¹ Paulo wose akacha Derbe na Lystra; mbe norighi hayo hose nareho umwana mwegha uno abherekiru Timotheo, nare mobhureni uno ibhwiru na nyinwo Muyahudi hayo nare motoribhu, nawe ise wache nare mobhirighi. ² Abhato bha Listra na Ikonia mbamughambire bhwahene. ³ Paulo na mwendire atore kughi nawe orughendo, ebhere akamwimoki na komusara gho kubha Abhayahudi bhano bhare iyo mbamumenyire gho kubha ise nare mobhirighi. ⁴ Hano bhare bharaghi bhakaheta momegya bhakarusi amaraghano ku masengerero bhatore gwisereri amaraghano ghano ghandekuru na abhatomu na abhagharuka bha iyo Yerusalemu. ⁵ Hayo amasengerero ghakaimerera bhoronge ko obhwisereri na abhatoribhu bhakaiyengera bhuri bhare bharabhara ghu chasiko. ⁶ Paulo no omughendi bhakaghi Filigia na Galatia, gho kubha omotema wi Iryobha wabharekiri kuraghani ang'ana anchomu mo mukowa wo Asia. ⁷ Hano bhatingiri Misri, bhaghasaka kughi Bithinia, amare omotema wo Yesu ukabhareki. ⁸ Ku hayo bhakaheta Misri bhakaghi mo mogya wo Turowa. ⁹ Amaroto ghakacha ko Paulo obhotiko nareho omoto imerire Makedonia, aramobherekere arabhugha, muche ino maghetoni ya mototori. ¹⁰ Hano Paulo aroche amaroto ghayo, hayo akaibhari bhari kughi Makedonia akabha eche kubha Iryobha ndibhabherekire kughi kuraghani ang'ana anchomu. ¹¹ Hayo tukabhoka kughi Torowa, tu rughendo rumwe Samothrake, na orosiko oronde tukahika mo mogya wo Napori. ¹² Kurwa hayo tukaghi Filipi omogya umwe mo megya ghe Makedonia, omogya omokoro mo wiraya yo obhutemi bwe ekiroma bhaghaikara iyo chasiko nyarebhe. ¹³ Orosiko ro rikane tukahoroka anchi ye ekehita tukaghi eghitaro, ahase hano twiseghire ntungatorire kubhona ho ghukorera amasabhi. Tughaikara hase tukaghambana na abhakari bhano bhichire hamwe. ¹⁴ Omukari umwe uno abherekiru Lidia uno ahaghori sambarau kurwa mo mogya wo Tiatira nare ararisengera Iryobha, nawe aghatutegherera. Iryobha rikaighora akoro yache na amang'ana ghano ghare gharaghambu na Paulo akagha itimantera. ¹⁵ Hano amarire kubhatisu uwe na abhato bha monyumba yache yose, aghatusasama arabhugha, "Aribha mondoche kubha eni mu muhene nenyi ko Omokoro, mbe nkubhasabha muche mwikare awane, aghatuhateka chwee. ¹⁶ Ikabha kubha, hano tware turaghi ahase ho ghusasama , umwana muki umwe uno are na risambwa ryo kumenya amang'ana aghatemerana na nitwe. Akaretera omokoro waache andonge ko korighi gha ambere. ¹⁷ Omukari uyo akamutambana Paulo hamwe na nitwe, arakura ino arabhugha "Abhatamisi bhano mbhi Iryobha rino renyi ighoro bhano bhakubha raghani amang'ana gho ghotoribhu. ¹⁸ Akabha arakora hang'u ghu chasiko charu amare Paulo nakarire kung'ana iyo aghaishorori na korebhorera risambwa riyo, "Neghokuhama ko rina re Yesu omurwe" Naryo rikamurwa na komotigha hayo hayo." ¹⁹ Hano abhakoro bhache bharoche kubha obwiseghe bhwa bwa andenge yabho bhorure ho, bhakabhagwata Paulo na Sila bhakabhangura kughi mu bhato abhato abharu na ku bhataki. ²⁰ Hano bhabhahikiri ku bhateni be ekina bhakabhugha, "Abhasubhe bhano mu Bhayahudi nawe mbaghukora obhoregho bhokoro momgya wito. ²¹ Mmba kweghi amang'ana ghano ghatanyo mo meghiro ghito kuru ghatakwenderu itwe kyabhuno tonya Abharumi tutaghinagho. ²² Rikinda ryose rikabhasamokera Paulo na Sila abhateni bhe bhiina bhaghatandora changibho chabho, na bhose bhakabharusi changibho na bhakahama kubha bhatemu chasanyi. ²³ Bhamara kubhatema chasanyi chaaru bhakabharekera mo rochumbe gwiki bhakahama abhasirikare bho orochumbe bhabhachonge chwee. ²⁴ Bhacha kuhabhu ahamo na abhakoro bhabho omosirikare wo orochumbe akabharekera mo kenyumba ke mose yo orochumbe na akabhubhoha amaghoro ghabho mwirombero. ²⁵ Yacha kohika kyaghate kyo obhotiko Paulo na Sila bhakobha bharasasama ino bharemba amabhina gho koreghongi Iryobha, ribhagha riyo abhabhohu abhande bhakabha bharategherera. ²⁶ Hayo hayo ase ikarighitera chwee na obhoroso bhooro chumbe bhughasingisa ne ebheseku bhyo orochumbe bhikaighoka, nawe eminyororo gya abhabhohu bhose ghighatimboka. ²⁷ Hano omochengi wo orochumbe asisimokire kurwa mu chandoro akarighi ebheseku bhyo orochumbe bhyose bhigwiru hayo akimoki risabha ryache kwenda kwiyita gho kubha naituriri abhabhohu bhose mbamarire kung'osa. ²⁸ Amare Paulo akareghesa ko riraka ikoro akabhugha kabhaha mtainyahara gho kubha etubhose niho tanyi hano. ²⁹ Omochongi wo orochumbe aghasabha chatara nawe aghasoha mose morochumbe bwango, ino arasingisa ko obhotini nawe akabhagwera Paulo na Sila, ³⁰ nawe akabhahoroki anchi yo orochumbe akabhugha, "Abhasoku nikore bhwe netoribhu? ³¹ Nabho bhakamobhorera, "Nomwisereri Omokoro Yesu hayo noghotoribhu, hamwe na abhato bhose bha mo nyumba yacho. ³² Bhakaghamba ang'ana anchomu yo Omokoro ko omochongi uyo, bhanyi na abhato bhose bha mo nyumba yache. ³³ Omochongi wo orochumbe akabhimoki obhotiko bhuyo akabheghi muyo bhare bhanyaharekire, ewe bhanyi na bhato bha mo nyumba yache na hayo hayo bhakabhatisu. ³⁴ Akabhahira Paulo na Sila awache akabhaha ibhyakuri. Abhato bha awache bhose bhagha chomeru gho kubha mbare bhamarire korisereri Iryobha. ³⁵ Hano yahikire omwise, abhateni bhe ebhina bhakamotomera amang'ana omochongi wo orochumbe bharabhugha "Nubhatighoroke abhato bhayo bhaghi." ³⁶ Omochongi wo orochumbe akamobhorera Paulo ighoro ya amang'ana ghayo kubha "Abhateni bhe ebhina mbatomire amang'ana kubha nibhatighoroke moghi ebhere mu mohoroke mughende no omurembe. ³⁷ Amare Paulo akabhabhorera, "Bhaghututema hahero nawe nitwe na Abharumi tonyi kuru tibhatotenire ekina abhene bhaghaisereri ghoturekera mo orochumbe nawe rebhere mbakwenda ghototighoroka ko kebhisire! Tihanyi tekubha abhene mbache ghotorusi muno." ³⁸ Abhachongi bhakabhabhorera abhateni bhe ekina ighoro ya amang'ana ghayo nabho abhateni bhe ebhino bhaghatina chwee bhacha kumenya kubha Paulo na Sila kubha mbharumi. ³⁹ Abhateni bhe ebhina bhakacha kubhasasama bhahoroke mo orochumbe gwiki bhakabhasabha Paulo na Sila bharwe mo mogya wabho. ⁴⁰ Hayo ebhere Paulo na Sila bhakahoroka mo orochumbe bhakaghi mo nyumba ye Lidia. Hano Paulo na Sila bhabharoche abhahiri bhakabhatora mukoro amare bhakarwa mo mogya uyo.