¹ Kanio' ako' Sabat, waktu dah daniari, ari pamuli minggu koo, Maria Magdalena ba Maria nang laine ampus nanango' patunuan koo. ² Lalu, tanang, tajadilah gampa bumi nang ayo' karamo malaekat Tuhan turutn ampat ka Sarugo,atokng lalu ngulingan batu koo, ako' koo duduk ka atase. ³ Muhae angayo kilat lalu pakeane putih angayo salju. ⁴ Karamo gai'ka io,ne'ido' nang bajago koo baguncokng lalu jadi angayo urokng mati. ⁵ Lalu,malaekat koo bakato ka ambini- ambini di koo, "Ame gai' karamo aku nahui' kalo kito' ngagui' Yesus nang dah di nyalipot. ⁶ Io ino' ado kasio karamo Io dah bangkit angayo nang dah Io ngatootn. Je', tananglah tampat Io gurikng. ⁷ Ancang nang ampus lalu bataki' murid-murid-E bahawo Io dah bangkit ampat ka urokng mati, lalu tanang, Io ngadohoi' kito' ka Galilea. Ka naun, kito' pasti nanang Io. Paratiotnlah, aku dah madohotn io ka kito'." ⁸ Lalu, ne'ido' bagancang- baganceh ningootn patunuan koo raso gai' ba repo; lalu batalamo' matakio' murid-murd-E. ⁹ Lalu, tanang, Yesus namui' ne'ido' lalu bakato, "Salam!" Lalu, ne'ido' atokng ka Yesus, nyameh pah-E, lalu nyamboh Io. ¹⁰ Ako' koo, Yesus bakato ka ne'ido', "Ame gai'; ampus lalu bataki'lah kamaru'-kamaru'-Ku suruh ampus ka Galilea, di naun, ne'ido' pasti nanang Aku." PARA PANYAGO PATUNUAN DI MAYARI' SUPAYO ALOK ¹¹ Samantaro ne'ido' ampus, ado sangape urokng panyago ampus ka koto mataki' imam-imam kapalo tantang samuo hal nang dah tajadi. ¹² Lalu, waktu ne'ido' di ngumpulotn ba para tuho-tuho. Ako' barunding lalu ne'ido mareot manyak duit ka panyago koo, ¹³ lalu bakato, "Katootn, 'Murid-murid Yesus atokng pado maam ari lalu ngait Io wakti kami tidur.' ¹⁴ Lalu, kalo hal nyian tadangar ka gubernur, kai pasti ngamuat io picayo' supayo kito' ino' gai'." ¹⁵ Jadi, ne'ido' narimo'lah duit koo lalu ngatootn angayo nang di ngajarotn ka ne'ido'; lalu kato-kato koo masih nyabar ka antaro urokng Yahudi sampe ari nyian. PASOTN AGUNG YESUS ¹⁶ Ako' koo, kasabalas murid ampus ka Galilea, ka bukit nang dah dinojokotn Yesus ka ne'ido'. ¹⁷ Waktu, ne'ido' nanang Io, ne'ido' nyamboh Io. Tapi, ado nang bagantangan. ¹⁸ Lalu, Yesus atokng lalu bakato ka ne'ido', "Sagalo kuaso dah di mare'otn ka Aku, kasarugo mao'pun ka dunio. ¹⁹ Karamo koo, ampuslah lalu muritotnlah samuo bangso, parmandi'anlah ne'ido' doopm damo Bapo', ba Anak, ba Roh Kudus, ²⁰ ajari'lah ne'ido' supayo taat ka samuo nang Aku parentohotn ka kau; lalu tananglah, Aku salalu ado ba kau sampe pangabisan zaman."