¹ Waktu nanang urokng manyak koo, Yesus naik ka atas bukit. Waktu Io dah duduk, murid-murid-E atokng ka Io. ² Io muko' moot-E ngajari' ne'ido', ja kata-E ³ "Dibarakatilah urokng nang sontok ka doop roh karamo Karajaan Sarugo koo nu' ne'ido'. ⁴ Dibarakatilah ne'ido' nang repo-repo karamo ne'ido' mao' diibur. ⁵ Dibarakatilah urokng nang lamut atie karamo ne'ido' nang mawarisi' dunio. ⁶ Dibarakatilah ne'ido' nang kaparotn ba aus kabanarotn karamo ne'ido' pasti kanyang. ⁷ Dibarakatilah ne'ido' nang ba baas kasihot karamo ne'ido' pasti namu baas kasihot. ⁸ Dibarakatilah ne'ido' nang barasih atie karamo ne'ido' pasti nanang Allah. ⁹ Dibarakati ne'ido' nang nabanan damai karamo ne'ido' pasti disabut anak-anak Allah. ¹⁰ Dibarakatilah ne'ido' nang sinyikso demi kabanarotn karamo ne'ido' nang namu Karajaan Sarugo. ¹¹ Dibarakatilah kau kalo urokng ngina kau nyikso kau, lalu makatai' kau ba kato-kato nang jahat nuduh kau gara-gara Aku. ¹² Basanang-sanang ba repo-repolah karamo ayo' upahngu ka Sarugo karamo jakoolah ne'ido' nyikso nabi-nabi sanape kau." GAROPM BA TAROKNG DUNIO ¹³ "Kau garopm dunio, tapi kalo garopm koo jadi tawar, badameo masitnio' io? Io ano' baguno agi' salain dibuokng lalu ditinyak-tinyak manusio." ¹⁴ "Kau tarokng dunio. Koto nang ka atas bukit koo ano' biso di tapukotn. ¹⁵ Urokng-urokng ino' nutukng sensan lalu muangan io ka baboh gantang, malainkan ka atas poho sensan, lalu io narakngi samuo nang ado kadoop rumoh. ¹⁶ Biarlah tarakngu ugo' bacahayo supayo ne'ido' biso nanang pabuatotngu nang baik mamuliakan Bapo'ngu nang ka Sarugo." NGANAPOTN HUKUM TAURAT BA KITAB PARA NABI ¹⁷ "Ame bapikir Aku atokng lalu ngilangano' Hukum Taurat mao'pun kitab para nabi. Aku atokng buke' ngilangano' io malainkan mangganapi io. ¹⁸ Aku bakato nang sabanare ka kau,sampe angit ba dunio balalu, ano' ado sege' titik atau sege' garispun nang bakal ilang dari Hukum Taurat sampe samuae diganapi. ¹⁹ Karamo koo, sape nang ngilangan sege dari parentoh- parentoh paling enek nyian lalu ngajarotn urokng lain supayo ngalakuotn hal nang sabayo, io disabut nang paling enek doop karajaan Sarugo. Tapi , sape nang ngalakuotn parentoh-parentoh koo lalu ngajarotn io disabut ayo' doop Karajaan Sarugo. ²⁰ Karamo, aku ngatoot ka kau kalo kabanaratngu ano' labih baik dari pado kabanarot ahli-ahli Taurat ba urokng-urokng Farisi, kau samo sakai ano' masok kadoop Karajaan Sarugo. MANGANAI UROKNG NANG BERO KA KAMARU'E ²¹ Kau dah nangar nang di ngatoot ka nenek moyang diri, "Ame munuh,' lalu, sape nang munuh pantas di tabanan ka pangadilan." ²² Tapi Aku bakato kakau sapepun nang bero ka kamaru'e pantas di ukum, sapepun nang bakato ka kamaru'e, 'Kamu tolol,' pantas diadapotn ka Mahkamah Agama, lalu, sapepun nang bakato, 'Kau bodo,' io pantas barado kadoop api narako. ²³ Karamo koo, kalo kau nyambohotn buisngu di atas altar, dikoo kau taringat ka kamaru'ngu ado sasuatu ka kau, ²⁴ tingootlah buisngu ka altar lalu ampuslah doho' badamai ba kamaru'ngu, ako' koo puakngi agi' buisngu baru' di sambohotn. ²⁵ Sa ancang mungkin, badamailah ba urokng nang nuduh kau sa agi' kau ka pajaanan ba io supayo ame panuduhngu koo nyarohot kau ka hakim, lalu hakim koo nyarohot kau ka pagawe-e, lalu kau ditamaan kadoop pinjaro. ²⁶ Aku bakato nang sabanare ka kau, kau ino' akan suoh kauar sanape kau mayar sen nang pangabisan. "UROKNG NANG BABAYO' ²⁷ "Kau dah nangar ameo nang dikatoot 'Ame babayo'.' ²⁸ Tapi, Aku bakato ka kau tiap urokng nang nanangan ambini lalu mao' ka io, io dah babayo' ba ambini koo ka doop atie. ²⁹ Kalo' mato kanan ngu ngamuat doso, sungkit buokng matangu koo. Sabab, labih baik kau kailangan saloh sege anggota tubuhngu daripado saluruh tubuhngu dibuokng kadoop narako. ³⁰ Lalu, kalo' kokot kanan ngu ngamuat doso, tatak lalu buoknglah kokotngu koo karamo labih baik kailangan sege anngita tubuhngu daripado saluruh tubuhngu dibuokng kadoop narako. ATURAN PACAREOTN ³¹ Dah dingatoot: Sape nang macareot binie arus mare' surat care ka binie koo. ³² Tapi,Aku bakato ka kau sape nang nyareot binie, gara-gara babayo', io ngamuat binie babayo'. Lalu, sape nang panganten ba ambini nang dah dinyareot koo, io ugo' babayo'. MANGANAI SUMPOH ³³ Sakai agi', kau dah nangar nang di ngatoot ka nenek moyang diri', 'Ame basumpoh palsu, tapi panuhi supoh ngu koo ka adapotn Tuhan.' ³⁴ Tapi, Aku bakato kakau: ame sakai-sakai kau ba sumpoh, demi sarugo karamo sarugo koo tahta Allah, ataupun demi bum karamo bumi koo panahan paha-E, ³⁵ ataupun demi Yerusalem karamo koo koto Sang Rajo Ayo'. ³⁶ Ame ugo' kau basumpoh demi kapalangu karamo kau ano' dapat ngamuat sete' buukpun, putih maopun itopm. ³⁷ Tapi , bakatolah au' kalo au', ino' kalo ino', karamo nang salabihe dari koo ba asal ampat ka si jahat. MANGANAI PAMBALASAN ³⁸ Kau dah nangar dameo nang dah dingatoot, 'Mato ganti mato, gigi ganti gigi.' ³⁹ Tapi,aku bakato ka kau ame malawan nang jahat, malainkan sape nang nampar koko' kanan, bareot ugo' koko' nang laine ugo'. ⁴⁰ Lalu, kalo ado urokng nang mao' nuntut kau ngicokngo' bajungu, bareot ugo' jubohngu ka io. ⁴¹ Lalu, sape nang makso kau bajoot ba io sajauh 2 mil. ⁴² Bare'otn ka urokng nang minto' ka kau ame ditolak urokng nang mao' minyopmo' ka kau." KASIHI'LAH MUSUHNGU ⁴³ "Kau dah nangar nang difirmankan, 'Kasihilah Sabayangu,' lalu tegetotn musuhngu.' ⁴⁴ Tapi, Aku bakato ka kau, kasihilah musuh- musuhngu lalu bado'alah untuk urokng-urokng nang ngarumayai' kau, ⁴⁵ jadi kau biso jadi anak-anak Bapo'ngu nang ka sarugo karamo Io nang narabitotn mataari-E untuk nang jahat ba nang baik, nurunan ujotn untuk nang banar ba nang ino' banar. ⁴⁶ Sabab, kalo kau kasih ka urokng-urokng nang ngasihi kau, upoh dameo nang kau tamuo'? Buke'ge' pangumpul pajak jakoo ugo'? ⁴⁷ Lalu, kalo kau mare salam kahe ka kamaru-kamarungu ameo labihe parambuatan ngu? Buke'ge' urokng-urokng nang ano' kanal ka Allah ugo' babuat jakoo ? ⁴⁸ Karamo koo, kau arus jadi sampurna, angayo Bapo'ngu nang ka Sarugo Io sampurna."