V 1 Obwemere buli ciginja c'eb rhulangalire buli cimanyiso c'ebi rhurhabona. ² Bwo bwarumire abakula_mbere birhu babona obuhamirize bwinja. ³ Bwemere burhuma rhwayunva ou igulu lya lemagwa uku luderho lwa Nnamahanga,na ntyo ebiboneka byarhengaga omu birhaboneka. ⁴ Bwemere bwarhumaga Abeli arhula Nnamahanga enterekero elushire eya kaini;bwarhuma aderhwa mushinganyanya,erhi Nnamahanga yene ahamiriza oku ayankirire entulo zage;bwo burhuma aciderha kuhika buno n'obwo afire. ⁵ Bwemere bwarhumaga Henoki ahekwa mpu alekibona lufu, "arhanacibonekaga bulya Nnamahanga ali erhi amuhesire."Neci embere ahekwe ali erhi aderhirwe obuhamirizi oku asimisize Nnamahanga. ⁶ Bulya owalonziyegerera Nnamahanga,arhegesirwe ayemere oku ho aba n'oku ahemba abamulonza. ⁷ Bwemere bwarhumaga Nuhu erhi aba amamanyisibwa ebirhacibonekana ayunva obwoba bw'okukenge kuli Nnamahanga,anabinja obwarho mpu lyo afumya omulala gwage.N'obwemere bwage ayigiriza igulu,ana hinduka mwimo gw'obushinganyanya bulerwa n'obwemere. ⁸ Bwemere bwarhumaga Ibrahamu ayunva izu lya Nnamahanga lyamubwiraga mpu agende aje omu cihugo ali ayishiyimamwo.Agenda arhanamanyiri ahaja. ⁹ Obwemere bwarhuma ajiyibaka omu cihugo alaganyizibagwa nkoku ishwa lya bene,abera omu bihando n'Izaki na Yakobo,yo mimo y'eyo ndagano akage. ¹⁰ Ajira ntyo,bulya akagi linda olugo luhumbirwe eciriba na Nnamahanga,mpu yene alugwike analuyubake. ¹¹ Bwemere bwarhumaga Sara naye abona obuhashe bw'okuyalala n'obwo amango gage gali erhi gagezire.Bulyalya ali acikubagire owamulaganyagya. ¹² Nantyo omu nda ya muntu muguma wali okola nka mufu,mwarhenga iburha linji nka nyenyezi z'omu malunga na nka mushenyi gw'eburhambi bw'enyanja,gulya gurhankagajwa. ¹³ Abo boshi omu bwemere bafire buzira okubona ebi balaganyabagwa,ci balilangalirire kuli banabilamusa,banahamiriza oku bali bigolo na bagenzi en'igulu. ¹⁴ Abo bashambala ntyo bayerekana n'obwalagale oku badwire balonza okuhika emw'ishe. ¹⁵ N'acibaga bakubulaga emunda barhengaga bankabwine obulyo bw'okuyishubira. ¹⁶ Ci lero bakolaga bacifinjire ecihugo cinja kulusha,eyo mpingu.Okwo kwo kurhuma Nnamahanga arhaba wabo;bulya abarheganyize olugo. ¹⁷ Bwemere bwarhumaga Ibrahimu erhi Nnamahanga amurhagula ahana Izaki nterekero,n'obwo ali mugala muguma oyo ahanaga nterekero,ye wanali mubisi w'eciragane. ¹⁸ Yewabwiragwa," muli Izaki iburha lyawe lyahamagalwa." ¹⁹ Ibrahimu alimanyire oku Nnamahanga anahashifula abafu;co carhumire ashubibona omugala anahinduka lwiganyo. ²⁰ Bwemere n'ebyayishiyisha byarhumaga Izaki aha Yakobo n'Esau obwanga. ²¹ Bwemere bwarhumaga Yakobo,erhi aba akola ali bufa aha ngasi mwene Yosefu obwanga,aharamya erhi ayegemire akarhi kage. ²² Bwemere bwarhumaga Yosefu erhi akola afa akengeza bene _Israeli oku barhenge e Misri anababwira oku bajira orhuvuha rhwage. ²³ Bwemere bwarhumaga ababusi ba Musa bamufulika myezi isharhu erhi ayusiburhwa,bulya bali babwine oku oyo mwana ali mwinjinja barhayobohaga irhegeko lya mwami. ²⁴ Bwemere barhumaga Musa erhi akula,alahirwa okukaderhwa mugala wa mwali wa Farao. ²⁵ Asima okulibuzibwa haguma n'olubaga lwa Nnamahanga kulusha okubona amasime g'ecaha ga nsiku nsungunu. ²⁶ Abona okujacirwa Kristu orhumire buli buhirhi bulushire amagale g'abanya _Misri goshi bulya ali alangalire oluhembo. ²⁷ Bwemere bwarhurhezagya e Misri buzira kuyoboha obukunizi bwa mwami,azibuha aba nk'obwine Orhabonekana. ²⁸ Bwemere bwarhumaga ajira pasaka anashahiza omuko,lyo kaheza arhahume oku bana b'enfula b'Israeli. ²⁹ Bwemere bwabayikizagya Enyanja ndukula nkidaho lyumu.Nabo banya_Misri mpu bacigereka bamirwa n'amishi. ³⁰ Bwemere bwarhumaga ebyogo bya Eyeriko byahongoka erhi bamabizunguluka nsiku nda. ³¹ Bwemere bwarhumaga Rahabu w'omugonyi arhaherekera haguma n'entunva,bulya ayankiriraga abahenguzi n'obuholo. ³² Bici na ciderha?Bulya akashanzi kanambulira erhi nankaganira olwa Gideoni,na Baraki,Samsoni,Yefta,Daudi,Samweli,n'abalebi. ³³ Abola bwemere bwarhumaga bahima amami bajira, ebishinganine,babona omuhigulo gw'ebyalaganyibagwa.Bashweka orhunwa rhw'entale, ³⁴ bazimya engulumira z'omuliro,bafuma obwoji bw'engorho,bahima endwala,baba ntwali omu ntambala,balibisa emirwe y'abashombanyi. ³⁵ Abazire bagalulirwa abana babo bali bamofa.Baguma balibuzibwa kuhika okufa,balahira okulikuzibwa,mpu lyo babona obufuke bwinja kulusha. ³⁶ Abandi balembire amasheka n'eminyuli,ciru n'omugozi n'empamikwa. ³⁷ Babandwa amabuye,balibuzibwa,bakerwa n'omusumeni,bagera omu bwoji bw'egorho,bakagija zuguluka zuguluka,bayambala empu z'ebibuzi n'ez'empene,ciru barhacirhigwerhe kantu,balibuzibwa, bakolerwa buligo. ³⁸ Igulu lirhali libakwanine.Bakagija zuguluku zuguluka omu mpinga n'omu ntondo,omu nkunda n'omu nyala z'idaho. ³⁹ N'abo boshi n'obwo bali baderhirwe obuhamirizi obwemere bwabo burhumire arhali bo bacibwine eci balaganyibagwa. ⁴⁰ Bulya ala Nnamahanga ali arhubikire iragi linja kulusha,lyo barhakihika okubwimana buzira rhwe.