¹ Kanio, atokng ka oopme, samuo imam kapalo ba para tuho-tuho bangso koo dah bapakat manganai' Yesus nang mao' di ukum mati. ² Lalu,ne'ido' ngikat Yesus, lalu dinabanan di nyarohotn ka Gubernur Pilatus. YUDAS MUNUH DIRI'E ³ Waktu Yudas, nang nyarohotn Yesus, nanang bahawo Yesus di ngukum, io maraso nyasal lalu muangan 30 kapikng perak ka imam-imam kapaloba para tuho-tuho , ⁴ ja katae, " Aku dah badoso karamo nyarohotn daroh nang ino' basaloh." Tapi ne'ido' bakato, " Dameo urusane ba kami? Nang koo urusan ngu!" ⁵ Lalu, Yudas nabakotn kapikng-kapikng perak koo ka doopm Bait Allah lalu io ningootn. lalu io ampus ngatukng diri -e. ⁶ Tapi, ima-imam kapalo ngicakngi kapikng-kapikng perak koo lalu bakato, "Ino' dibanarotn nohatnio' io ka doopm pambandaharoot ⁷ karamo nyian rago daroh." Mangkenyo' ne'ido' sapakat ba duit koo, ne'ido' mali tanoh tukang kenceng sa' tampat patunuan urokng-urokng asing. ⁸ Koolah sabab e, tanoh koo disabut ' Tanoh Daroh' sampe ari nyian. ⁹ Kalo dah jakoo , ganaplah dameo nang Nabi Yeremia ngatootn: "Ako' koo ne'ido' ngicokng 30 kapikng perak. Koolah rago diri'-E nang dah di taksirotn urokng-urokng Israel. ¹⁰ Ne'ido' magunaan 30 japikng perak sa' mali tanoh tukang kenceng angayo nang dah Tuhan parentohotn ka aku." YESUS BA GUBERNUR PILATUS ¹¹ Kanio', Yesus badiri ka adapotn Gubernur lalu Gubernur ba tanyo' ka Io, " Kau ge Rajo urokng Yahudi?" Yesus nyahuti', "Au' angayo nang kau ngatootn koo." ¹² Tapi, waktu Io dituduh imam-imam kapalo ba para tuho-tuho koo, Io ino' nyahut dameopun. ¹³ Ako'koo, Pilatus bakato ka Io, "Ino' nangar ge' Kau samanyak ne'ido' nuduh kai?" ¹⁴ Tapi, Yesus ino' nyahuti Pilatus, sete' tuduhotnpun ino' Io sahuti' Gubernur koopun jadi heran. PILATUS INO' BISO MEBASOTN YESUS ¹⁵ Kanio'' pado tiap ari rayo, Gubernur biasae mebasotn manyak urokng, tahanan nang mae nang ne' ido' mao'an. ¹⁶ Pado waktu koo, ne'ido' ado seko' tahanan nang takanal, nang io Barabas. ¹⁷ Jadi, waktu urokng rami bakumpul, Pilatus ba tanyo ka ne'ido', "Sape nang kito' mao'an tok ku bebasotn Barabas ato Yesus, nangdi nyabut Karistus?" ¹⁸ Sabab, Pilatus nahui' bahawo karamo dangki, ne'ido' dah nyarohotn Yesus ka io. ¹⁹ Pas waktu Pilatus gi' duduk ka bangku pangadilotn, binie ngirimi' pasotn ka io, "Ame di ameaan ka Urokng banar koo. Sabab, dah manyak hal majaro aku ka doopm mimpi garo- garo Io." ²⁰ Tapi, imam-imam kapalo ba para tuho-tuho minto' ka urokng rami buar Barabad nang bebas lalu munuh Yesus. ²¹ Gubernur batanyo' ka ne'ido', " Nang mae duo urokng koo nang kito' mao'an supayo di bebasotn? Lalu, ne'ido' bakato, "Barabas!" ²² Pilatus ba kato ka ne'ido', " kalo jakoo, dameo nang arus aku karajaan ka Yesus, nang di sabut Karistus?" Ne'ido' samuo ba kato "Salipotn Io!" ²³ Lalu, Pilatus batanyo', "Dameo? Io dah ngarajaan kajahatotn dameo?" Tapi, ne'ido' ngampak labih koat agi', "Salipotn Io!" ²⁴ Waktu Pilatus nanang bahawo io ino' ngakootn dameopun, malah karusuhotn mulai' tajadi, io ngicokng ai' lalu nyasoh kokote ka adapotn urokng rami koo lalu ba bakato, "Aku ino' basaloh ka daroh urokng nyian. Koo urusanngu sorokng!" ²⁵ Lalu, samuo urokng koo nyahut, "Daroh-E ado ka kami ba anak-anak kami!" ²⁶ Ako' koo, Pilatus ngapasotn Barabas karamo kamao'an ne'ido' ako' ngamati' Yesus, Pilatus nyarohotn Io tok di salipotn. TANTARA PILATUS NGOLO'-NGOLO' YESUS ²⁷ Ako' koo , para tantara Gubernur nabanan Yesus ka markas kadiaman gubernur lalu ngumpulotn saluruh pasukotn Romawi ngulilingi' Io. ²⁸ Ne'ido' mukai' pakean Yesus lalu makeotn juboh ungu ka Io. ²⁹ Lalu ako' ngayam mahkota baduri sabayo-bayo, ne'ido' makeotn ka kapalo Yesus, sabatokng buuh ka kokot kanan-E, lalu nyamboh ka adapatn-E, lalu ngolo'an Io, ja kato ne'ido', "salam, Rajo urokng Yahudi!" ³⁰ Ne'ido' ngaujahi' Io, ngicok ng buuh koo, lalu di mangkongan ka kapalo-E. ³¹ Ako' ne'ido' ngolo'an Io, ne'ido' muko' juboh ungu koo lalu makeotn agi' pakean-E sandiri', lalu nabanan Io ampus nyalipatno' Io. YESUS DI NYALIPOTN ³² Waktu tantara koo kauar, ne'ido' batamu ba seko' angaki ampat ka Kirene nang badamo Simon. Ne'ido' makso Simon mikut salip Yesus. ³³ Lalu, waktu ne'ido' ngaramus ka sabuoh tampat nang badamoGolgota, nang ba arti "Tampat Tangkorak", ³⁴ Ne'ido' mare' Io anggur sa' di cocok nang dah dinyampur padu', lalu ako' Io ngacap Io bai' nyocok io. ³⁵ Waktu ne'ido' nyalipotn Yesus, ne'ido' magi- magiotn pakean-E diantaro ne'ido' ado nang muang undi. ³⁶ Ako' koo,ne'ido' duduk sambil ngawasi' Io dikoo. ³⁷ Lalu, ka atas kapala-E, ne'ido' masang ameo nang di nuduhotn ka Io, "NYIANLAH YESUS, RAJO UROKNG YAHUDI." ³⁸ Pado waktu koo, ado duo urokng panjahat nang di nyalipotn barage Yesus. Seko' sabaloh kanan lalu seko' ka sabaloh kebo'. ³⁹ Lalu, urokng-urokng nang lewat ngolo'an Io sambil manggeleng -geleng kapalo, ⁴⁰ sambil bakato, "Kau nang ngarobohatno' Bait Allah lalu ngamuato' io agi' doopm talu ari, salamatotnlah diri'-Ngu sandiri'! Kalo Kau Anak Allah, turutnlah Kau ampat ka salip koo!" ⁴¹ Ja koolah ugo' imam- imam kapalo ba ahli ahli Taurat, ba para tuho-tuho ngolo'an Yesus,ja kato ne'ido', ⁴² "Io nyalamatotn urokng lain, tapi Io ino' biso nyalamatotn Diri'E sandiri. Kalo Io koo Rajo Israel, biarlah Io turutn ampat ka salip koo kanio' lalu diri' pasti picayo' ka Io. ⁴³ Io picayo' ka Allah, makae biarotn Allah nyalamatotn Io kanio', kalo Allah mao'an Io. Karamo Io sandiri' nang ba kato, 'Aku nyian Anak Allah.'" ⁴⁴ Para panjahat nang di nyalipotn barage ba Io koo ngolo'an Io ugo'. KAMATIOTN YESUS ⁴⁵ Kanio', ampat jam ka anam, kagalapotn ka saluruh tanoh koo, sampe jam ka sambilan. ⁴⁶ Kiro-kiro, pado jam ka sambilan, Yesus ngsmpak loat sidi, ja kata-E, "Eli, Eli, lama sabakhtani?" nang ratie, "Allah-Ku-Allah-Ku, dameo Kau ningootn Aku?" ⁴⁷ Lalu, ado sangape urokng ne'ido' nang badiri di naun, waktu ne'ido' nangar koo, ne'ido bakato, "Urokng nyian nyaru' Elia." ⁴⁸ Tibo-tibo, seko' ampat ka ne'ido' batalamo' lalu ngicokng bungo karang, io masai' ba anggur masam, lalu io ngikatotn ka sabatokng buuh,lalu di mareotn ka Yesus sa' dicocok. ⁴⁹ Tapi, nang salabihe ba kato, "Je' diri' nanang, atokng ge ino' Elia nyalamatotn Io." ⁵⁰ Lalu, Yesus ngampak sa kai agi' koat sidi lalu nyarohotn Roh-E. ⁵¹ Lalu, tanang, tirai ka doopm Bait Allah rantak jadi duo, mulau' ka atas sampe ka baboh, lalu dunio baguncokng, lalu batu-batu tabaloh. ⁵² Patunuan-patunuan tabuko', lalu manyak tubuh-tubuh urokng-urokng suci nang dah mati dimangkitotn. ⁵³ Lalu, ako' kauar ampat ka patunuan- patunuane, ako' kabangkitotn Yesus, ne'ido' taamo' ka kota suci lalu magari'otn diri'E ka urokng rami. ⁵⁴ Kanio' kapalo rombongan, lalu ne'ido' nang barage ba io ngawasi' Yesus, waktu ne'ido' nanang gempa bumi ba samuo hal nang tajadi nyian, jadi ba gai'atni' lalu ba kato, "Banar, Io nyian Anak Allah!" ⁵⁵ Ka naun, ado rami ambini nang nanang ampat kajauhotn, nang nunootn Yesus ampat ka Galilea sa' ngalayani' Io. ⁵⁶ Ka antaro ne'ido' ado Maria Magdalena, Maria inu' Yakobus ba Yusuf, anak-anak Zebedeus. YESUS DINYUBUR ⁵⁷ Waktu ari dah mao' maam, atoknglah seko' urokng kayo ampat ka Arimatea badamo Yusuf, nang suohjadi murid Yesus. ⁵⁸ Io ampus ka Pilatus lalu minto' tubuh Yesus. Lalu, Pilatus marentohotn supayo tubuh Yesus di bareotn ka Yusuf ⁵⁹ Lalu , Yusuf ngicokng tubuh Yesus, lalu mungkus Io ba kain linen nang barasih, ⁶⁰ lalu di magurikng ka doopm patunuan nang barahu, nu'e sandiri', nang dah io ngai' ka bukit batu. Lalu, Yusuf ngulingan batu ayo' ka pintu patunuan koo lalu dari. ⁶¹ Lalu, di naun, ado Maria Magdalena ba Maria nang lain agi' duduk ka adapotn patunuan koo. PATUNUAN YESUS DI NYAGO ⁶² Ari barikute , ako' nyiapotn sa' Sabat, imam-imam kapalo ba urokng-urokn Farisi di ngumpulotn ka adapotn Pilatus. ⁶³ Ne'ido' bakato, "Tuan, kami ingat bahawo, waktu si pangalok koo masih idup, Io suoh bakato, " Ako" talu ari, Aku pasti bangkit agi'.' ⁶⁴ Karamo koo, parentohotnlah supayo patunuan koo di jago sampe ari nang ka talu,kalo-kalo murid-E mungkin atokng lalu ngait Io, lalu bakato ka urokng rami, 'Io dah bangkit ampat ka urokng mati.' Lalu, panipuotn nang pangabisan nyian paati labih buruk daripado nang pamulo." ⁶⁵ Pilatus bakato ka ne'ido', "Kau ado ba panyago. Ampus, jagolah ayamae nang kau nahui'." ⁶⁶ Lalu, ne'ido' ampus ngamanan patunuan koo barage ba kalompok panjago, lalu nyegel batu panutup patunuan koo.