¹ Kristus sagar sulet eso tong denia ihe dian mengadili kawan ulun bolum, ulun mate; nelang da sagar sulet dian merintahye lah Raja. Leka iro ab kaweng bene ali ko te hadapan Allah nelang Kristus Yesus. ² Ware ko ngulek kabar ke Allah iro, nelang seleur nuntut dian ulun ngeringga da. Se dali kakan atawa sa, buen ko ngokoi dian ulun tau percaya, nundru kesala, nelang ngokoi semangat tong dali, ajar ulun ali sabar. ³ Leka sagar empe wayah ye ulunsa hakun eso nerima pengajaran ye bene. Kebalikan ye, dali makai kehendak dali gegales, nelang ngumpul deo guru dian ngajar kawan hal ye buen na dingga kentelinga dali. ⁴ Dali sagar nalep kelingge sa moyo ngeringga ye bene, et sagar ngeringga kawan kesah opau. ⁵ Et bele nget iro, ko harus nguasa unuk ko te suang keadaan ye nget me pun. Sabar buen iro, nelang tampelor bebuen kewajiban ko yelah pelayanan Allah. ⁶ Nget unuk ab, apu empe wayah ye ab sagar mate yelah persembahan tong Allagh, sa ola eso ab sagar ngikah denia ihe. ⁷ Ap apu siut pertandingan ali buen bene nelang apu empe garis ares ye ab tatap setia tong Kristus empe pengawus ye. ⁸ Nelang nehe hadiah kemenangan ngemba ab, te olo kiamat, Tuhan, Hakim ye adil iro sagar ngokoi hadiah iro tong ab, leka ab apu bolum buen ali Allah. Nelang sa je ab gegales ye sagar nerima hadiah iro, et ade kawus ulun ye ngemba penyulet Tuhan ali seleur kesongo. Paket Pribadi Paulus Dian Timotius ⁹ Ware ko ngeto sulet demasu ab ali jao. ¹⁰ Leka da Demas apu ngikah ab leka da cinta denia ihe. Da tulak tomg Tesalonika. Hi Krekes tulak tong Galatia nelang da Titus tong Damaltia ¹¹ Je da Lukas ye nondo sendro ab. Epe da Markus nelang oit da sendronko, leka da tau ngawat te suang pengkoie ab. ¹² Ab apu nyiu Tikhikus tulak tong Efesus. ¹³ Aka ko sulet oit mantel ye na uikah ab te Troas te belai Karpus. Oit ade kawan buku ab, ye mebatang kawan buku ye na ene ke kertas upak. ¹⁴ Da Aleksander tukang besi iro apu ngene pengkoe ye jahat bene negkawe ab, Tuhan sagar ngebalas tong da nget kawus pengkoe da. ¹⁵ Ko harus hati-hati ali da, leka da behimat ngelawen kabar Injil se ye na pekempe ene taka. ¹⁶ Te kede ab tela pekempe pembelaan ab, beloh naan sunah erai ulun ye ngunyang ab; kawus ye ngikah ab, mudahan Allah ye pesala dalu te hal ihe. ¹⁷ Et Tuhan nguyang ab, da ngokoi kekuatan empe ab sanggup ngulek kawus kabar buen iro, dian kawus ulun ye sa Yahudi keringa. Nelang ab muntis ke bahaya pampate. ¹⁸ Tuhan pasti sagar pekuntis ab ke kawan hal ye jahat ye nengkawe ab. Da sagar ngoit ab ali selamat tong suang kerajaan ye te surga. Ware Da na hormat na mulia pelor tong ke ngola-ola! Amin Tabe Te Pengawus ¹⁹ Tabe ab tong da Priskila ali da Akwila nelang tong aben luhen Onesiforus. ²⁰ Da Erastus nondo te Korintus, nelang da Trofimus apu ikah ab te keadaan dongo te Melitus ²¹ Ware ko ngeto suket semale musim meringin Ebulus, Pudes, Linus, Klaudia, ngirim tabe dali tong ko; nge iro ade kawus erai butung erai kepercayaan lain ye. ²² Mudahan Tuhan nguyang ko. Mudaha Tuhan ngeberkat erai butung kawus.