¹ Simakadze wakhuluma kuMose, watsi, ² ''Nangabe kukhona lowonako aphindze enta kungatsembeki kuSimakadze ngekukhohlisa makhelwane wakhe nangabe kukhona lamboleke kona, noma lokushiywe akunakekele ngekumtsemba ³ noma ngabe yintfo leyetjiwe, noma ucindzetele makhelwane wakhe, noma atfola intfo lelahlekele makhelwane wakhe bese acambe emanga ngako, noma afunga ngemanga, noma ngabe ngusiphi simo lesinjengaleti bantfu labona ngato, ⁴ noma sekonile watfolakala anelicala, kumele abuyisele nomayini layitsetse ngekweba noma ngekucindzetela, noma loko labekatsenjwe ngako, noma ngalobekulahlekile wase uyakutfola. ⁵ Kwengenta, kunoma ngabe ngukuphi lafunga khona ngemanga, kumele abuyisele ngalokuphelele, angete kwesihlanu ngetulu kwako, abese ubhadala konkhe kumnikati ngalelo langa atfolaka anelicala. ⁶ Abese uletsa umnikelo welicala kuSimakandze, sihhanca lesingenasici emhlambini lolinganiselwa enanini langaleso sikhatsi, longumnikelo welicala kum mpristi. ⁷ Umpristi uyawumentela umusa embikwaSimakandze, ayawubese uyacolelwa kunoma ngayini lebekanelicala ngekukwenta.'' ⁸ Wase Simakandze ukhuluma kuMose, watsi, '' ⁹ Phocelela Aron kanye nemadvodzana akhe, utsi 'Lona ngumtsetfo wemnikelo loshisiwe. Umnikelo loshisiwe kumele abe e-althali busuku bonkhe kute kubese kuseni, nalomlilo weli-althali utawuhlala uvutsa. ¹⁰ Umpristi uyawufaka timphahla takhe telineni, aphindze futsi afake timphahla takhe telineni tangaphansi. Utawubutsa umlotsa losele umlilo nasashise wonkhe umnikelo e-althali, utawubese ubeka lomlotsa eceleni kwe-althali. ¹¹ Uyakukhumula tembatfo takhe, abese ugcoka letinye tembatfo kutophatsa lomlotsa ngaphandle kwenkambu kuya endzaweni lehlobile. ¹² Umlilo lose-lathini awuvutse njalo . Akameli ucishe, umpristu utoshisa tinkhuni njalo ekuseni. Utakuhlela umnikelo wekushiswa njengobe kubhekekile kuwo, utoshisa kuwo umnikelo lokhuluphele wekuthula. ¹³ Umlilo kumele uhlale uvutsa elathini ngaso sonkhe sikhatsi. kumele ungacimi. ¹⁴ Lona ngumtsetfo wetinhlavu temnikelo. Emadvodzana a-Aron atawunikela wona phambi kwaSimakadze phambi kwelilathi. ¹⁵ Umpristi utotsa sandla lesigcwele safulaha locolisakele wetinhlavu nemnikelo kanye newemafutsa nemphepho lesemnikelweni wetinhlavu, utobese ukushisa elathini kutophuma liphunga lelimnandzi lelimele umnikelo. ¹⁶ Aron kanye nemadvodzana akhe batawukudla noma ngabe yini lesalako emnikelweni. Kwamele kudliwe ngaphandle kwemvubelo endzaweni lengcwele. Batokudla esibuyeni selithende lemhlangano. ¹⁷ Akukafaneli kutsi kubhakwe nemvubelo. Ngikunikele kutsi kube yincenye yabo yemnikelo wami lowentiwe ngemlilo. Ungcwele kakhulu, njengemnikelo wesono nemnikelo webucala. ¹⁸ Wonkhe lomdvuna kulesitukulwane sa-Aron angadla kuko, njengekumiswa phakadze kuto tonkhe titukulwane tenu, lokutsatfwe emnikelweni wemlilo lowentelwaSimakadze.Wonkhe lotobatsintsa utoba ngcwele.'' ¹⁹ Simakandze wakhuluma kuMose futsi, watsi, ²⁰ ''Lona ngumnikelo wa-Aron kanye nemadvodzana akhe, labatawunikela kuSimakandze ngelilanga lapho ngamunye wemadvodzana agcotjwa: emalitha lamabili afulaha njengemnikelo wetinhlavu letetayelekile, ihhafu yawo ekuseni kanye nehhafu yawo entsambama. ²¹ Itakwentiwa ngemafutsa ekesini lekubhaka. Nasekwenyiwe, utakuhlanganisa. Ngetincetu letibhakiwe utonikela umnikelo wetinhlavu ukhicite liphunga lelimnandzi kuSimakandze. ²² Indvodzana yemphristi lomkhulu loba nguphristi lomkhulu lomusha kusuka emadvodzaneni akhe utawunikela wona. Njengekuphocelela phakadze, wonkhe utakushiswa kuSimakadze. ²³ Wonkhe umnikelo wemphristi wetinhlavu utawukushiswa uphele. Akukameli udliwe.'' ²⁴ Simakadze wakhuluma kuMosi futsi, watsi, ²⁵ ''Khuluma na-Aron kanye nemadvodzana akhe, utsi, 'Lona ngumtsetfo wemnikelo wesono: Umnikelo wesono kumele ubulawe kulendzawo lapho umnikelo wekushiswa ubulawelwa khona embikwaSimakadze. Ungcwele kakhulu. ²⁶ Umphristi lowunikelako ngesono atawukudla. Kumele udliwe endzaweni lengcwele esibuyeni selithende lekuhlangana. ²⁷ Noma ngayini letsintsa inyama yako itakuba ngcwele, futsi nangabe lengati inyenyetwa kunoma nguyiphi ingubo, kumele uyiwashe, lencenye lenyenyetiwe, endzaweni lengwele. ²⁸ Kodvwa lelibhodo lelibumba lekubiliselwe kulo kumele libulawe. Uma kubiliswe ebhodweni lelitfusi, kumele lihwaywe liyakatwe ngemati lahlobile. ²⁹ Wesilisa kulabaphristia angadla incenye yako ngoba kona kungcwele kakhulu. ³⁰ Kodvwa noma ngabe ngumuphi umnikelo wesono ingati yayo leletfwe ethendeni lekuhlangana kwenta umusa endzaweni lengcwele akukameli idliwe. Kumele ishiswe.