¹ Kulya kuba amarhegeko gali cizunguzungu c'aminja gayisha,ci arhali ebyo bintu byonene.N'ago marhegeko gayorha go n'ago,garherekerwa ngasi mango na ngasi mwaka ntakwo gankahashihindula bimana abayegera Nnamahanga. ² Nk'arhali ntyo,bankalesire okukarhula ezo enterekero bulya acibaga abarherekezi bacesibwa oku caligumiz barhankaciyunviremwo caha omu murhima. ³ Ciru zo nterekero zakagibayibusa ebyaha byabo ngasi mwaka. ⁴ Bulya ntako omuko gw'ebimasha n'ebihebe gwanka rhenza ebyaha. ⁵ Kwokwarhumaga Kristu erhi aja enigulu aderha erhi, "Orhalonzagya nterekero na ntulo;ci wanteganyize omu biri. ⁶ Orhasimaga mbagwa na nterekero oku byaha. ⁷ Obwo nanacidrha nti: Nie ono,nyishire,bulya nie kuyandikirwe omu cizingo c'ecitabu, nti njire obulonza bwawe Yagirwa Nnamahanga." ⁸ Arhagiderha erhi,"enterekero,entuloengusho n'ebagwa oku byaha orhazilonzagya orhanazisimaga." n'obwo ziri nterekero zirhegesirwe n'amarhegeko. ⁹ Okuhandi acirhi derha:"Nie ono nyishire nti njire obulonza bwawe ntyo arhe zize amarherekere marhanzi ahiraho oburherekere bwa kabirhi. ¹⁰ Bunali buhashe bw'obwo bulonza burhujira bimana erhi burherekere bw'omubiri gwa Yesu Kristu gwarherekeragwa liguma lwoshi burhuma. ¹¹ Na ngasi mudahwa ayimaga aha luhero bwaca bwayira mpu ajire omukolo gwage,na ngasi mango enterekero arhula zo na zirya,na nta buhashe ciru n'obutya zijira bw'okurhenza ebyaha. ¹² Yehe erhi aba amarherekera oburherekere buguma bwone oku byaha,agendicitamalira oku nsiku n'amango ebwa kulyo kwa Nnamahanga. ¹³ Akalinga gurhenga aho oku abashombanyi bage abaheba ahidaku lya amagulu gage. ¹⁴ Bulya na nterekero nguma yone yone abacesagya abahindula bimana b'ensiku zoshi. ¹⁵ Ciru na Muka ahamirize okwo;bulya erhi aba amaderha erhi, ¹⁶ "Eyi yo ndagano nalagananaga rhweshi nabo enyuma ly'ezo nsiku,Nyakasane ayushula,erhi: Nahira amarhegeko gani omu mirhima yabo,nabayandikago omu nkengero. ¹⁷ Nabyo ebyaha byabo n'obubi bwabo ntakacikengera bundi." ¹⁸ Ci aha ebyaha byababalirwe harhaciri nterekero oku caha. ¹⁹ Ntyo,bene wirhu,rhugwerhe obuhashe bukuja nkoku rhulonzize omu hatagatifu h'ebitagatifu erhi muko gwa yesu gurhuma. ²⁰ Rhwanamuja rhukagera omu njira arhubwiraga:Njira npyahya n'eyobuzine,njira egezire omu pazia,gwo mubiri gwage. ²¹ Nakulya kuba rhugwerhe omu dahwa mukulu orhegeka enyumpa ya Nnamahanga, ²² rhuyegerage n'omurhima gurhalimwo bulyalya omu bwemere bwimana;emirhima yirhu ecesibwe ngasi bubi buyirimwo,n'emibiri yirhu eshukwe n'amishi gashongwire. ²³ Rhulange buzibu obuhamirizi bw'obulangalire bwirhu,bulya owalaganyagya akwanine okulangalirwa. ²⁴ Rhurhabalane rhwene na rhwene,rhuhanane omurhima omu buzigire n'omu kukola aminja. ²⁵ Rhurhalekaga okukaja haguma,kulya baguma badwirhe bakajira;ci rhukahanana omurhima,na bwenene bulya mubwine oku olusiku luli hofi. ²⁶ Erhi rhwankajira ebyaha n'oluhizo n'obwo rhwarhangirimanya bwinja okuli,harhaciri nterekero oku byaha. ²⁷ Na ntakundi kucisigire okurhali kutwirwa olubanja lukali n'okukwebwa omu ngulumira y'omuliro yayishisingonola abagoma. ²⁸ Omuntu akavuna irhegeko lya Musa anayirhwe buzira lukogo casinga haboneke bahamirizi babirhi erhi basharhu. ²⁹ Kengeragi ninyu buhane bunganaci na bukali kulusha akwanine ukuhabwa wabe alabasire mugala wa Nnamahanga,owabe aganyagusize omuko gw'endagano gwamucesagya,nkakulya kankabire kantu kizinga,n'owabe ajacire Muka gw'enshokano? ³⁰ Neci rhurhahabiri olya waderhaga,erhi: "Okucihola kuli kwani n'okuhana oluhembo kuli kwani." Na kandi,erhi: "Nyakasane ayishitwira olubaga lwage olubanja." ³¹ Yajebe! Ciri cintu ca kuyoboha okuhirima omunfune za Nnamahanga ozine. ³² Ci kwonene mukengere ensiku ntanzi,erhi muyusihabwa obumoleke bulya mulembera entambala ndarhi n'amababale. ³³ Ahamwabonesibwa enshonyi n'okulibuzibwa omu lubaga;aha mwalungana n'abajiriragwa ntyo. ³⁴ Neci,mwashangire amalibuko g'abali omu mpamikwa,mwanayemera n'obushagaluke mwanyagwa ebintu binyu,bulya mwali mumanyire oku mugwerhe obuhirhi bwinja kulusha n'oburhankahwa. ³⁵ Mumanyagemwankarherha obwo bulangalire bwinyu,bulya bubikirwe ntanda nnene. ³⁶ Neci kukwanine muzibuhe,lyo muyorha mujira obulonza bwa Nnamahanga,munayishihabwa ebi alaganyagya. ³⁷ "Bulya hacisigire hisanzi hitya hyone,olya wayisha ayishe,arhanacilegerere. ³⁸ Ci omushinganyanya alama n'obwemere,n'erhi ankashubira nyuma omurhima gwani gurhankacimubakwo." ³⁹ Rhwehe rhurhali bantu ba kushubira nyuma n'okuyishisherera,ci rhuli bantu ba bwemere buciza obuzine bwirhu.