¹ Hano amarire amang'ana ghayo, Paulo akarwa Athene akaghi Korintho. ² Iyo akamubhona omuyahudi arabherekeru Akwila omoto woritongo re Ponto, umwene na mkari wache akobherekeru Prisila mbichire kurwa iyo Italia, ghokubha Klaudia nabhabharire abhayahudi bhose bharwe Rumi; Paulo akacha awabho; ³ Paulo aghukara ana kukora emeremo nabho ghokubha umwene nakukora emeremo ghino ghetubhene nigyabho Athene mbare bhano bhaghukora amahema. ⁴ Paulo akabha aribhiseri nabho mwisengerero chasiko che sabato. Akabhachinga abhayahudi bhanyi na abhaghiriki. ⁵ Mare Sila bhanyi na Timotheo hano mbichire ra kurwa. Makedonia, Paulo akatomu na koro kubhabhorera abhayahudi kubha Yesu niwe Kristo. ⁶ Ribhagha abhayahudi bhamuhakaniri na komusera hangu Paulo akagharanchora risabhi ryache akarekongata ambere yabho, na kubhabhorera, "Amasabhe ghanyu na ghabhe ighoro yemwitwe ghianyu inywe bhene; Eni ntenyi nabhusari. Kutanga rebhere na kughi ambere niakaghera chase." ⁷ Nahangu akabhoka hari akaghi monyumba ye Tito Yusto, omoto uno iseriri Iryobha. Anyumba yache yenyi haghuhe na mwisengerero. ⁸ Krispo, omukangati womwisengerero bhanyi na bhato bhamuka yache bhakamwisereri omokoro. Abhato bharu bha korintho bhano bhamogwire Paulo araghamba mbiseriri na kubhatizwa. ⁹ Omokoro akamobhorera Paulo obhotiko ghonchera ya maono, "Utatina, mare ghamba na utakira. ¹⁰ Ghokubha Eni nenyi hamwe naniye, na tanyiho uno akusaka ghokunyahara, ghokubha nenyi na bhato bharu momoghi uno." ¹¹ Paulo oghikara iyo umwaka umwe na imieri esasabhe arerekereri ang'ana yi Iryobha ghate yabho. ¹² Mare Galio hano bhamuhere obhutemi bho Akaya, Abhayahudi mbimerire hamwe kumwanga Paulo na komohira ambere yeghetubhe kyoghotenera ekina, ¹³ bhakabhugha, "Omoto uno nahabhachinga abhato bhamwisereri Iryobha bhatighe emeghiro." ¹⁴ Ribhagha Paulo hano are arenda kughamba, Galio akabhaghambi abhayahudi, "Inywe abhayahudi, angabhere mbusari hamwe mrakorire amabhe yangabhere bwahene twanga bharire anchagho. ¹⁵ Mare ghokubha nebhesegho byokobhori, amang'ana, hamarina na emeghiro ghanyu, ghano ghatakundeng'anera tigha motene ekina inywe bhene. Eni ntenyi na muraka kubha omoteni wekina kumang'ana ghayo. ¹⁶ Galio akabhabhorera ambere yeghetubhe kyoghotenera ekina. ¹⁷ Niho hangu bhakamugwata Sosthene, omukangati worisengerero, bhakamutema ambere yeghetubhe kyoghotenera ekina. Mare Galio taghirenagho kino bhakorire. ¹⁸ Paulo hano amarire gwikara hari koribhagharire, akabhatigha bhaumwabho na akaghi na meri Siria bhanyi na Prisila na Akwila. Hano bhare bhakere kobhoka bhandarini, akamwa rituki ryache ghokubha nare irakeriri kubha umweghi omokoro. ¹⁹ Hano bhahikire Efeso, Paulo akamotigha Prisila na Akwila hayo, mare umwene akasikera mwisengerero na kwibhiseri nabhayahudi. ²⁰ Hano bhamobhorire Paulo ikare nabho koribhagha ire, umwene akanga. ²¹ Mare akarobhoka kughi awabho, akabhabhorera "Nekugharoka gwiki awanyu, aribha obhosighe bwi Iryobha. Hano amarire hayo, akaghi na meri kurwa Efeso. ²² Paulo hano ahikire, akatira kughi ghukeri ri Sengero re Yerusalemu, akamara akahiringita hase kwi sengero re Antiokia. ²³ Hano amarire gwikara koribhagha hari, Paulo akaghi kohetera ase ye Galatia na Frigia na kubhasesi chakoro abheghibwa bhose. ²⁴ Omuyahudi umwe akubherekeru Apolo, uno ibhoriru iyo Alexandria, akacha Efeso. Nare nobhukari bhokughamba na mukandararu mumandeko. ²⁵ Apolo nare erekeriru ameghereri gho omokoro. Na kebhuno are mukandararu kurwa mukoro, naghambire na kweghi kobhukari amang'ana ghano ghamureghanire Yesu, mare nare amenyire ubwene obhubhatizo bho Yohana. ²⁶ Apolo akatanga kughamba kobhomurani mwisengerero. Mare Prisila na Akwila hano bhamogwire, bhakakora obhusani nawe na bhakamwerekereri ighoro ya chanchera che Iryobha kobhukari. ²⁷ Hano endire kughi Akaya, bhaumwabho bhakamosesi akoro bhakabhandekera anyarubha abheghibwa bhano bhare Akaya kubha bhatore komoturung'ana. Hano ahikire, korubhango akabhasakeri hene bhari bhamuriseriri. ²⁸ Ghochanguru chache na mangini, Apolo nabhakerire abhayahudi hahero arereki kohetera amandeko kubha Yesu niwe Kristo.