¹ Lalu, Yesus nyaru' ka duobalas Murid-E lalu mare' ne'ido' kuaso roh-roh najis sa' ngoser roh-roh koo, sa' nyamuhotn sagalo macam panyakit mao'pun sagalo macam pasakitotn ² Nyianlah namo-namo ka duobalas rasul koo: Nang partamo, Simon nang di sabut Petrus, lalu, Andreas kamaru'e lalu Yakobus anak Zebedeus, Yohanes kamaru'e, ³ Filifus, lalu, Bartolomeus, Tomas, lalu Mateus si pangumpul pajak, Yakobus anak Alfeus, lalu Tadeus, ⁴ Simon urokng Zelot, kalu Yudas Iskariot nang ngianati' Yesus. ⁵ Yesus ngirim ka duobalas rasul koo lalu marentohotn ne'ido', "Ame ampus ka marago bangso-bangso lain mao'pun taamo'ka koto urokng Samaria, ⁶ malainkan ampuslah ka domba-domba nang tasasat ka antaro umat Israel. ⁷ Lalu,salamo kau ampus, kabarotnlah sambil ba kato, 'Karajaan Sarugo dah samak.' ⁸ Samuhotnlah nang rongko', idupotn nang mati, barasihotnlah nang laeko, lalu oserlah roh-roh jahat. Kau narimo' paracomo, bareotn seo-seo. ⁹ Ame kau nabanan amas, ato perak, ato timago kadoop ikat pinokng ngu, ¹⁰ ato tas sa' pajaanan ngu, ato duo ete' baju, ato sandal ato tungkat sabab seko' urokng pakarajo pantas sa' makanane. ¹¹ Lalu, di koto maopun kampokng mae nang kau namai', salidiki'lah sape nang pantas kadaapme lalu diopmlah ka na'un sampe kau barangkat. ¹² Waktu kau taamo' ka rumoh koo, bare'lah salam. ¹³ Lalu, kalo rumoh koo pantas, biarlah damai sejahterangu turutn atase, tapi kalo ino' biarotnlah damai sejahterangu puokng ka kau. ¹⁴ Lalu, sape sajo' nang ino' narimo' kau mao'pun bai' nangar katangu, waktu kau kauar ampat ka rumoh mao'pun koto koo, kibasotnlah dabu pahangu. ¹⁵ Aku ngatootn nang sabanareka kau bahawo ari nyianpangakiman, tanoh Sodom ba Gomora pasti biso nanggong io daripado koto koo." KASULITOTN-KASULITOTN NANG PASTI DIADAPI PARA MURID ¹⁶ "Tanang, Aku ngirim kau angayo domba ka tangoh-tangoh serigala. Karamo koo, jadilah ba akal angayo uar ngan baik angayo burukng-burukng daro. ¹⁷ Tapi, ati-atilah ka urokng-urokng karamo ne'ido' pasti nyarohotn kau ka Sanhedrin lalu nyambuk kau ka sinagoge-sinagoge ne'ido'. ¹⁸ Lalu, kau pasti di tabanan ka adapotn para panguaso ba para rajo karamo Aku, sa' kasaksian ka ne'ido' ba bangso-bangso lain. ¹⁹ Tapi, waktu ne'ido' nyarohotn kau, ame gai' tantang jamae ato ameo nang kau ngatootn karamo waktu koo gae pasti di bareot ka kau dameo nang arus kau katootn. ²⁰ Sabab, buke' kau nang bakato, tapi koo Roh Bapo'ngu nang bakato kadoopm diri'ngu. ²¹ Kamaru' pasti nyarohotn kamaru'e ka kamatiotn, bapo' ka anake. Lalu, kamudo'-kamudo' pasti malawan ka urokng tuho lalu munuh ne'ido'. ²² Kau pasti di tegetotn samuoe karamo dama-Ku, tapi urokng nang batahan sampe pangabisan pasti di salamatotn. ²³ Waktu ne'ido' ngarumayai' kau ka koto koo, darilah ka koto nang lain. Aku ngatoot nang sabanare ka kau bahawo kau pasti ino' ako' ngalewati koto-koto Israel sampe Anak Manusio atokng. ²⁴ Murid ino' malabihi' gurue, jakoo ugo' ambo ino' malabihi tuane. ²⁵ Cukuplah kalo murid manjadi angayo gurue, lalu amboe manjadi angayo tuane. Kalo ne'ido' nyabut tuan rumoh koo Beelzebul, labih buruk agi' ka anggota kaluargae." GAI'LAH KA ALLAH BUKE' KA MANUSIO ²⁶ "Karamo koo, ame kau gai' ka ne'ido' sabab ino' ado dameopun nang tatutup nang ino' di bungkaro', mao'pun nang ino' gari' nang ini' di tahuio'. ²⁷ Ameo nang Aku katoot ka kau doop ka kakapotn, katootnlah koo doop tarokng. Lalu, dameo nang kau nangar di biaikotn ka tarenyekngu, baritootnlah ka atas atap rumoh. ²⁸ Ame gai' ka ne' ido' nang munuh jiwo maopuntubuh ka narako. ²⁹ Buke' ge' duo eko' burukng pipit di juo sa' sete' duit? Lalu, ino' seko'pun ampat ka ne'ido' nang janto' ka tanoh salain kamao'an Bapo'ngu. ³⁰ Malah, buuk kapalangu samuoe ta itung. ³¹ Karamo koo, ame gai', kau labih ba nilai daripado manyak burukng pipit." NGAKOI' YESUS KA ADA0TN UROKNG LAIN ³² "Jadi, satiap urokng nang ngakoi' Aku ka adapotn manusio, Aku ugo'pasti ngakoi' io ka adapotn Bapo'-Ku nang ado ka sarugo. ³³ Tapi, sape nang masangkootn Aku ka adapotn manusio, Aku ugo' pasti masangkoot io ka adapot Bapo'-Ku nang ado ka sarugo.". TUJUAN KAATANGAN YESUS ³⁴ "Ame bapikir bahawo Aku atokng nabanano' padamaiotn ka bumi. Aku atokng buke' nabanano' padamaiotn, malainkan mando. ³⁵ Sabab, Aku atokng sa' misohotno' angaki ampat ka bapo'-e, ambini ampat ka inu'-e, minantu ambini ampat datu'-e, ³⁶ ugo' musuh seko' urokng ampat ka kaluargae. ³⁷ Sape nang labih ngasihi' bapo' ba inu'-e daripado Aku, ino' baik bagi-Ku. Lalu, sape nang labih ngasihi' anak-e angaki maopun ambini daripado Aku, ini' baik bagi-Ku. ³⁸ Lalu, sape nang bai' mikut salib-e ba nunoot Aku, ino' baik bagi-Ku. ³⁹ Sape nang batahan ka nyawae pasti kailangan nyawae, lalu, sape nang kailangan nyawae karamo Aku pasti namuan io." UPOH AMPAT KA ALLAH ⁴⁰ "Sape nang narimo'kau, narimo' kau. Lalu, sape nang narimo' Aku, narimo' Io nang ngirim Aku. ⁴¹ Sape nang narimo' nabi doop namo nabi pasti narimi' upoh nabi. Lalu, sape nang narimo' urokng banar doop namo urokng banar pasti narimo' upoh urokng banar. ⁴² Lalu, sape nang mare' nyocok ka saloh seko' urokng-urokng nang enek nyian biarpun kahe sagalas ai' dingin doop namo seko' murid, Aku ngatoot nang sabanare ka kau, ino' upahe angito'."