¹ "Ame manghakimi' supayo kau ano' di hakimi'. ² Karamo, panghakiman nang kau make sa' manghakimi', kau pasti di hakimi', lalu ukuran nang kau make sa' ngukur pasti di ukurotn ka kau. ³ Lalu, ngameo kau nanang semperotn kayu ka mato kamaru' ngu, tapi ino' nahui' balo' nang ado ka matangu sandiri? ⁴ Jamae biso kau bakato ka kamaru' ngu 'Biar aku ngauarot semperan kayu koo ampat ka matangu,' tapi tanang, ado balo' ka matangu sandiri'? ⁵ Hai, urokng munafik, kauarotn doho balo' koo ampat ka matangu, baru kau jalas nanang ngauaratno' semperan kayu ampat ka mato kamaru' ngu. ⁶ Ame mareotn barang nang kudus ka asu'-asu'. ame pula nabakotn mutiarangu ka adapotn enyekng supato ne'ido' ano' ninyak-ninyak io ba pahae lalu babalik ngajet kau.". MINTO'LAH, GAGO'LAH, LALU, DODOKLAH ⁷ "Minto'lah, pasti barang koo di bareot ka kau. Gago'lah, pasti kau namu. Dodoklah, pasti kau di bukootn. ⁸ Sabab, tiap urokng nang minto', io narimo' lalu , urokng nang ba gago' pasti io namu, lalu bagi io nang nodok pasti di bukootn. ⁹ Sape ge' di antaro kau, kalo anake minto' roti lalu di bare' batu ka anake koo? ¹⁰ Kalo anake minto' ikotn, ino' mungkinkan anake koo di bareo' uar? ¹¹ Jadi, kalo kau nang jahat ajo' nahui mareo' anak-anakngu pamare'-pamare'ot nang baik, labih-labih agi' Bapo'ngu nang ka Sarugo, Io pasti mare' nang baik ka ne'ido' nang minto' ka Io." UKUMAN NANG NOMOR SATU ¹² "Karamo koo, sagalo sasuatu nang kau mao' pasti urokng bare' ka kau, jakoo ugo' kau harua mare'ka ne'ido' karamo nyianlah isi' Hukum Taurat ba kitab para nabi." MARAGO NOTOK KAIDUPOTN ¹³ "Taamo'lah lalu ka garabang nang sampit karamo ibarlah garabang ba ayo'lah marago nang notok ka kabinasoot, rami nang taamo' lalu di koo. ¹⁴ Sabab, sampitlah garabang ba sasaklah marago nang notok ka kaidupotn, sadikit nang namuan iyo." PARINGATOT TANTANG NABI-NABI PALSU ¹⁵ "Tapi, ati-ati ka nabi- nabi palsu nang atokng ka kau ba baju domba, tapi sabanare ne'ido' koo sarigalo-sarigalo nang ganas. ¹⁶ Dari buahelah kau nganali ne'ido'. Biso ke urokng ngumpulotn buoh-buoh anggur ampat ka jarami' ba duri ngan buoh aro' ampat ka puhutn-puhutn baduri? ¹⁷ Jakoo ugo' tiap puhutn nang baik pasti ba buoh baik, tapi puhutn nang ano' baik pasti babuoh ano' baik. ¹⁸ Puhutn nang baik ino' mungkin ba buoh nang ino' baik, puhutn nang ino' baik ino' mungkin ba buoh nang baik. ¹⁹ Satiap puhutn nang ino' ba buoh nang baik di tabokng di buokng ka doop api. ²⁰ Jadi, ampat ka buah-buahe kau nganali' ne'ido'. ²¹ Ino' samuo urokng nang ba kato ka Aku, 'Tuhan, Tuhan,' pasti taamo' ka Karajaan Sarugo, malainkan io nang ngarajaan kahandak Bapoku nang kasarugo. ²² Waktu ari koo, pasti manyak urokng nang bakato ka Aku, 'Tuhan, Tuhan, buke' ke kami bakarajo doop namo-Ngu ngoser roh-roh jahat doop namo-Ngu, lalu ngamuat mujizat doop namo-Ngu? ²³ Lalu, Aku pasti nyampeotn ka ne'ido', 'Aku ino' suoh nganali' kito'! Dari kito' kasio, kau nang ngarajaan kasalohotn!" NANGAROTN BA NGARAJAAN ²⁴ " Karamo koo, samuo urokng nang nangar kato-kato-Ku nyian lalu nuruti io pasti angayo urokng bijaksano nang ngamuat rumahe ka atas batu. ²⁵ Lalu, turutnlah ujotn ba boho', angin atokng ngibas rumoh koo,rumoh koo ino' roro' karamo di madiri ka atas batu. ²⁶ Lalu, satiap urokng nang nangar kato-kato-Ku nyian lalu ino' nuruti' io pasti angayo urokng bodo nang ngamuat rumahe ka atas pasir. ²⁷ Lalu, atokng ujotn atoknglah boho', angin muput rumoh koo, rumoh koo ruboh, ayo' sidi rusake." ²⁸ Waktu Yesus ako' ngatoot hal nyian, manyak urokng nang taheran-heran ka pangajaran-E, ²⁹ karamo Io ngajar ne'ido' angayo urokng nang bakuaso, ino' angayo ahli-ahli Taurat ne'ido'.