¹ HERODES NANGAR BARITO TANTANG YESUS Pado waktu koo, Herodes, rajo wilayoh, nangar barito-barito tantang Yesus. ² Lalu, io bakato ka ambo-amboe, "Nyianlah Yohanes pambaptis. Io dah bangkit ampat ka antaro urokng mati lalu karamo koolah mujisat-mujisat nyian bakarajo ka doopme." PARISTIWO KAMATIOTN YOHANES PAMBAPTIS ³ Sabab, Herodes dah nangkap Yohanes, ngikat io, lalu namaan io ka pinjaro karamo Herodias, bini Filipus, kamaru' Herodes. ⁴ Karamo Yohanes suoh bakato ka io, "Ino' dibanarotn kau ngicokngo' Herodias." ⁵ Lalu, biarpun Herodes mao' munuho' Yohanes, gai' ka urokng rami karamo ne'ido' nganggap Yohanes angayo nabi. ⁶ Tapi, waktu ari ulang tahutn Herodes, anak bini Herodias bajoget ka adapotn ne'ido', Herodes karepootn, ⁷ lalu io basumpoh mareo' ameo sajo' nang di minto ambini koo. ⁸ Ako, inu'e nasak andaro koo bakato, "Bare'ot ka aku sio, kapalo YohanesPembaptis ka atas talam." ⁹ Kalopun rajo susoh, tapi karamo sumpahe ba karamo urokng-urokng nang makotn baragee', io pun matentohotn supayo hal koo di bareotn. ¹⁰ Io nyuruh natak kapalo Yohanes ka pinjaro. ¹¹ Lalu, kapalo Yohanes dipuangan ka atas talam, di bareotn ka andaro koo lalu io bareotn ka inu'e. ¹² Ako' koo, murid-murulid Yohanes atokng, ngicokng tubuhe, lalu nyubur io. Lalu, ne'ido'ampus mataki Yesus. LIMO ROTI BA DUO EKO' IKOTN SA' LIMA RIBU UROKNG ¹³ Waktu Yesus nangar hal nyian, Io muokng ampat ka naun make parahu, katampat nang sunyi Io sorokng. Lalu, waktu urokng-urokng nangar nyian, ne'ido' nunootn Io bajootn poho ampat ka koto-koto. ¹⁴ Waktu Yesus kauar, Io nanang karumunan urokng rami, lalu babalas kasihotn nyamuhotn sakit ne'ido'. ¹⁵ Waktu ari dah ampir maam, para murid atokng ka Yesus lalu ba kato, "Tampat nyian sunyi' ari pun dah ampir maam. Suruhlah urokng nang rami koo ampus ka kampokng-kampokng mali mangkanan sa'diri'e sorokng." ¹⁶ Tapi, Yesusba kato ka ne'ido', "Ne'ido' ino' paralu ampus. Kau, bare'lah ne'ido' mangkanan." ¹⁷ Ne'ido' ba kato ka Io, "Disio diri ini' ba dameo-dameo, kacoali 5 roti ba 2 ikotn." ¹⁸ Lalu ,Io ba kato, "Icokng koo kasio, ka Aku." ¹⁹ Ako' koo, Io nyuruh urokng nang rami koo duduk ka rumput, lalu Io 5 ete' roti ba 2 eko' ikotn, lalu sambil nanang ka angit,Io ngucapotn syukur lalu macoh-macohotn roti koo. Ako' koo, Io io mareatni' ka murid murid-E lalu murid- murid-E ka urokng manyak. ²⁰ Lalu, ne'ido' samuo makotn nganyangi'. Lalu, ne'ido' ngicokng siso' tatakotn- tatakotn roti koo, ado dua balas karanjang baisi'. ²¹ Lalu, ne'ido' nang makotn kiro- kiro adi 5.000 angaki, nape masok ambini ba kamudo' . YESUS BAJOOTN KA ATAS AI' ²² Yesus makso murid-murid-E taamo' ka parahu ampus doho' ngadohoi'Io ka subarang, samantaro Io nyuruh urokng nang rami koo puokng. ²³ Lalu, ako' Yesus nyuruh urokng nang rami koo puokng, Io naik ka atas bukit Io sorokng lalu badoa. Waktu dah atokng maam, Io sorokng di naun. ²⁴ Tapi, parahu koo dah jauh ampat ka darat, bagoe'-goe' kano galombang karamo balawanan ba aroh angin. ²⁵ Lalu, pas jam ka ampat maam koo, Io atokng ka ne'ido', bajootn ka atas ai'. ²⁶ waktu para murid nanang Io bajoot ka atas ai', ne'ido' ba gai'atni' lalu ba kampakotn, "Antu kodeh!" Lalu, ne'ido' ba kampakotn ka gai'anan. ²⁷ Tapi Yesus langsung ba kato ka ne'ido', Jare,"Koatotnlah atingu! Nyian Aku, ame gai'." ²⁸ Lalu, Petrus bakato ka Io, "Tuhan, kalo koo Kau, suruhlah aku atokng ka Kau ka atas ai'." ²⁹ Yesus ba kato, "Atoknglah!" Lalu, Peyrus kauar ampat ka parahu, lalu bajootn ka atas ai', atokng ka Yesus. ³⁰ Tapi, waktu nanang angin, io ka gai'anan lalu mulai tingoopm. Io ngampak, "Tuhan, salamatotn aku!" ³¹ Yesus langsung nyoo'otn kokot-E nangkapi' Petrus, sambil bakato, " Kau nang kurang iman, ameo kau ragu-ragu?" ³² Waktu ne'ido' taamo' ka parahu, anginpun baranti. ³³ Ako'koo, ne'ido' nang ado ka parahu nyamboh Yesus sambil ba kato, "Sasungguhe, Kau nyian Anak Allah!" YESUS NYAMUHOTN UROKNG-UROKNG SAKIT ³⁴ Ako' nyubarang, ne'ido' sampe ka tanoh Genesaret. ³⁵ Waktu urokng-urokng ka tampat koo nganali' Io, ne'ido' matakotn ka saluruh tampat koo lalu nabanan saluruh urokng nang sakit atokng ka Yesus. ³⁶ Ne'ido' nyamboh ka Yesus biar biso nyameh ujukng jubah-E, lalu samuo urokng nang nyameh Io jadi samuh.