¹ YESUS NGAMPUNI' BA NYAMUHOT SEKO' UROKNG ELAT Ako'taamo' ka parahu, Yesus nyubarangi' dano sampe ka koto-E sorokng. ² Lalu, tanang, ne'ido' nabanan seko' urokng elat nang tagurikng ka tampat tidur. Waktu nanang iman ne'ido' Yesus ba kato ka urokng elat koo, "Koatotnlah atingu, anak-Ku, dosangu dah dingampuni'." ³ Ako' koo, sangape eko'ahli Taurat ba kato kadoop atie, "Urokng nyian nyaranoh!" ⁴ Tapi, Yesus nahui' pikoran ne'ido', kata-E, "Damwo kau mikirotn nang jahat doop atingu? ⁵ Nang mae labih mudoh, bakato, " Doso-dosongu diampuni'," atau bakato, Umpatlah lalu bajootnlah'? ⁶ Tapi, supayo kau biso nahui' bahawo ka dunio Anak manusio ba kuaso sa' ngampunio' doso.". Ako' koo, Yesus bakato ka urokng lumpuh koo, "Umpatlah, angkatlah tampat tidurngu, lalu puoknglah!" ⁷ Umpatlah io lalu puokng. ⁸ Tapi, waktu urokng rami nanang io nyian, ne'ido' jadi heran lalu mamulioot Allah nang mare' kuaso angayo koo ka manusio. MATIUS PANGUMPUL PAJAK NUNO'OTN YESUS ⁹ Waktu Yesus dari ampat dikoo, Io nanang urokng nang di nyaru' Matius gi' duduk ka tampat pangumpulotn pajak. Lalu, Yesus bakato ka io, "Tuno'otnlah Aku." Lalu, Matius badiri nuno'otn Yesus. ¹⁰ Waktu Yesus duduk makotn ka doop rumoh koo, tanang, manyak pangumpul pajak ba urokng-urokng badoso atokng, lalu duduk makotn barage Yesus ba murid-murid-E. ¹¹ Lalu, waktu urokng-urokng Farisi nanang hal nyian, ne'ido' bakato ka murid-murid-E, "Dameo Gurungu makotn barage urokng-urokng pangumpul pajak ba urokng-urokng badoso?" ¹² Tapi, watu Yesus nangar barito koo, Io bakato, "Ne'ido' nang sehat ino' paralu dukun, malainkan ne'ido' nang sakit. ¹³ Tapi, ampuslah lalu palajari'lah dameo artie nyian, 'Aku narapotn balas kasihotn, buke'nyo buis,' sabab Aku atokng buke' nyaru' nang banar, malainkan urokng-urokng ba doso." PATANYAAN MASALAH BAPUASA ¹⁴ Ako' koo, murid-murid Yohanes atokng ka Yesus lalu batanyo', "Dameo kami ba urokng-urokng Farisi ba puasa, tapi murid-murid- Ngu ino' ba puasa?" ¹⁵ Lalu, Yesus ba kato ka ne'ido', "biso ge' pangiring panganten repo-repo salamo panganten angaki masih ba ne'ido'? Tapi, dah mao' sampe waktue panganten angaki koo di icokng ampat ka ne'ido', lalu ako' koo ne'ido' ba puasa." ¹⁶ Ano' ado seko' urokng pun nang nambal kain nang barahu ka pakean nang lamo, karamo tambalan koo ngarantak pakean nang lamo lalu, makin ayo'lah rantake. ¹⁷ Ugo', ino' ado urokng nang ngehotn anggur barahu ka doop kantong kuit nang lamo. Kalo jakoo, kantong kuit pasti rantak, lalu anggure pasti tumpoh, lalu kantong kuite lalo'. Tapi, ne'ido' nohatni' anggure nang barahu ka kantong kuit nang barahu pula' jadi dua- duae tapiharo." YESUS MANGKITOTN LALU NYAMUHOTN ¹⁸ Samantaro Yesus ngatootn hal-hal nyian ka ne'ido', tanang, seko' urokng pamimpin rumoh ibadoh atokng lalu nyamboh Io, sambil bakato, "Anak ambiniku baru ajo' mati. Tapi, atokng lalu puanganlah kokot-Ngu ka atase, jadi io pasti idup." ¹⁹ Lalu, Yesus umpat lalu nunoot urokng koo, jakoo ugo' mirid-murid-E ²⁰ Lalu, tananglah, seko'urokng ambini nang dah bajaro rongko' pendarahan salamo dua balas tahutn nyeketi Yesus ampat ka balakang lalu nyameh ujukng jubah-E, ²¹ sabab ambini koo bakato ka diri'e sorokng, " kalo aku nyameh jubah-E ajo', aku pasti samuh." ²² Tapi, Yesus babalik lalu nanang ambini koo, lalu bakato, " Koatotnlah atingu, he anak-Ku, imanngu dah nyamuhot diri'ngu." Sajakoo ugo' samuhlah ambini koo. ²³ Waktu Yesus ngaramus ka rumoh kapalo rumoh ibadoh koo lalu nanang panyiup soleng ba karumunan urokng nang ngamuat kabisingan, ²⁴ Io bakato ka urokng-urokng koo, "Ampuslah, karamo anakngu ambini koo ino' mati, malainkan io agi' tidur." Lalu, ne'ido' ngatawoot Yesus. ²⁵ Tapi, waktu urokng manyak koo dah di ngoser kauar, Yesus taamo' lalu naapi' kokot kamudo' koo, kamudo' bini koopun umpat. ²⁶ Barito nyian tasabar ka saluruh daeroh koo. YESUS NYAMUHOTN DUO UROKNG BUTO' ²⁷ Waktu Yesus dah dari ampat ka koo, duo urokng buto' nunoot Io sambil kampak-kampak, "Kasihatni'lah kami, anak Daud." ²⁸ Ako' Io namai' rumoh koo, kaduo urokng buto' angkoo ngatakngi' Io sambil batanyo' ka ne' ido', "Picayo' ge kau kalo Aku biso ngarajaan hal nyian?" Ne'ido' ba kato ka Io, "Au, Tuhan!" ²⁹ Ako' koo, Yesus nyameh mato ne'ido', ja kata-E, "Jadilah ka kau manurut imanngu.". ³⁰ Lalu, tabuko'lah mato ne'ido'. Yesus tagas ngingati' ne'ido' , "Paratiotn boh, ame ado seko' urokngpun nang nahui hal nyian." ³¹ Tapi, ne'ido' kauar lalu nyabarotn barito Yesus kasaluruh daerah koo. YESUS NYAMUHOTN UROKNG AWO' ³² Ako'duo urokng koo kauar, tananglah, urokng-urokng nabanan seko' urokng awo' nang di ngarasuki' roh jahat ka Yesus. ³³ Ako'roh jahat koo di ngoser, urokng awo' koopun biso bakato. Urokng manyak koo taheran-heran lalu ba kato "Hal macam nyian nape' suoh ditanang ka Israel." ³⁴ Tapi, urokng-urokng Farisi bakato, "Io ngoser roh jahat make panguaso roh jahat." MANYAK ASILE SADIKIT NANG BAKARAJO ³⁵ Lalu, Yesus ampus ngulilingi samuo koto ba kampokng sambil ngjar ka sinagoge-sinagoge ne'ido', lalu maritoot Injil Karajaan, sambil nyamuhotn sagalo panyakit ba nang kasakitotn. ³⁶ Waktu Yesus nanang urokng manyak koo, Io maraso kasih ka ne'ido' karamo ne'ido' latih talantar angayo domba-domba ino' ba gambalo. ³⁷ Ako' koo Io bakato ka murid-murid-E, "Sasungguhe, pahanyian manyak, tapi pakarajo- pakarajoe sadikit, ³⁸ Karamo koo, minto'lah ka Tuhan ampu' pahanyian, sa' ngirimano' pakarjo-pakarajo ka pahanyian-E."