¹ IBLIS NYOBAI YESUS Ako' koo, Yesus di kapalai Roh ampus ka udas mao dicobai iblis. Lalu, ² Io bapuasa ampat puluh ari ampat puluh maam, ako' koo io kaparotn. ³ Lalu, atoknglah io nang nyobai koo, bakato ka Yesus, "Kalo Kau anak Allah, parentohotnlah supayo batu-batu nyian biso jadi roti." ⁴ Io nyahuti," Ado tatulis, 'Buke' ba roti ajo' manusio biso idup, tapi ba firman nang kauar dari moot Allah." ULANGAN 8:3 ⁵ Ako'koo iblis nabanan Io ka kota suci io muangan Io ka oncok Bait Allah, ⁶ lalu bakato ka Io, "Kalo Kau Anak Allah, buoklah diri'ngu kababoh karamo ado tatulis: Kalo' Kau, Allah pasti marentohotn malaekat-malaekat-E ngangkat Kau kaatas kokot ne'ido' supayo paha-Ngu ano' nyipak batu." Mazmur 91:11-12 ⁷ Yesus bakato ka io, "sakai agi' ado tatulis, " Kau ame nyobai Tuhan Allahngu." Ulangan 6:16 ⁸ Sakai agi' Iblis nabanan Yesus ka atas bukit nang paling tingi lalu magariot ka Io samuo karajaan dunio ba kamagahatne, ⁹ lalu bakato ka Io, "Samuhae nyian ku bareot ka Kau, jalo Kau tiharap nyamboh aku." ¹⁰ Ako' koo, Yesus bakato ka io, "Darilah, iblis! Ado tatulis, 'Kau arus nyamboh Tuhan Allahngu lalu ka Io ajo' kau sambayang." Ulangan 6:13 ¹¹ Ako'koo Iblus ningoot Io, tananglah, malaeka-malaekat atokng sa' ngalayani' Io. YESUS MULAI PALAYANAN-E KA GALILEA ¹² Lalu, waktu Yesus nangar Yohanes dah di nangkap, Io dari ka Galilea. ¹³ Io ningoot Nazaret ngaramus lalu diop di Kapernaum, katapi dano, di perbatasan Zebulon ba Naftali, ¹⁴ Supayo diganapi' dameo nang dikatoot malalui Nabi Yesaya: ¹⁵ "Tanoh Zebulon ba tanoh Naftali, marago dano, kasabarang Yordan, Galilea, wilayoh urokng-urokng nang buke Yahudi , ¹⁶ bangso nang diop ka kakapotn nanang tarokng nang ayo', bagi ne'ido' nang diop ka nagari doop bayang-bayang kamatiotn, tarokng koo dah tarabit. Yesaya 9:1-2 ¹⁷ Sajo' waktu koo, Yesus mulai' bakhotbah lalu bakato "Batobatlah karamo karajaan sarugo dah samak!" YESUS NYARU' AMPAT MURID-E NANG PAMULO ¹⁸ Waktu Yesus bajoot ka sisi dano Galilea, Io nanang ado duo baradi', Simon nang di nooh Petrus, ba Andreas, baradi'e gi' nyalo ka dano karamo ne'ido' panjalo ikotn. ¹⁹ Lalu, Io bakato ka ne'ido', "Je nunoot Aku Aku nyadiot kau panjalo manusio." ²⁰ Ne'ido' langsung ningoot jalo-jaloe lalu nunoot Io. ²¹ Waktu ne'ido' ampus kana'un, Io nanang duo baradi' nang lain, Yakobus anak Zebedeus dan Yohanes, baradi'e. Ne'ido' sege' parahu ba Zebedeus, bapo' ne'ido', gi' maiki' jala-jalae. ²² Ne'ido' langsung ningoot bapo'e kaparahue, lalu nunoot Yesus. YESUS NGAJAR BA NYAMUHOT MANYAK UROKNG ²³ Ako'koo Yesus ba kuliling ka saluruh Galilea, ngajar di sinagoge-sinagoge ne'ido' maritoot Injil Karajaan, sambil nyamuhotn sagalo macam panyakit,sagalo mcam kasakitotn urokng. ²⁴ Lalu, barita-E tasabar kasaluruh Siria. Lalu, ne'ido' nabanani samuo urokng nang sakit nang nagarotn panyakit ba raso sakit, nang karasukotn setan, nang gilo babi, nang lumpuh, samuo Io nyamuhotn. ²⁵ Karumunan urokng rami manyak nang atokng ampat ka Galilea, Dekapolis, Yerusalem, Yudea, ampat ka subarang Yordan nunoit Io.