¹ Co cirhuma,enyigirizo kuli Kristu zikwanine abacirhonderha,rhwarhagizileka,nti rhurhereme kuhika enyigirizo zabimana rhurhanacishimbaga rhwagaluka galuka omu bigabi by'enyigirizo z'omurhondero;enyigirizo z'okuciyunjuza oku bijro by'olufu n'ezokuyemera Nnamahanga, ² enyigirizo z'obubatizo, n'ezokulambulirwa amaboko, oku irhwe ezobufuke bw'abafire, n'ezo olubanja lw'ensiku n'amango. ³ Kwo rhwajira ntyo akaba Nnamahanga arhuyemerire. ⁴ Neci kurhankahashikana balya barhanziribona obulangashane,barhazirinunirwa n'enshokano y'empingu banashangira Muka Mwimana, ⁵ balya barhazirinunirwa na kanwa kinja ka Nnamahanga n'emisi yeri igulu luayisha, ⁶ banagalihirima,birhankahashikana okushibahindula n'okubalera omu njira y'obuciyunjuze,kulya kuba nabo kandi oku bwabo badwire babamba Mugala wa Nnamahanga oku musalaba n'oku mubonesa nshonyi embere z'abantu. ⁷ Bulya obudaka bwanywire amishi g'enkuba yabunirekwo kanji, bukayerakwo emburho zikwanine, balya babuhingaga bunahabwe obwanga bwa Nnamahanga. ⁸ Ci obuburha emishugi n'amarhadu bwanalahirwa,erhi bunali hofi bwenene buhehererwe na buzinda babudulike muliro. ⁹ Ci mwehe bira bani,ciru rhukaderha ntyo rhumanyire oku muli omu bwemere bwinja kulusha n'obukwanine obucire. ¹⁰ Bulya Nnamahanga erhali ndyalyalya kuhika ayibagire omukolo gwinyu n'obuzigire mwayerekine oku izino lyage,bulya mwakolire abatakatifu munacidwire mwakujira. ¹¹ Ciguma cone rhucifinjire,nti ngasi muguma muli mwe ayerekane obwo bushiru lyo obulanalire bwinyu buyunjula kuhika okubona ebi mulangalire. ¹² Nantyo ahali hokuba bolo muyige balya bayima omu ndagano za Nnamahanga balya baziyemire banaziseramwo. ¹³ Neci erhi Nnamahanga alaganana n'Ibrahimu,bulya nta mukulu kumulusha ankalahire,acilahira yene. ¹⁴ Aderha erhi: "kobinali nakuha obwanga,n'akuyololosa oyololoke." ¹⁵ Na ntyo Ibrahimu acihangana abona eyo ndagano. ¹⁶ Abantu nkabalahira obakulire ye balahira,n'endahiro yo emala ngasi kadali ekarhi kabo. ¹⁷ N'eco cocarhumaga Nnamahanga, erhi alonza ukumanyisa bwinjinja emimo y'endagano, oku eciragane cage cirhankahindamuka acigasha. ¹⁸ Mpu lyo ebyo bijiro bibirhi birhankahinduka__na ntako Nnamahanga ankahashinywera muli byo__birhukomeza omurhima rhwe rhwabwine olwakiro omu kusera oku bulangalire rhwahabirwe. ¹⁹ Obwo bulangalire rhubugwerhe nka mutugo gutunga omurhima gwirhu,mutungo gw'okunali na muzibu guhika omu lusika. ²⁰ Aho ho Yesu arhujirire nka mushokolezi,erhi ahinduka mudahwa mukulu aka Melikisedeki ensiku n'amango.