¹ "Ati-atilah ngarajaan kawajipot agamo ngu ka adapotn manusio, ame ba maksud mao' di tanang ne'ido'. Kalo jakoo, kau ano' narimo'o upoh ampat ka Bapo ngu nang kasarugo. ² Karamo koo, wakru kau mare' urokng sadakoh, ame munyian sarompet ka adapotngu angayo nang urokng-urokng munafik ngarajaan di sinagoge-sinagoge ba nang ka marago-marago biar ne'ido' di puji urokng lain. Aku bakato nang sabanare ka kau bahawo ne'ido' dah narimo' upahe. ³ Tapi, waktu kau mare sadakoh, ame biarotn kokot keba'ngu nahui dameo kokot kanan ngu ngarajaan, ⁴ supayo sadakahngu koo ani' ditahui lalu Bapo ngu nang nanang io mare'upoh ka kau." AJAROTN MASALOH BADO'A ⁵ "Lalu, waktu kau bado'a, ame angayo urokng-urokng munafik karamo ne'ido' suko badiri bado'a di sinagoge-sinagoge ka etok -etok marago supayo ditanang urokng lain. Aku bakato nang sabanare ka kau, ne'ido' dah narimo' upahe. ⁶ Tapi, waktu kau bado'a taamo'lah kadoop kamarngu lalu tutuplah pintue, bado'a ka Bapo ngu nang ado ka tampat sunyi', Bapo ngu nang nanang kau ka tampat koo pasti mare' upoh ka kau. ⁷ Lalu, waktu kau ba do'a ame make kato-kato nang ano'ado artie, angayo urokng- urokng nang ano' nganal Allah, sabab ne'ido' ngiro kalo manyak kato-kato, ne'ido' pasti di dangarotn. ⁸ Karamo koo, ame angayo ne'ido' karmo Bapo' ngu nahui ameo nang kau paraluotn sanape kau minto ka Io. ⁹ Bado'alah jaiyo, 'Bapo' kami nang ka Sarugo, di kudusotnlah Nama ngu. ¹⁰ Atoknglah karajaan Ngu, jadilahkamao'an Ngu ka bumi angayo ka Sarugo. ¹¹ Bareotnlah ka kami,pado ari nyian, Makanan kami nang sacukupe. ¹² Lalu, ampuni'lah kasalohot-kasalohot kami, angayo kami ugo' ngampuni' urokng-urokng nang basaloh ka kami. ¹³ Amelah nabanan kami ka doop pancobaan tapi apasotnlah kami ampat nang jahat. Karamo Kaulah Sang Ampu' Karajaan, bakuaso ba kamuliaan sampe salama-lamae. Amin.' ¹⁴ Karamo kalo kau ngampuni kasalohotn-kasalohotn urokng lain, Bapo' surgawi ngu ugo' pasti ngampuni' kau. ¹⁵ Tapi, kalo kau ino' ngampuni' kasalohotn-kasalohotn urokng lain, Bapo' ngu ugo' ino' akan ngampuni' kasalohotn ngu." KAADAAN DIRI WAKTU BAPUASA ¹⁶ Lalu, waktu kau ba puasa, ame susoh angayo urokng munafik karamo ne'ido' ngaruboh muhae supayo urokng lain tanang agi' bapuasa. Aku bakato nang sabanare ka kau bahawo ne'ido' dah narimo upahe. ¹⁷ Tapi, kau, waktu bapuasa, minyaki'lah kapalangu lalu sasoh muhangu ¹⁸ supayo puasangu ano' urokng tanang, tapi Bapo'ngu nang ado ka tampat sunyi'. Lalu, Bapo'ngu nang nanang parambuatan ngu ka tampat sunyi' koo pasti maas kau." KOMOOANLAH HARTO KA SARUGO ¹⁹ "Ame nimbun sa' diri'ngu sorokng harto ka bumi, tampat panyanget ba tagar ngarusak, lalu tampat pangait babongkar ba ngait. ²⁰ Tapi, kumpulan sa' diri'ngu sorokng harto ka sarugo, tampat panyanget ba tagar ano' ngarusak lalu pangait ano' ba bongkar ba ngait. ²¹ Karamo ka tampat harto ngu koo,di koo ugo' ado atingu." ²² "Mato nyian pulito tubuh. Jadi, kalo matangu baik, saluruh tubuhngu jadi tarokng. ²³ Tapi, kali matangu jahat, saluruh tubuhngu jadi galap. Jadi, saaruse tarokng nang ado ka kau jadi kagalapotn, kakap sidi kagalapotn koo." ²⁴ Ino' ado urokng nang biso ngalayani' duo urokng tuan karamo io pasti negetotn tuan nang seko' lalu ngasihi' nang laine, kali ino'pun patuh ka nang seko' lalu ngaremehotn nang laine.Kau ino' biso ngalayani' Allah ba mamon." AME KAU GAI' ²⁵ "Sabab koolah Aku bakato ka kau, ame gai' masalah idupngu, ameo nang kau makotno' ameo nang kau cocoko'. Jakoo ugo' masalah tubuhngu, ameo nang kau pakeo'. Buke' ge' idup labih palalu dari pado makanan, tubuh daripado pakean? ²⁶ Tananglah burukng-burukng nang ka angit nang ino' ngamur, ino' bahanyi, ino'ugo' ngomo'an kadoop kusong, tapi Bapo' Sarugawi ngumare ne'ido' makotn. Buke'ge kau labih barago daripado ne'ido'? ²⁷ Sape ge' diantaro kau karamo gai' biso namboh sajangko umure? ²⁸ Lalu, masalah pakean, dameo kau gai'? Paratiotn bungo bakokng ka utotn, jamae io biso idup, io ino' bakarajo ino' ugo' io mamintal, ²⁹ tapi Aku bakato ka kau bahawo Salomo doop sagalo kamuliaanepun ino' bapakean angayo saloh sete bungo-bungo koo. ³⁰ Jadi, kalo rumput ka utotn, nang ado ari nyian ba ampagi di tabakotn kadoop parapiotn, Allah ngariasi io sajakoo rupo, buke'ge' talabih agi' kau, hai kau nang kurang iman? ³¹ Karamo koo, ame kau gai' lalu bakato, 'Ameo nang kami makatno'?', lalu ameo nang kami cocoko'?', 'Ameo nang kami pakeo'?' ³² Sabab bangso- bangso lain bagago' samuae nyian Bapo' Sarugowi ngu nahui' bahawi kau palalu ka samuo nyian. ³³ Tapi, gago' doho' Karajaan ba kabanarotn-E, samuae koo ditamohotn ka kau. ³⁴ Jadi, gai' masalah ampagi karamo ampagi pasti magai'i diri'e sorokng. Cukuplah kamie arie ba kasusahatne sorokng."