¹ Co cirhumire nirhu,obu rhuzugulusirwe n'ecitu cityo c'abahamirizi,kukwanine rhurhibe ngasi cihanzo rhunaleke ebyaha birhuzonzire rhugende bulibirha,rhujilwa eyo ntambala rhurheganyizibwe. ² Rhuseze Yesu kwa amasu ye warhagizagya ye wanaliza obwemere bwirhu,ye wacihanganiraga omu salaba ahali hamasime ankabwine aganyagusa enshonyi zagwo na buno akola atamire ebwa kulyo kw'entebe ya Nnamahanga. ³ Neci mukengere ninyu oyo walemberaga ago mababale alibuzibagwa na banya_byaha goshi lyo murhagirha omurhima erhi kubula emisi kurhuma. ⁴ Kuhika buno murhasigidwa muko erhi caha cirhuma. ⁵ Kamwayibagire amahano amuhanulaga nka bana bage erhi: Mugala wani,irhondo omanye wankagaya obuhane Nyakasane ahana, na nka akukalihira omanye wa nka twika omurhima." ⁶ Bulya oyu Nyakasane asima,ye ahana n'oyu ayankirira nka mugala ye ashurha. ⁷ Amalibuko ginyu buli buhane.Kwo Nnamahanga amujirira nka bana bage.Mwana ohi ohanwa n'Ishe? ⁸ Erhi mwankabula kwahabwa obuhane abandi boshi bashagira murhankaciba bana b'okuli,ci mwaba b'embuga. ⁹ Caba karhurhagwerhi balarha b'omubiri bakagirhuhana,rhwanakabagenga? ka kurhukwanini bwenene kulusha rhuyunve Larha w'emyuka yirhu lyorhubona obuzine? ¹⁰ Ba larha b'omubiri barhuhanyire nsiku nsungunu nkoku bone bobonaga kukwanine,ciyehe arhuhana uku bunguke bwirhu,mpu lyo rhushangira obwimana bwage. ¹¹ Neci nta buhane busimisa amango bwacihanwa, ci bulerha oburhe.Buzinda lyo bulerhera ababuhabagwa emburho y'obuholo n'obushinganyanya. ¹² Co cirhumire mulambule amaboko ginyu gahozire n'amadwi ginyu gaherhamire. ¹³ Muna shinganyize amagulu ginyu enjira zikubusire lyo enkunagizi zirhakivunika ci lyo zifuma erhikwo. ¹⁴ Mulonze okuba n'omurhula n'abantu boshi,na haguma n'okuba bimana bulya buzira bwimana ntaye wabone Nyakasane. ¹⁵ Mumanye hankjira owaheza enshokano ya Nnamahanga;mumanye hankajira omuzi ciru n'omuguma gulula gwamera,na hano guba gwamamera gumuhabule emirhima,na ntyo guyahukize bantu banji. ¹⁶ Na buzinda mumanye hankajira owaba mushungu,erhi orhakenga ebya Nnamahanga,ak'Esau waguzagya omwimo gwage gw'enfula oku biryo bya liguma. ¹⁷ Murhahabiri oku buzinda,erhi acilonza okuhabwa obwanga,alahirirwa;bulya arhabonaga oku ankahindamula omurhima gw'ishe,n'obwo akulonzagya bwenene n'emirenge. ¹⁸ Bulyala murhayegeriri entondo yankahumwakwo,ngulumira ya muliro,kandi erhi citu ciru,erhi mwizimya,kandi erhi mpusi, ¹⁹ erhi izu lya mushekera,erhi lya nderho,na ciru abaliyunvagya bahuna bwenene mpu barhacibabwiraga bindi. ²⁰ Bulya barhankahashire eri irhegeko,mpu:Ngasi owankahumakwo eyi ntondo,ciru yankaba nsiba,anabandwe amabuye,erhi anatumirhwe. ²¹ Ebyo byabonekana bya kuyobohya bwenene,ciru Musa aderha erhi: "Ngwerhwe n'oboba,nnadwirhe nadirhimana." V 22 Ci mwehe mwayegire entondo ya Siyoni n'ecishagala ca Nnamahanga ozine,mwayegire Eyerusalemu w'empingu,n'emirhwe ya bamalaika barhankaganjwa,yo ndeko y'olusiku lukulu, ²³ mwayegere ecinyabuguma c'enfula ziyandisirwe omu mpingu;mwayegire Nnamahanga mutwi w'emanja z'abantu boshi,n'emyuka y'abashinganyanya bahisire oku bwimana, ²⁴ mwayegire Yesu,mulagizi w'endagano mpyahya,n'omuko gwage gurhucesa gunalushire ogw'Abeli. 25 Mucilange!Murhalahiraga okuyunva oli wamubwira.Abalahiraga okuyunva owakagibabwira oku Mungu amurhumire barhafumaga obuhane.Rhwe hahe,rhurhankabufuma erhi rhwankamuyerekeza omugongo oyo oli waderha enyanya ly'amalunga.v 26 Izu lyage lyadudaganya igulu,cikwone arhuhirage eciragane cidesire mpu.Nashubidudaganya kandi lindi liguma,arhali igulu lyone,cikwone n'oku nkuba. 27 Okwo kokuderha mpu'' kandi liguma''kuyerekine oku ebintu byalemagwa byadudaganyibwa,bibulihirigirha,lyo akarhadudagana kahabera. v 28 Rhuvugage omunkwa bulya rhuhirwe obwami burhadudagana.Oku rhwavu