¹ Abhato nyarebhe bhakarwa Bhuyahudi bhakabheghi abhahiri bhito bharabhugha "Aribha mutaghusaru kyabhuno Musa araghire, mutaghotora ghotoribhu." ² Ribhagha riyo Paulo na Barnaba bhare bharushang'ana na kughambana hamwe na abhatoribhu abhande kubha bhaghi Yerusalemu ku bhatomu na abhagharuka gho ghiri ye ring'ana rino. ³ Ko hayo hano ri kanisa ryabhatomire bhakahetera Bhoinike na Samaria bhararaghani kya bhuno amatongo aghande ghatoribwe. Iyo ikareta oghuchomerwa ku bhatoribwa abhande. ⁴ Hano bhahikire Yerusalemu ri kanisa rikabhaturung'ana na abhatomu na abhagharuka nabho bhakareta ghano bharetaini kurwa iyo na kya bhuno Iryobha ryaghokiri bhanyi nabho. ⁵ Amare abhato nyarebhe bhano bhare bhamarire ghotoribhu mbare ribhara rya Amafarisayo bhakaimerera bhakabhugha, "Nkumangi kubhasara na kubharagha bhagwate emeghiro ghe Musa. ⁶ Niho abhatomu na abhagharuka bhaghaikara hamwe kurwacha ighoro ya ang'ana ino. ⁷ Bhamara kurwacha ribhagha ire Petro akaimerera akabhugha, Bhasani bhito mmokohita kubha ko ribhagha isuhu rino rehetire Iryobha ndiahwire ghate yanyu, kubha ko munwa wane amatongo gogwe amang'ana amachomu na gwisereri Yesu. ⁸ Iryobha ndieche emetema gya abhato, ngekughamba ebhesegho, nakubhaha Ankoro Antobhihu, kyabhuno atukorire itwe. ⁹ Nawe takorire bwahokani gwite na ninywe arakora chakoro chabho kubha mmangi na ko obwisereri. ¹⁰ Hayo ngwake mokorisaki Iryobha kubha motore chachoki mu maghoti gha abhaana bhegha chino bha Tata bhito kurwa itobhene tutatorire gwisegha. ¹¹ Amare twisereri kubha ntoghotoribhu ko orubhango yo Omokoro Yesu kyabhuno bhaare. ¹² Rikinda ryose bhaghakira kiri hano bhaare bharabhategherera Barnaba na Paulo hano bhaare bhararusi kyabhuno amang'ana ghaare ko bheroghoro na amakono ghano Iryobha ryakorire kubhona ghate ya abhato bha matongo. ¹³ Hang'u bhatenire kughamba Yakobo akagharo akabhugha, "Bhahiri bhane muntegherere." ¹⁴ Simioni nasaikire kyabhuno ekimbere Iryobha ko orubhango ndiabhatoriri abha matongo na kubha kurwa kwabho ko rina ryache ribhone abhato. ¹⁵ Amang'ana gha abharoti ngagwisererani na rino kyabhuno ghandekuru. ¹⁶ Hano amang'ana ghano ghaghosira nekugharoka kwabhoka gwiki ekebhuru ke Daudi, kino yare kegwire hase, nnekobhoki na kuhobhoka hano hare hasarekire. ¹⁷ Kubha abhato bhano bhasaghire bhamumohi omokoro, bhanyi na abhato bha matongo bhano bhabherekiru ko rina ryane. ¹⁸ Hang'u niho akobhugha Omokoro uno akorire amang'ana ghano ghamenyekire kurwera kare iyo. ¹⁹ Ku hayo eni bhuno nekobhugha hang'u kubha tutabhaha anyako abhato bha matongo, bhano bhishorwiri kwi Iryobha. ²⁰ Amare tubhandekere kubha bhichabhe obhobhe bho chasanamu omuraka wo obhusongoreri ne ebhinyagho na amasahe. ²¹ Gho kubha ko ribhagha ikoro mbanyiho abhato kurwa mo megya ghyose hano bha kuraghani na ghusoma amang'ana gha Musa mu manyumba gho ghusengera ku chasiko che rikane. ²² Gho kubha mbaroche yibhachomire abhatomu na abhagharuka bhanyi na risengereryo ryose kumwahora Yuda uno akobherekeru Barsaba na Silas bhano bhare abhakangati mwisengerero, bhakabhatoma Antiokia bhanyi na Paulo na Barnaba. ²³ Bhakandeka hang'u, abhatomu abhagharuka, bhahiri bhanyu na abhahiri bha matongo bhano bhanyi Antiokia, Siria, na Kirikia ntokubhakeri. ²⁴ Ntwogwire kubha abhato nyarebhe bhano tutabharaghire hang'u bhakarwa hano bhowito mbabhanyakiri ku meghi ghano ghabharetire anyako mometema gyanyu. ²⁵ Ko hayo ntoroche bhwahene etubhose kwahora abhato na kubhatoma kwinywe hamwe na abhatoribhu bhito Barnaba na Paulo, ²⁶ abhato bhano bhatorire obhuhoru bhwabho mu tabhariri gho ghiri ye erina ryo omokoro Yesu Kristo. ²⁷ Ebhere ntubhatomire Yuda na Sila ebho mbakubhabhorera amang'ana ghano ghano. ²⁸ Gho kubha yare bhwehene ghu Koro Antobhihu na nitwe tutabhitweki merigho mekoro ghokera amang'ana ghano ghakwenderu. ²⁹ Kubha mwishorori motighe ebhighero bhino bhekorusebhu ko misambwa, na amasahe na bhino bhyo kunyeta no obhusongoreri. Hayo morikara kure nabhyo yekubha kwinye bhwahene, masaramu. ³⁰ Ke hayo hano bhasanchibhu, bhakahiringitera Antiokia, hano bhamarire gwikomana hamwe, bhakabhaha anyarobha. ³¹ Hano bhamarire koyisoma bhaghachomeru gho kubha bhakabhatora mukora. ³² Yuda na Sila na abharoti bhakabhatora mukoro abhahiri ku mang'ana maru nagho ghakabhaha changuru. ³³ Hano bhamarire gwikara iyo ko ribhagha nyarebhe, bhaghasancha ko omurembe kugharoka ku bhaumwabho bhari bhare bhabhatomire. ³⁴ Amare ikabha bwahene Sila kughagha iyo. ³⁵ Amare Paulo na abhande bhaghikara Antiokia bhanyi na abhande bhaaru, hano bheghiri na kuraghani ang'ana yo Omokoro. ³⁶ Hano chahetire chasiko nyarebhe Paulo akaghambana na Barnaba kubho, "Tugharoke rebhere toghi kubhatarera bha womwito bhari bhanyi mo mogya uno twaraghaini ang'ana yo Omokoro, toghi korighi bhuyo bhanyi. ³⁷ Barnaba akenda komohinani Yohana uno abherekiru Marko. ³⁸ Amare Paulo aghituri kubha tenyi bwahene kughi na Marko gho kubha nabhatighire iyo Pamfilia hayo tamarere ghwiki akore emeremo. ³⁹ Bhukabhaho bhushang'ani bhakoro hayo bhaghasanchana nawe Barnaba akaghi na Marko bhakaghi mo rughendo rwi ryato kohikera Kipro. ⁴⁰ Nawe Paulo akaghi na Sila hano abhahiri bhamarire komughwatani nawe ko orubhango ro Omokoro. ⁴¹ Nawe akaghi kohetera Siria na Kilikia bharaghaha changuru amasengerero.