Sipat Leen Meresia Suang Zaman Akhir ¹ Ingat ihe; te kawan olo pengawus sagar naan deo kesusahan. ² Meresia sagar je memikir unuk da gegales, cinta duit, sakah nelang ketuju ngopau, dali ketuju ngewawarah ulun, ngelawen ulun tha, sa ketaru berterimakasih, nelang muar tong kawan hal ye rohani. ³ Dali sa cinta ali sesameh meresia, sa kakan ngampun, dali ketuju pedaia ulun bali, ketuju makai kekerasan, dali murah bereket nelang sa ketuju tong ye buen. ⁴ Dali ketuju sulas durhaka, sakah nelang sa panjang pikiran, dali lewi ketuju tong kesenangan dunia ke ngunau kehendak Allah. ⁵ Biar na teneng dali ngunau moyo nampelor kewajiban agama, et dali sa nerima inti ke agama iro. Pekaro unuk ke ulun ye nget iro. ⁶ Naan kedali ye menyusup masuk tong belai belalu memikat kawan bawe ye lome nelang bedosa ye na kuasa ene macam-macam kehendak nafsu. ⁷ Kawan bawe iro seleur kaweng na ajar, et beloh pini tau ketaru ajaran ye bujur ke Allah. ⁸ Nget da Yanes ali da Yambres bayuh ngelawen da Musa, nget iro ada kawan ulun iro ngelawen ajaran ke Allah. Pikiran dali apu rusak, nelang kepercayaan dali sa tahan uji. ⁹ Et dali sa sagar mahan se-se, leka ke bungul dali sagar toau kawus ulun, nget ye na inam dali Yanes ali da Yambres. Nasehat Paulus Tong Timotius ¹⁰ Nget ko apu makai kawan ajaran ab, cara bolum ab, ali tujuan pemulum ab. Ko apu kite nget me ab bene-bene percaya tong Yesus Kristus nelang kasih tong sesama meresia. Ko ketoan ade kesabaran nelang ketekunan ab. ¹¹ Ko apu kite ab na siksa nelang ab nanggung ke nare. Ko ketoan kawus kejadian ye kune ab te Anthiokia, te Ikonium, ali Listra; nelang ko ketoan kawus ke nare kune ab. Et Tuhan nyelamat ab ke kawus ye iro. ¹² Puna kawus ulun ye kakan bolum beribadat nelang bolum sendro ali Kristus Yesus sagar kune ke nare. ¹³ Et kawan ulun ye jahat ali kawan ulun penipu sagar makin bertambah jahat, dali nipu ulun bali padahal dali gegales tatipu ade. ¹⁴ Et nget ko, Timotius, ware ko tatap mege te kawan ajaran ye apu na ajar tong kam nelang kawus ye na percaya ene ko; leko ko ketoan dase kawan guru ko. ¹⁵ Ko harus ingat mulai ke dis ko aou ketaru surat Alkitab. Surat Alkitab iro ngokoi tong ko pengertian ketaru dian mahan selamat lalo percaya tong Yesus Kristus. ¹⁶ Kawus ye na sunat te suang surat berasi Alkitab, ye na ilham ene Allah nelang be di pakai ngajar ye buen dian nagur, nelang nemuen ye sala, nelang dian ngajar meresia dian belum ngunaun kehendak Allah. ¹⁷ Makai surat berasih Alkitab iro ulun ye melayani Allah mahan na pesukup ali peruna tong kawus macam pengkoe ye buen.