¹ Mwebyo rhudesire ecinwa cikulu ceci: Rhugwerhe omudahwa mukulu otamire ebwa kulyo kw'entebe y'obukulu bwa Nnamahanga omu mpingu. ² Mukozi wa ahantu hacire,n'owe ciralo c'okuli cayubakagwa na Nnahano,ci arhali n'omuntu. ³ Bulya ngasi mudahwa ayimikwa mpu akarhula entulo n'enterekero,co cirhumire naye akwanine abe n'eci anakarhula. ⁴ Yesu acibaga wenigulu, arhankabire mudahwa, bulya hali abadahwa barhula entulo nkoku birhegesirwe. ⁵ Ci ebi bajira biba lwiganyo na cizugululu c'ebyomu mpingu.Nkakulya Musa abwiragwa na Nnamahanga erhi:"Sinza,ojire byoshi oku lwiganyo wayeresirwe oku ntondo". ⁶ Ci oburhumisi Kristu ahabirwe bulushire,kulya kuba endagano aba mulagizi wayo erhi nyinja kulusha,n'eciragane eyegemire ciri cinja kulusha. ⁷ Bulya endagano ntanzi ecibaga erhalikwo ishembo, harhankabire igwarhiro ly'okulonza eya kabirhi. ⁸ Kali erhi abagaya lyadesire: Ala ensiku ziyiruka,kwo Nnahano adesire, nakola nalaganana endagano mpyahya n'enyumpa y'Israeli n'enyumpa ya Yuda. ⁹ Eyo ndagano erhabe nkerya nalagananaga na bashakuluza babo bulya nabagwarhirhaga oku kuboko nti mbakule omu cihugo c'e Misri.Kulya kuba barhaseraga oku ndagano yani, nani ntacibashibiriraga, kwo Nakasane adesire. ¹⁰ Alaga endagano nalagana n'enyumpa y'Israeli enyuma lyezo nsiku,kwo Nnakasane adesire:Naheba amarhegeko gani omu nkegero zabo, mbayandike go omu mirhima, nnambe Nnamahanga wabo, nabo babe bantu bani. ¹¹ Ntaye waciyigirize omulungu wage na ntaye wayigirize mwene wabo aderhe erhi:''Manya Nnakasane".Bulya kurhenga omurho kuhika omukulu,boshi bamanya. ¹² Neci na babalira obubi bwabo, n'ebyaha byabo ntakacibikengera bundi. ¹³ Omu kuderha "endagano mpyahya",entanzi ayijijire nkulukulu,n'akantu kakashaja n'okuba kakulukulu erhi kalingihererekera.