¹ Oyo Melikisedeki, mwami w'e Salemu,mudahwa wa Nnamahanga w'Enyanya ajibuganana n'Ibrahimu warhengaga emunda ahimiraga abami anamuha obwanga. ² Ibrahimu amuha ecigabi ca kali kumi c'ebintu byage byoshi.Aderhwa burhanzi mpu mwami w'obushinganyanya,kandi mpu mwami w'e Salemu,kwokuderha mwami w'omurhula. ³ Arhajira Ishe,arhajira na nnina,n'omulala gwage ntaye oguyishi,ensiku zage zirhajira murhondero,n'obuzine bwage burhajira buzinda.Oyo Melikisedeki washushanyibwe na Mwene Nnamahanga,oyorha aba mudahwa ensiku n'amango. ⁴ Mulolage oku ali mukulu oyo shakuluza wirhu Ibrahimu arhulaga ecigabi ca kali kumi c'ebintu binjinja ashokolaga abami. ⁵ Erhi kwo anali,bulya omu bene_Lawi nabo bahirwe obudahwa bajira irhegeko ly'okurhulwa n'olubaga ecigabi ca kali kumi,kwo kuderha muli bene wabo,n'obwo nabo bali cisike c'Ibrahimu akabo. ⁶ Ci oyo arhali wa mulala gwabo, arhulwa n'Ibrahimu ecigabi ca kali kumi, anamuha obwanga,n'obwo yewaligwerhe endagano ya Nnamahanga. ⁷ Ntaye ohabire oku omurho ye ogishwa n'omukulu. ⁸ Nakulush'okwo,abo bantu barhulwa entulo y'ecigabi ca kali kumi,kufa bafa,ci oyo yehe badesire oku ali muguma muguma. ⁹ Ciru rhwaderha nti Lawi yene orhulwa ecigabi ca kali kumi,ye wacirhuzire erhi Ibrahimu akujira, ¹⁰ bulya Lawi aciri nka mburho omu mubiri gwa shakuluza wage erhi Milikisedeki ajirimanana naye. ¹¹ Akaba obudahwa bwa bene_Lawi bwali bwimana (bulya kuli bo olubaga lwahabirwe amarhegeko),cacirhumaga owundi mudahwa oli aka Melikisedeki aciyisha, canarhumaga barhaderha oku ali aka Aroni? ¹² Bulya obudahwa bwahindusire,kukwanine amarhegeko nago gahinduke. ¹³ Bulya oyo baderhire ebyo ali wa bundi buko na ntaye w'obwo buko wahisire aha barherekera. ¹⁴ Na ntaye orhayishi oku Nnawirhu okucisina ca Yuda,na ntaco ciyerekine obudahwa Musa adesire kuli obwo buko. ¹⁵ Ciru okwo rhudesire kulushirize obwalagale bulya hayishire owundi mudahwa oli aka Melikisedeki. ¹⁶ Oyo arhajiragwa mudahwa n'irhegeko ly'abantu lishimba iburha ly'omubiri,ci n'obuzibu bw'obuzine burhahwa. ¹⁷ Bulya ye kuderhirwe mpu: "Oli mudahwa ensiku n'amango aka Melikisedeki." ¹⁸ Ntyo kwo irhegeko lya burhanzi lyarhenzibwe,bulya lirhagwerhi nsimiko lirhanagwerhi kamole. ¹⁹ Nta kantu irhegeko lyajizire kimana,ci lyali nshokolezi y'obulangalire bulushire uburhuha okuyemera Nnamahanga. ²⁰ N'ecilushire kandi okwo kurhajirwa buzira mwigasho.Abandi bahindusire badahwa buzira ndahiro. ²¹ (bulya abandi bali badahwa buzira mwigasho,ci yehe haguma n'omwigasho bulya ye amubwiraga, "Nnahano acigashire arhakanagalula akanwa kage: 'Oli mudahwa w'ensiku n'amango' ". ²² Nantyo Yesu ali mweza w'endagano elushire. ²³ Kandi abandi bali badahwa banji bulyala olufu lurhazigaga bayorha ensiku zoshi. ²⁴ Ci yehe bulyala abaho ensiku n'amango, ubudahwa bwage burhakahwa. ²⁵ Cocinarhumire anahashiciza lwoshi abayegera Nnamahanga oku burhabale bwage bulya aba azine ensiku n'amango mpu abasengerere. ²⁶ Neci, ntyo kwo byali bikwanine rhube n'omudahwa mukulu, mwimana mweru_kweru, orhali kwo ishembo, orhalukira haguma n'abanya_byaha, oli omu nyanya kurhaluka amalunga. ²⁷ Yehe nta bulangalire agwerhe, aka abandi badahwa bakulu b'okurhula enterekero ngasi lusiku, burhanzi oku byaha byage yene, n'oku byaha by'olubaga, okwo akujizire caligumiza erhi acihana yene nterekero. ²⁸ Bulya irhegeko linayimike abantu bazamba mpu babe badahwa bakulu, ci akanwa k'omwigasho kayishaga enyuma ly'irhegeko, kayimisire Mugala wa Nnamahanga, kamujira mwimana ensiku n'amango.