¹ Lalu, urokng-urokng Farisi ba Saduki atokng mao nyobai' Yesus. Ne'ido' minto' supayo Yesus magari'otn tando ampat ka Sarugo. ² Tapi,Yesus bakato, "Gumare ari, kau bakato, 'cuaca tarokng karamo angit meroh.' ³ Lalu, oopm ari, 'Ari nyian atokngo angin koat karamo angit meroh ba galap. 'Kau nahui jamae medootn rupo angit, tapi ino' mampu medootn tando-tando zaman. ⁴ Ado katurunan nang jahat, pamabayo' nyian nuntut sabuoh tando, tapi sege' tandopun ano'di bareotn ka io, kacoali tando Nabi Yunus. Lalu, Io ningootn ne'ido' laly dari. PANJALASOTN TANTANG RAGI UROKNG FARISI BA SADUKI ⁵ Waktu murid- murid ngaramus ka subarag dano, ne'ido' kaupootn nabanano' roti. ⁶ Lalu, Yesus bakato ka ne'ido', "Paratiotnlah ati-ati ngan ragi urokng-urokng Farisi ba para Saduki." ⁷ Lalu, ne'ido' mulai' ngalakarotn hal koo ka antaro ne'ido'e lalu ba kato, "Nyian karamo diri ino' nabanan roti." ⁸ Tapi, Yesus nahui' hal nyian lalu bakato, "Hei, urokng nang kurang iman, dameo kito' ngalakarotn sabayootn kito' tantang ino' ado roti? ⁹ Ameo kau masih ino' ngarati lalu ugo' ino' ingat ka lima ete' roti sak lima ribu urokng, lalu sangape manyak sisa'e nang kau ngumpulotn? ¹⁰ Ato, tujuh roti sak ampat ribu urokng, lalu sangape manyak karanjang sisa'e nang kau ngumpulotn? ¹¹ Jamae ke' kau ino' ngarati bahawo Aku ino' ngalakarotn roti ka kau? Tapi ati-ati ka ragi urokng-urokng Farisi ba para Saduki." ¹² Ako' koo, ne'ido' baru ngarati bahawo Io ino' ngatootn supayo ati-ati ka ragi roti, tapi ka ajaran urokng-urokng Farisi ba urokng Saduki. YESUS KOO MESIAS ¹³ Waktu Yesus ngaramus ka daeroh Kaisarea Filipi, Io batanyo' ka murid-murid-E "Manurut kato urokng, sape ke' Anak Manusio koo?" ¹⁴ Ne'ido' nyahut, "Sangape urokng matak Yohanes Pambaptis, nang lain ngatoot Elia, nang lain agi' ngatoot Yeremia, ato saloh seko' para nabi." ¹⁵ Lalu, Yesus batanyo' ka ne'ido', "Tapi, manurutngu, sape ke' Aku nyian?" ¹⁶ Simon Petrus nyahut, "Kau nyian Mesias, Anak Allah yang hidup!" ¹⁷ Yesus bakato ka io, "Dibarakatilah kau, Simon anak Yunus, sabab buke' daging ba daroh nang nyatootn nyian ka kau, malainkan Bapa-Ku nang ka Sarugo. ¹⁸ Lalu, Ku katoot ugo' ka kau bahawo kau nyian Petrus. Lalu, ka atas batu nyian, Aku ngamuato' jemaat-Ku ba gerbang-gerbang Hades ino' nguasaio' io. ¹⁹ Aku mareo' kau kunci karajaan Sarugo. Lalu, dameo ajo' nang kau ikat ka bumi pasti tarikat ugo' ka Sarugo. Lalu, dameo ajo' nang kau apasotn ka bumi pasti apas ugo' ka Sarugo." ²⁰ Lalu, Yesus ngingati' murid-murid-E supayo ino' mataki' sape-sape bahawo Io nyian Mesias. YESUS MATAKI TANTANG KAMATIAN-E ²¹ Mulai' saat koo, Yesus mulai' magari'ot ka murid-murid-E bahawo Io harus ampus ka Yerusalem manyak hal nang majaro Io ampat ka para urokng tuho-tuho, imam-imam kapalo, mao'pun ahli-ahli Taurat, lalu di bunuh, di bangkitotn ari ka talu. ²² Ako' koo, Petrus narik Yesus ka sampinge, nagur Io, lalu ba kato, "Tuhan, kirae Allah jauhotn hal koo dari Kau! Hal nyian ino' akan suoh tajadio' ka Kau." ²³ Tapi, Yesus mamaik lalu ba kato ka Petrus, "Darilah kau ampat ka adapatn ku, hai iblis! Kau jadi batu sandungan bagiKu sabab kau ino' natapotn pikiranngu ka hal-hal ampat ka Allah, malainkan hal-hal ampat ka manusio." ²⁴ Ako' koo Yesus bakato ka murid-murid-E, "Kade' ado nang nuno'ot Aku, io arus nyangko' diri'e, mikut salib-e, nuno'ot Aku. ²⁵ Karamo sape nang mao nyalamatotn nyawae, pasti kailangan nyawae. Tapi sape nang kailangan nyawae karamo Aku, io pasti namuan nyawae agi'. ²⁶ Ameo untunge kalo' urokng namuan saluruh dunio, tapi ka ilangan nyawae? Ato, ameo nang biso urokng bare'ot sak nganti nyawae? ²⁷ Sabab, Anak Manusio pasti atokng doop kamuliaan Bapa-E barage ba para Malaekat-E lalu maasi' satiap urokng manurut parambuatane. Aku ngatoot ²⁸ nang sabare ka kau ad sangape ueokng nang badiri ka sio nang ino' ngalami'o' kamatiotn sampe ne'ido' nanang Anak Manusio atokng ka karajaan-E."