¹ Ako' koo ado sangape urokng Farisi ba ahli-ahli Taurat ampat ka Yerusalem atokng ka Yesus sambil ba kato, ² "Dameo murid-murid-Ngu ngalanggar kabiasaan nenek moyang? Sabab, ne'ido' ino' ba sasoh kokot waktu nakotn roti!" ³ Lalu, Yesus nyahut sambil bakato ka ne'ido', "Lalu, dameo kau ngalanggar parentoh Allah demi kabiasaanngu? ⁴ Karamo Allah ba Firman, 'Hormatilah bapo' ba inu'ngu,' lalu, 'Sape nang nyumpahi' bapo' ba inu'e, arus di ukum mati'. ⁵ Tapi kau ba kato "Sape sajo nang ba kato ka bapo' ba inu'e, 'Dameopun nang di bareot ka kau dah ako'di sambohot ka Allah," ⁶ io ino' paralu hormati' bapo' ato inu'e.Dah jakoo, kau marantiot firman Allah demi kabiasaanngu. ⁷ Kau, urokng-urokng munafik, memang banar nubuat Yesaya tantang kau: ⁸ Bangso nyian manghormati Aku ba moot ne'ido', tapi ati ne'ido' jauh ka Aku. ⁹ Lalu, paracumo ne'ido' nyamboh Aku tapi ngarajaan parentoh-parentoh manusio." ¹⁰ Lalu, Yesus nyaru' urokng rami sambil ba kato, "Dangar lalu artiotnlah! ¹¹ Buke' dameo nang taamo' kadoopm moot nang ngotori' urokng, tapi dameo nang kauar ampat ka moote, nyianlah nang ngotori' urokng." ¹² Lalu, atoknglah murid- murid Yesus batanyo' ka iyo, "Nahui ke' Kau urokng-urokng Farisi tasinggung waktu io nangar kato koo?" ¹³ Tapi, Yesus nyahut lalu bakato, "Satiap tanaman nang ano' ditanam Bapa-Ku nang ka Sarugo mao di babut sampe ka akar-akare. ¹⁴ Biarot'n ne'ido'. Ne'ido' pangerengan-pangerengan buto' ampat ka urokng-urokng buto'. Lalu, kalo urokng buto' ngerengan urokng buto', dua-duae pasti janto ' ka doop ubokng." ¹⁵ Petrus ba kato ka Io, "Jalasotnlah parumpamaan koo ka kami," ¹⁶ Yesus bakato, "Masih nape ngarati ugo' k kau? ¹⁷ Ino' ngarati ugo' k kau bahawo samuo nang taamo' ka doop moot pasti turutn ka parut lalu di buokng ka jamotn? ¹⁸ Tapi, ameo nang kauar ampat ka moot timu ka doop ati, angkoolah nang ngotori' urokng. ¹⁹ Karamo ampat ka ati timu pikiran-pikiran jahat, pabunuhan, babayo', doso-doso sex, pangait, nuduhi'urokng. ²⁰ Hal-hal nyianlah nang ngotori' urokng, tapi makotn ino' basasoh kokot ino' ngotori' urokng." YESUS NOLONG AMBINI KANAAN ²¹ Ako' koo, Yesus dari ampat ka naun lalu ampus ja daerah Tirus ba Sidon. ²² Lalu, ado seko' ambini Kanaan nang ba asal ampat ka daerah koo atokng lalu ngampak, "Kasihilah Aku, Tuhan, Anak Daud! Anak ambiniku karasukotn roh jahat paroh sidi." ²³ Tapi, Yesus ino' nyahuti' ambini koo, sapatoh katopun. Lalu, murid-murid-E atokng lalu makso Io, jare ne'ido', "Suruhlah io dare karamo io tarus-manarus ngampak ka tomokng diri'." ²⁴ Lalu, Io nyahut sambil ba kato, "Aku kahe di ngirim ka domba-domba nang angit ampat ka umat Israel." ²⁵ Ako' koo, ambini koo ngatakngi' lalu nyamboh ka adapotn Yesus, ja katae, "Tuhan, tolonglah aku!" ²⁶ Tapi, Yesus nyahut sambil ba kato, "Ino' baik ngicokng roti nu' kamudo'-kamudo' lalu di tabakotn ka asu'-asu'." ²⁷ Ambini koo nyahut, "Banar, Tuhan, tapi asu'-asu' koo makotn remahan-remahan nang janto ampat ka mejo tuane." ²⁸ Ako' koo, Yesus bakato ka io, "He ambini, iman ngu ayo'! Tajadilah ka kau angayo kamaoan ngu." Pado koo ugo', anak ambinie di samuhot. YESUS NYAMUHOT MANYAK UROKNG ²⁹ Yesus dari ampat ka naun, bajoot katapi dano Galilea. Lalu ako' naki ka atas bukit, Io duduk di naun. ³⁰ Ako' koo, karumunan urokng rami atokng ka Io, nabanani urokng-urokng nang elat, cacat, buto', awo' manyak agi' nang laine. Lalu, ne'ido' ngiringan urokng-urokng koo ka poho Yesus lalu Io nyamuhot ne'ido', ³¹ jadi bo urokng manyak koo kamangapotn waktu ne'ido' nanang nang awo' biso ba kato, nang cacat samuh, nang elat biso ba jootn, lalu nang buto' biso nanang. Lalu, ne'ido' muliootn Allah Israel. YESUS MARE' MAKOTN KA UROKNGLABIH DARI AMPAT RIBU ³² Lalu,Yesus nyaru murid-murid-E sambil ba kato, "Aku kasih ka urokng- urokng koo karamo ne'ido' dah sabayo-bayo ba Aku salamo talu ari ano' ba makanan.Lalu, Aku bai' nyuruh ne'ido' puokng kaparotn supayo ne'ido' ino' pingsan ka marago." ³³ Ako' koo, para murid ba kato ka Io, "Ampat kamae diri' namuo roti nang manyak ka tampat sunyi' nyian sa' nganyangano' urokng nang rami nyian." ³⁴ Yesus batanyo' ka ne'ido', "sangape manyak roti nang ado ka kito'?" ne'ido' nyahut, "Tujuh, lalu ado sangape eko' ikotn enek." ³⁵ Lalu, Yesus marentohotn urokng rami koo duduk ka tanoh. ³⁶ Ako' koo, Io ngicok ka tujuh ete' roti ba ikotn-ikotn koo. Lalu, sambil mangucap syukur,Io macoh-macohotni', lalu di mare'atni' ka murid-murid-E, lalu muri-murid-E mare'atni' ka urokng manyak koo. ³⁷ Ne'ido' makot sampe kanyang. Lalu, ne'ido' ngicokng siso' tatakotn-tatakotn, ado tujuh karanjang panuh. ³⁸ Ne'ido' nang makotn ado ampat ribu urokng angaki, ino'tamasuk ambini ba kamudo'. ³⁹ Ako' nyuruh urokng rami koo puokng, Yesus taamo' ka parahu lalu ampus ka daeroh Magadan.