¹ Waktu Yesus ako' marentoh ka duabalas mued-E Io ampus ampat ka naun mao ngajar ngan ba khotbah ka koto-koto ne' ido'. YESUS BA YOHANES PAMBABTIS ² Kanio', waktu Yohanes, nang ado ka pinjaro, nangar pakarajaan-pakarajaan Kristus, io ngirim pasotn malalui' murid-murid-e, ³ lalu batanyo' ka Io, "Kau ke nang atokngo' koo, ato harus ke kami nuggu nang laine?" ⁴ Yesus nyahut lalu ba kato ka ne'ido', "Ampus lalu bataki' Yohanes dameo nang dah kau nangar ba nang kau nanang, ⁵ nang buto' nanang, nang elat bajootn, nang laekootn di marasihotn, nang bango nangar, nang mati di mangkitotn, lalu ka urokng-urokng sontok di baritoorn Injil. ⁶ Lalu, di barakatilah urokng nang ino' Ku santuh." ⁷ Lalu, ako' ne'ido' dari, Yesus mulai ba kato ka urokng manyak tantang Yohanes, "Ameo nang mao' kau tanang ka doop udas? Sabatokng buuh nang angin nyiup? ⁸ Kau ampus nanango' dameo? Seko' urokng nang bapakean alus? Ne'ido' nang ba oakean alus koo ado ka istana-istana rajo. ⁹ Nanango dameo kau ampus? seko' urokng nabi? io koo bo labih ayo'agi daripado nabi. ¹⁰ Sabab, iolah urokng nang masalahe dah ta tulis: 'Tanang! Aku ngirim utusan-Ku ngadohoi' Kau. Io nang nyiapotn marago-Ngu ka adapotn-Ngu.' MALEAKHI 3:1 ¹¹ Aku ngato'otn nang sabanare ka kau, di antaro ne'ido'nang di maranakotn ambini, gi' ino' suoh tampil urokng nang labih ayo' daripado Yohanes pambabtis. Tapi, nang paling enek doop Karajaan Sarugo, daripado io. ¹² Mulai' zaman Yohanes pambabtis sampe kanio, Karajaan Sarugo bajaro ngalami kakarasotn, urokng-urokng nang kajam koo ngarahaan io sacaro pakso. ¹³ Sabab, samuo nabi ba Hukum Taurat ba nubuat sampe jaman Yohanes. ¹⁴ Lalu, kalo kau mao narimo' io, iolah Elia nang mao' atokng koo. ¹⁵ Sape nang ado ba tarenyekng sa' nangar, pastilah io nangarotn! ¹⁶ Tapi, ba dameo ke aku bandingano' generasi nyian? Ne'ido' koo angayo kamudo'-kamudo' enek nang duduk ka tampat umum, nang nyaru'- nyaru' ayukng-ayuknge, ¹⁷ lalu bakato, ' kami nyiupotn soleng ka kau, tapi kau ino' nari kami barenyoh lagu sadih , tapi kito' ino' sadih.' ¹⁸ Karamo Yohanes atokng ino' makotn, ugo' ino' nyocok, lalu ,ne'ido' bakato, 'Io karasukotn roh jahat.' ¹⁹ Tapi, waktu Anak Manusio atokng lalu makotn ba nyocok, lalu ne'ido' bakato, 'Tanang seko' urokng nang rakus pangamabuk, ayukng para pangumpul pajak ba urokng-urokng badoso.' Tapi, hikmat di banarotn parambuatan-e PARINGATOTN KA UROKNG NANG BAI' PICAYO' ²⁰ Ako' koo Yesus mulai' ngarebehi' koto-koto tampat Io paling manyak ngamuat mujisat karamo ne'ido' ino' batobat. ²¹ Cilakolah kau, Betsaida! Sabab, kalo mujisat-mujisat nang dah tajadi ka antarangu ugo' tajadi ka Tirus ba Sidon, ne'ido' dah lamo ba tobat ba pakean kabung ba abu. ²² Tapi, Aku ngatoot ka kau bahawo ari pangakiman, Tiris ba Sidon biso nanggong io daripado kau. ²³ Lalu,kau, Kapernaum, pasti ke kau di tingiotn sampe ka angit? Ino' kau pasti di turunan ka dunio urokng mati, sabab kalo mujisat-mujisat nang dah tajadi ka antarangu koo tajadi ka Sodom, koto koo tatap ado sampe ari nyian. ²⁴ Tapi, aku ba kato ka kau bahawo pado ari nyian pangakiman, tanoh Sodom pasti labih biso nanggong io daripado kau." KAPASOT UROKNG NANG DAH ATOKNG KA YESUS ²⁵ Waktu koo Yesus bakato, "Aku mulioot Kau, Bapo' ,Tuhan atas angit ba bumi, bahawo Kau napukot samuo nyian ampat ka urokng-urokng nang bijaksano ngan pane, lalu madohot ka kamudo' enek. ²⁶ Au, Bapo', karamo angayo koo lah nang baguno ka adapatn-Ngu. ²⁷ Sagalo sasuatu dah Bapo'-Ku nyarohot ka Aku. Lalu, ino' Seko' urokngpun nganali' Anak, salain Bapo; ino' nganali' Bapo' salain Anak lalu satiap urokng nang di mao'an Sang Anak mao' madohot io. ²⁸ Atoknglah ka Aku, samuo nang latihq ngango nang ba masaloh barat, lalu Aku pasti mare' kapuasot. ²⁹ Pikutlàh kuk nang Ku masang, lalu baajarlah ka Aku karamo Aku lamoh lamut ba randoh ati, lalu Aku pasti namu ka tanangan doop jiwangu. ³⁰ Sabab, kuk nang Ku masang koo mudoh lalu baban-Ku rehetn."