¹ Wakru Yesus turutn ampat ka bukit koo, manyak karumunan urokng nunaan Io. ² Lalu, tanang, ado urokng nang ba panyakit laeko atokng ka Io, lalu nyamboh ka adapatn-E lalu ba kato, "Tuan, kalo Kau mao', Kau biso marasihotn aku." ³ Lalu, Yesus nyoo'ot akaokot-E nyameh io, ja kato-E, "Aku mao', barasihotnlah." langsung di marasihotnlah laeko urokng koo. ⁴ Lalu, Yesus bakato ka io, "paratianlah, ame kau ba curito ameo-meo ka sapepun, tapi ampuslah, tanangan diri'ngu ka imam, kau sambohot buis ngu nang di parentohotn Musa sa' kasaksian ka ne'ido'." SEKO' PALAYAN PERWIRA ROMAWI DI NYAMUHOTN ⁵ Waktu Yesus taamo' ka Kapernaum, atokng seko' perwira ka Io, ⁶ lalu ba kato, "Tuan, amboku tagurikng lumpuh ka rumoh, bajaro sidi." ⁷ Lalu, Yesus bakato ka io,"Aku pasti atokng nyamuhotn io." ⁸ Tapi perwira koo nyahut lalu ba kato, "Tuan, aku ino' pantas kalo Kau taamo' ka baboh atapku, tapi katootnlah sapatoh kato ajo'lalu amboku biso di samuhotn. ⁹ Sabab, aku ugo' urokng nang di baboh kakuasaan, ba tantara-tantara ka babohku. Lalu, aku bakato ka nang seko', 'ampuslah,' iopun ampus, lalu ka nang lain,' Atoknglah,' iopun atokng, lalu ka amboku, ' karajaan nyian,' lalu io ngarajaan." ¹⁰ Waktu Yesus nangar hal nyian, Io heran lalu bakato ka urokng-urokng nang nunootn Io, "Aku bakato nang sabanare ka kau, Aku nape' namuan iman sa ayo' nyian ka antaro urokng Israel. ¹¹ Aku ba kato ka kau bahawo manyak nang mao' atokng dari timur ba barat, lalu duduk makot ba Abraham, Ishak, Yakub doop karajaan Sarugo, ¹² tapi kamudo'-kamudo' karajaan koo dibuokng ka doop kagalapotn nang paling galap. Dinaun nano ado ratapotn ba garekotn gigi." ¹³ Lalu, Yesus ba kato ka pawira koo, "Ampuslah, biarotn ameo nang tajadi ka kau angayo nang kau picayai'." Lalu, ari koo ugo' amboe disamuhotn. DATU' PETRUS BA UROKNG MANYAK NANG DINYAMUHOTN ¹⁴ Waktu Yesus atokng karumoh Petrus, Io nanang datu' Petrus gurikng damam ¹⁵ Lalu, Yesus nyameh kokot inu'e koo, lalu ilang damame. lalu umpat ngalayani' Yesus. ¹⁶ waktu dah mao' maam, rami ne'ido' nabanan urokng nang karasukotn roh jahat, lalu Io ngoser roh-roh jahat koo kahe ba kato, lalu nyamuhotn samuo urokng nang rongko', ¹⁷ supayo diganapilah dameo nang di katootn Nabi Yesaya: "Iolah nang ngicokng kalamohotn- kalamohotn diri' lalu nanggong panyakit- panyakit diri'." Yesaya 53:4 JAJI PANGIKUT YESUS ¹⁸ Kanio', waktu Yesus nanang urokng manyak ka sakaliling- E, Io marentohotn ampus ka subarang. ¹⁹ Lalu, ado seko' ahli Taurat nang atokng ba kato ka Io, "Guru, aku nunootno' Kau kamae sajo' Kau ampus." ²⁰ Lalu, Yesus ba kato ka io, "para rubah ado ba ubokng burukng ka angit ado ba sarokng. Tapi, anak manusio ano' ba tampat sa' muangano' kapala-E." ²¹ Seko' murid ba kato ka Io, " Tuhan, ijinan aku doho' ampus nyuburo' bapo'ku." ²² Tapi, Yesus ba kato ka io, " Tunootnlah Aku, lalu biarotnlah urokng mati nyubur urokng mati ne'ido' sorokng." YESUS MARANTIOTN BADAI ²³ Lalu, waktu Yesus naik ka parahu, murid-murid-E nunootn Io. ²⁴ Lalu, tananglah, ado badai ayo' ka dano lalu parahu koo tatutup gaumokng. Tapi, Yesus tidur. ²⁵ Lalu, murid-murid ngatakngi' Yesus lalu ngunaki' Io, katae, "Tuhan, salamatotn kami! Diri' biso binaso!" ²⁶ Lalu, Io bakato ka ne'ido', " Dameo kau gai', hai kau nang kurang ba iman?" Lalu, Io badiri ngagap angin ka dano koo, ako' koo jadi diam sidi. ²⁷ Jadi, urokng-urokng koo ka- mangoan lalu ba kato, "Urokng macam dameo Io nyian, angin ba danopun nurut ka Io?" DUO UROKNG GADARA KARASUKOTN ROH JAHAT ²⁸ Waktu Yesus atokng ka subarang dano, ka daerah uroknh Gadara, duo urokng nang karasukotn roh jahat namui' Io. Ne'ido' kauar ampat ka patunuan ganas sidi sampe ano' ado urokng nang biso ngalewati' marago koo. ²⁹ Lalu, tananglah, ne'ido' ngampak, katae,"Ameo urusan antaro Kau ba kami, he Anak Allah? Kau atokng mao' nyiksoo' kami sanape' waktue ge?" ³⁰ Lalu, ampare' jauh dari ne'ido' ado saparinu'ot enyekng nang bagago' makanan. ³¹ Setan-setan koo minto' ka Io sambil ba kato, "kalo Kau mao' ngoser kami, suruhlah kami meoh kadoop kumpulotn enyekng- enyekng koo." ³² Lalu, Yesus bakato ka ne'ido', "Dari gih!" lalu, ne'ido' kauar lalu taamo' ka doop enyekng-enyekng koo. Ako' koo, samuo enyek nang saparinu'ot koo tarajutn ka tabikng dano lalu mati kadoop ai'. ³³ Urokng-urokng nang ngiring enyekng saparinu'ot koo dari, lalu taamo' kadoop koto, lalu nyaritoot samuae, tamasok ameo nang tajadi ka urokng-urokng nang di ngarasuki' setan koo. ³⁴ Lalu, tananglah, samuo koto kauar mao' batamu ba Yesus. Waktu nanang Yesus, ne'ido' minto' Io ningoot wilayah ne'ido'.