¹ Waktu koo, murid-murid atokng ka Yesus lalu ba tanyo', "Sape ge' nang paling kayo' ka karajaan Sarugo?" ² Lalu, Yesus nyaru' seko' kamudo' enek atokng ka Io, lalu nampatotn kamudo' enek koo ka tangoh-tangoh ne'ido', ³ lalu ba kato, "Aku ba kato nang sabanare ka kau, kacoali kau ba tobat la jadi angayo kamudo'-kamudo', kau pasti ino' taamo' ka doop Sarugo. ⁴ Sape nang ngarandohotn diri'e angayo kamudo' nyian nang koolah io nang paling ayo' ka doop Sarugo. ⁵ Lalu, sape nang narimo' kamudo' enek seko' nyian doop dama-Ku, io narimo' Aku." NGINGATI' TANTANG PANYABAB DOSO ⁶ "Tapi, sape nang nyasatotn seko' ka kamudo'-kamudo' enek nang picayo' ka Aku nyian, labih baik ka io kalo sege' batu kilangan di gantungan ka tege'e lalu di tingoopotn ka laut nang paling doop. ⁷ Cilakolah dunio karamo panyasatotn-panyasatotn nang ado ka daapme! Sabab, panyasatotn memang arus tajadi, tapi cilakolah urokng nang ngatangan io. ⁸ Kalo kokot ba pahangu ngamuat kau badoso, tatak lalu buoknglah koo. labih baik kau taamo' ka doop idup ba kokot nang kutukng ato pincang daripado kokot ba poho duo ete', tapi di buokng ka doop apu narako kakal. ⁹ Kalo matangu ngamuat kau badoso, coek lalu buoknglah koo. Labih baik kau taamo' ka doopm idup ba sege' mato, daripado ba mato duo tapi di buokng ka narako api." ¹⁰ "Paratiotnlah, ame kau ngaremehotn seko'pun kamudo' enek nyian. Sabab, Aku ngatoot ka kau bahawo malaekat-malaekat ne'ido' ka Sarugo salalu nanang muho Bapa-Ku nang ka Sarugo. ¹¹ (Sabab, Anak Manusio dah atokng sak nyalamatatno' urokng nang ilang.) PARUMPAMAAN TANTANG DOMBA NANG ILANG ¹² Jamae pandapat ngu? Kali seko' urokng ado 100 eko' domba, tapi nang seko'e sasat, ano' ge' urokng koo ningootn nang 99 eko' koo ka bukit laly ampus ngagui' seko' nang sasat koo? ¹³ Lalu, kalo io namuan io, sasungguhe Aku ngatootn ka kau,io labih karepootn ka seko' nang sasat koo daripado nang 99 nang ino'sasat koo. ¹⁴ Jakoo ugo'lah, buke'lah kamao'an Bapo-Ngu nang ka Sarugo kalo seko' kamudo' enek nyian binaso." NGAJARI' UROKNG NANG BASALOH ¹⁵ "Kalo kamaru' ngu badoso, ampus tojokotn kasalahatne, antaro kau ba io sorokng ajo'. Kalo io nangarotn kau, ba arti kau dah namuan kamaru' ngu. ¹⁶ Tapi, kalo io ini' nangarotn kau, babolah seko' ato duo urokng agi' ba kau supayo ampat ka moot duo, talu urokng nyian saksie, tiap katae di tatapotn. ¹⁷ Kalo io bai' nangarotn ne'ido', sampeotn hal koo ka umat. Lalu, kalo pun io nolak ugo' nangarotn umat, kaatie io jadi angayo bangso-bangso lain ba pangumpul pajak. ¹⁸ Aku ba kato nang sabanare ka kau bahawo dameo nang kau ikat ka dunio pasti ta ikat ka Sarugo. Lalu, dameo nang kau apasotn ka dunio pasti apas ugo' ka Sarugo." ¹⁹ Sakai agi', Aku ba kato ka kau bahawo kalo duo urokng ka antarangu sapakat ka dunio tantang dameo nang ne'ido' minto', nang koo pasti tajadi ka ne'ido' karamo Bapo-Ku nang ado ka Sarugo. ²⁰ Sabab, ka tampat duo ato talu urokng ba kumpul doop namo-Ku, Aku ado ka tangoh-tangoh ne'ido'. PARUMPAMAAN TANTANG PANGAMPUNAN ²¹ Ako' koo, Petrus atokng ka Yesus lalu batanyo' "Tuhan, sangapeo' kai sabanare aku ngampunio' kamaru'ku nang ba doso ka aku? sampe 6 kau?" ²² Yesus ba kato ka io, "Aku ino' ngaroot ka kau sampe 7 kai tapi sampe 70 kai kali 7 kai. ²³ Karamo koolah Karajaan Sarugo di umpamaan angayo rajo nang ngadootn paretongan ba para ambae. ²⁴ Waktu io mulai ngadootn paretongan, urokng nang barutokng samanyak 10.000 talenta di icokng ka io. ²⁵ Karamo io koo ino' mampu mayar, tuane marentohotn biar io di juo, ba binie ngan anak-anake, ugo' samuo nang ado ka io, ba nang koolah io mayar samuae. ²⁶ Jadi,ambo koo tasongkop lalu nyamboh tuane, ja katae, 'Sabarlah ka aku lalu aku pasti mayar samuae ka kau.' ²⁷ Ako' koo, tuan ambo koo kasih ka io, lalu mebasotn io, lalu mare ampunan ka utaknge koo. ²⁸ Tapi, waktu ambi koo ka uar laly baramu ba ambo laine nang varurokbg 100 dinar ja io, io nangkap lalu dinyakak ambo koo, sambil ba kato, 'Bayar duit nang kau munyop ka aku!' ²⁹ Lalu, ambi nang barutokng koo basujud sambil minto ampun, jare, 'Basabarlah ka aku karamo aku pasti mayar samuae ka kau.' ³⁰ Tapi,io muangan lalu di namaan ka pinjaro sampe biso mayar samuo utaknge. ³¹ Waktu ambo-ambo nang lain nanang kajadian koo, ne'ido' jadi susoh lalu atokng ngalapor ka tuane samuo nang dah tajadi. ³² Akoo' koo, tyane nyaru' ambae nang doho tai' lalu ba kato ka io, 'Kau ambo nang jahat. Aku ngampuni' samyo utakngu karamo kau mohon ka aku. ³³ Buke' ge' kau aruse kasih ka sabayo ambongu, angayo aku gae dah kasihotn ka kau?' ³⁴ Lalu, tuane, bero sidi, nyarohot io ka para panyikso sampe io biso mayar agi ameo nang di minjaman ka io. ³⁵ Bapa-Ku ka Sarugo ugo' pasti ngalakuotn nang sabayo ka kau, kalo kau ino' ngampuni' kamaru' ngu ampat ka doop atingu."