¹ Nahano bhahetire momeghi gya Amfipoli na Apolonia, bhakacha bhakahikera omoghi wo Thesalonike mno ware na risengerero rya Bhayahudi. ² Kebhuno yare atemu ye Paulo, akaghi awabho, na kuchasiko isato che sabato akakora ekina nabho ighoro ya amandeko. ³ Nare arabhakachoreri amandeko na kubhabhorera kubha, yendiru Kristo anyake na amare aryoke gwiki kurwa mubhaku. Akabhabhorera, "Uno Yesu nekubhabhoera amang'ana ghache niwe Kristo." ⁴ Abhamwe bha Bhayahudi bhaghisereri na kugwatana na Paulo na Sila, hamwe na abhagiriki bhano bhagwatire ang'ana ye Iryobha abhakari bharu bhano bhwe bhibheriri na ritongo rino ryare riseri ang'ana ye Iryobha. ⁵ Mare abhamwe bhabhayahudi bhano bhatiseriri, na bhano bhare bhichwiru narihari, bhakaghi momutera na kubhaghegha abhamwe bhabhato abhabhe, bhakasomba ritongo hamwe, na kureta anyori momoghi, bhakamara bhakakisikerera anyumba ye Japan, bharenda bhagwate Paulo na Sila kubha bhabharete ambere yeritongo. ⁶ Mare hano bhabhabhorire, bha kamugwata Yasoni na abhamwe bhaumwabho abhande na kubhahira ambere yabhakoro bho moghibhara wanya, ⁷ "Abhasubhe bhano mbasariri uye bhahikire na ino gwiki, Abhasubhe bhano mbahochiru na Yasoni mbakusari emeghiro ghe Kaisari, mbhakobhuga nanyiho omutemi owonde uno akobherekeru Yesu." ⁸ Ritongo na abhakoro bhomo hano bhogwire amang'ana ghayo bhakahaha. ⁹ Hano bhamarire kughegha chahera chino chisire obhochongi kurwa ko Yason na bhande bhakabhatighoroka bhaghende. ¹⁰ Obhotiko bhuyo bhaumwabho bhakamotoma Paulo na Sila Beroya. Nahano bhahikire iri bhakaghi mwisengerero rya Bhayahudi. ¹¹ Abhato bhari mbare nobhotora bhakoro ghokera bhari abhato bha Thesaronike gho kubha mbare nubwame bhokorigwata ring'ana kobhotora bwabho na gwitegherera amandeko chasiko chose bhamenye kurora aribha amang'ana ghano ghaghambiru hangu ghanyi. ¹² Kohangu bharu bhabho mbiseriri, mbaremu abhakari bhano bhare nobhochingi bhokoro bho Kigiriki na bhasubhe bharu. ¹³ Mare Abhayahudi bha Thesaronike hano bhamenyire kubha Paulo nakuraghani ang'ana yi Iryobha iyo Beroya, bhakaghi iyo na kweghereri na bhakamara bhakabhoki anyori mubhato. ¹⁴ Kubwango bhaumwabho bhakamohira Paulo konchera ya nyancha, mare Sila na Timotheo bhakasagha hayo. ¹⁵ Bhari bha umwabho bhano bhamohirire Paulo mbaghire nawe kohikera Athene, hano bhamotighire Paulo iyo mbabwine amaraghereri kurwa kumwene kubha, Sila na Timotheo bhamotumbane bwango kebhuno ikwenderu. ¹⁶ Na ribhagha hano bhare bharabhaghanya iyo Athene, akoro yache ikakararu mose yache kebhuno areche omoghi wichwire cha sanamu charu. ¹⁷ Kohangu akibhiseri mumasengero nabhayahudi bhari bhiseriri Iryobha nabhari bhose ahunene nabho chasiko chose momutera. ¹⁸ Mare nabhande bha Wanafalsafa na bha Waepikureo na bha Wastoiko bhakamugwata. Nabhande bhakabhugha, "Neke kino akughamba uno umughambi ekingwerere? Abhande bhakabhugha "ekurorekana nakughamba amang'ana, ghi Iryobha righeni, ghokubha nakughamba amang'ana gha Yesu na obhuryoki. ¹⁹ Bhakamughegha Paulo na komureta Areopago, bhakabhugha, "Ntoghotora kumenya ghano ameghereri amahya ghano okughamba? ²⁰ Ghokubha nokwibhori amang'ana amahya mwonatwe ghito. Kohangu tukwenda kumenya amang'ana ghano neke ghakuraghereri?" ²¹ (Nabhato bhose bha Athene nabhagheni bhose bhano bhanyi nabho, bhahaghegha ribhagha ryabho hamwe kughamba na kutegherera ighoro yering'ana rihya). ²² Kohangu Paulo akimerera ghate ghate yabhato bha Areopago na kughamba, "Inywe abhato bha Athene, nekurora hangu inywe nabhato bhamasengero maru. ²³ Nikyo ghakoheta kwane nekurora ebhighero byanyu bhyokusengerera neroche amang'ana mokighero kimwe kyandekiru amang'ana ghanabhugha, "KWI IRYOBHA RINORITAKUMENYEKANA." Kohangu tighera uno mokusengera nainomtamweche, niwe kubhabhorera inywe. ²⁴ Iryobha rino ryabhombire ase na kiyo kyose kino kenyi mase, ghokubha nomokoro womwisare na wase, bhataghotora gwikara mumasengerero ghano ghabhokiru namabhoko. ²⁵ Na gwiki tahahokeru na mabhoko ghabhato kebhuno akwenda ekighero kwiye, nikyo uyo umwene nakabhaha abhato obhuhoru na nomwika na nebhighero ebhende bhyose. ²⁶ Kohetera omoto umwe, nakorire chase chose cha bhato bhano bhagwikara ighoro yobhosho bwase, na akabhatorera amabhagha na ebhimwenyekere ryo bhyase bhino bhagwikara. ²⁷ Kohangu, mbakwenderu komumohi Iryobha na ikwenderu bhamohikere na kobwahene tanyi kure namoto uyo wose. ²⁸ Awache ntogwikara, ntokutara na kubha nobhuhoru bwito kebhuno umwandeki wito umwe wiryembo hano abhughire, itwe nobhibhori bwache. ²⁹ Kohangu, aribha itwe ntwibwiru ni Iryobha, tutakwenderu kwisegha kubha Iryobha nkebhuno amaghase, hamwe shabha hamwe amabhohe, hamwe asanamu ino bhahorire kobhukori na komusegho ghabhato. ³⁰ Kohangu Iryobha ndyakirire ribhagha reri ryobhugheghe mare rebhere nakughamba abhato bhose are yose bhatore kwanga amang'ana amabhe. ³¹ Ino ghokubha natorire orosiko runo asighire ghotena ekina mose kobhurongana komoto uno amorusiri. Iryobha ryarusiri obhuhene bhomoto uyo komoto uyo, wose hano amuryokiri kurwa mubhaku. ³² Na bhato bha Athene hano bhigwire amang'ana ghokuryoka kwabhaku, abhande bhabho bhakamurera Paulo, mare abhande bhakabhugha "Ntoghokutegherera gwiki kumang'ana ghari ng'ana hino. ³³ Hano amarire hayo, Paulo akabhatigha. ³⁴ Mare abhande bhabhato bhabhere hamwe nawe bhaghisereri, nare Dionisio Mwareopago, na nomukari arabherekeru, Damari na bhande bhano are nabho.