuene jawayo nakopata pejjania kuene pe tsitajütsi nejja Juda. ¹³ Nejjata reinü Roboam ajamatabü kuene saü pe itorobanukaenü Jerusalen jota, bajara pakuenia itoroba. Roboam cuarenta y uno (41) pa wai beje pe jjainaenüta tajjujjuaba pe itorobi jawa reinü kuenia, itoroba diecisiete pa wai beje Jerusalen jota, pa tomara Diosonü itapeta dajjita tomara Israel wiriawi tutujuta bajara ponü pe wünü yaiyatae nejjatsi bajara jota. Pena pewünü Naama, amonitawa. ¹⁴ Bajara ponü itsi pebisia kuene tsipaji apo najamatabü rutsi pe jaitsi nejja Diosonü. ¹⁵ Itsa kuene jawanü yabara pe liwaisi Roboam, pe tajjujjuabai kujinae pe weretsi jawabelia, ?Apo yakinarubi Semanias piaja bajjutonüta Dioso jume liwaisi paebinü, Iddo pe wajünaya pe taenü, pe ya yakinarubinü piaja monaewi kanakujitsia yajawa pe nabe nunubenae jawa Roboam y Jeroboam? ¹⁶ Roboam tüpa piaja monae jota y mütjütatsi David piaja tomarata; Abias pejjünato reinü kuene naejjana pe kowüta.