¹ PAULUS KA KOTA EFESUS jajilah hal koo, samantaro Apolos ado ka Korintus, Paulus ngalewati daerah padaaman lantas sampe ka Efesus. dinaan, io napati sangape manyak murid. ² Paulus bakato ka ne'ido, "ameolah kau narimo Roh Kudus waktu kau dah jadi urok picayo?" ne'ido nyawab, "bai', ja' kami ano' suoh nangar kade Roh Kudus koo ado." ³ lalu, bakatolah Paulus, "kadoop dameo, ako' koo, kau dimaptis?" ne'ido nyawab, "kadoop babtisot Yohanes." ⁴ bakatolah Paulus, "Yohanes maptis nang baptisot nuju marago nang banar, nyambir mataki urok-urok onto' picayo ka seko urok nang atoko sanape io, Iolah Yesus. ⁵ waktu ne'ido nangar hal koo, ne'ido dimaptis kadoop damo Tuhan Yesus. ⁶ ako koo, pas Paulus dah nadohot kokote ka atas ne'ido, Roh Kudus atok ka atas ne'ido, lalu ne'ido mulai' bakato bamacam bahasa lantas bamimpi. ⁷ ne'ido samuee bajumloh kiro-kiro dua balas urok aki-aki. ⁸ makae, Paulus taomo ka sinagoge lantas salamo tiga buat io jaji barani bakato, sambil batukar pandapat dan ngayakinan ne'ido ba hal karajaan Allah. ⁹ tapi jakotai, waktu manyak urok ngarasot atie dan anok picayo, sambil ngatoot hal-hal nang anok gagas tentang marago koo diadapot manyak urok, Paulus ningoot ne'ido lantas mabo samuee murid ampus, sambil batukar pandapat tiap ari ka sikoloh Tiranus. ¹⁰ hal koo balansung salamo dua tahut jaji samuee urok nang diop ka Asia nangar firman Tuhan, baek urok-urok yahudi maokpun urok-urok Yunani. ANAK-ANAK SKEWA ¹¹ Allah ngamuat manyak mujizat nang luar biaso ngalalui kokot Paulus, ¹² make saput kokot ato saput nang nyantuh koet Paulus dinabanan ka urok-urok sakit, makae panyakit ne'ido ilang lantas roh-roh antu kauar ampat ka ne'ido. ¹³ tapi, manyak pamuruh antu Yahudi nang bajoot bakuleleng barusoho nyabut damo Tuhan Yesus atas urok-urok nang karasukot roh-roh antu sambil bakato, "aku nyabaki kau doop damo Yesus nang Paulus madohot!" ¹⁴ tujuh anak angaki-angaki Skewa, saloh seko urok imam ayo Yahudi, nang ngarajaan io. ¹⁵ tapi koo ihan, roh antu koo nyawab lantas bakato ka ne'ido, "aku kanal Yesus dan aku nahui Paulus, tapi siape kau?" ¹⁶ lalu, urok nang karasukot roh antu koo malompat ka arah ne'ido, lantas bakuaso atas ne'ido, tarus ngalohot ne'ido samuae lantas ne'ido badariati ampat ka rumoh koo doop kaadaan batianyok dan uko'. ¹⁷ hal nyian dinahui samuae urok Efesus, baek urok-urok Yahudi maokpun urok-urok Yunani. lantas ne'ido samuae jaji kagaianan dan damo Tuhan Yesus mangkin diningiot. ¹⁸ manyak ka antaro ne'ido nang dah jaji picayo tatap atok, sambil ngakui lantas madohot kalakuan-kalakuan ne'ido. ¹⁹ lalu, manyak ampat ka ne'ido nang ado ngarajaan seher, ngumpulot buku-buku ne'ido lantas dinunu ka depan samuae urok. lantas, ne'ido ngitung rago buku-buku koo lantas namuan ragae sampe 50.000 kapik perak. ²⁰ jaji, firman Tuhan tarus batumbuh dan bakuaso. PAULUS NGARENCANAKAN PAJAANANE ²¹ dah ako hal-hal koo, doop roh, Paulus bamaksud ampus ka Yerusalem pas io ako ngalewati Makedonia nang Akhaya, lalu bakato, "pas aou ado dinaan, aku ugo harus nanang Roma." ²² pas ako nyuruh dua urok nang ngalayani ka Makedonia, io koo Timotius nang Erastus, io sandiri diop sangape lamo ka Asia. DEMETRIUS NIMBULOT KARUSUHAN KA KOTA EFESUS ²³ salamo koo, kanaan jaji karusuhan nang enek nujuo marago koo. ²⁴ sabab, ado urok badamo Demetrius, urok pangarajaan perak, nang ngamuat patong-patong perak Dewi Artemis. mare asil nang ano' sadeket onto' tukang-tukangnge. ²⁵ samuae tukang koo io ngumpulot barage nang pangekut-pangekute ka bidang sarupo lantas bakato, "kamaru-kamaru, kau nahui kade kamakmurot diri ba asal ampat ka parusahaan nyian. ²⁶ lalu, kau nanang lantas nangar kade, buke ajo ka Efesus malainkan ampir kasaluruh Asia, Paulus dah ngayakinan lantas ngamuat manyak urok bapaling nang ngatoot kade allah nang dimenjawat pake kokot manusio buke Allah. ²⁷ hal angkoo babahayo buke ajo kade usoho diri janto kadoop hinaan, tapi ugo patong Dewi Artemis nang agung koo ano' sadeket pun diparetongan, lantas io, nang dinyamboh ka saluruh Asia dan dunio, pasti kailangan kaagungane. ²⁸ waktu ne'ido nangar hal nyian, ne'ido jaji mangkin bero lantas bakampak-kampakot, "ayo'lah Artemis, dewi urok Efesus" ²⁹ lalu, kota koo diisii nang karusuhan lantas ne'ido bakamas sabayo-bayo ka gedung kesenian sambil narekot Gayus nang Aristarkhus, urok Makedonia nang koolah ayuk sapajaanan Paulus. ³⁰ tapi, Paulus maok ampus taamo' ka antaro urok rami koo, samuae murid ano' miarot io. ³¹ make nyoo, sangape manyak pamimpin Asia barayuk nang io ngereman sabuoh pasot ka io lantas baulang kali mohon ka io supayo ano' nyarohot dirie ka gedong kesenian koo. ³² makae, saparo ngampakot sasuatu lantas saparo nang laene, karamo kumpulan koo ado doop karusuhan lantas saparoh ayo' ampat ne'ido ano' nahui ameo alasane ne'ido dah atok bakumpul. ³³ saparo ampat ka urok manyak koo nyimpulot Aleksander karamo urok-urok Yahudi nang dah nyorong io ka depan, lantas ako Aleksander mare tando nang kokote, io bamaksud onto' mela io kaadapot urok rami. ³⁴ tapi, waktu ne'ido nganal kade Aleksander koolah urok Yahudi, kiro-kiro salamo dua jam, ne'ido samuae ngampak nang sete suaro, "ayo'lah Artemis, dewi urok Efesus!" ³⁵ ako seketaris kota nenangkan urok rami koo, io bakato, "hai-hai urok-urok Efesus, siape urok nang ano' nahui kade kota Efesus koolah panyago payong Dewi Artemis nang agung lantas nang turut ampat ka angit? ³⁶ jaji, karamo hal-hal koo ano' biso dibantoh, kau haruse tatap tenang lantas ano' batindak caroboh. ³⁷ ke nyoo, kau dah nabanan urok-urok nyian kasio. nang ano' nagarampok patong ato mitnah dewi diri. ³⁸ kamaro nyo jakoo, kade Demetrius lantas tukang-tukang nang sabayo-bayo nang io ado kaluhan ka urok lain, sidang dimuko lantas ado ba pejabat. biar bo ne'ido nutut nang seko ba nang laine. ³⁹ jaiyo, kade kau maok ba hal nang laen, hal koo biso diakoot doop sidang rakyat manurut ukuman. ⁴⁰ ke nyoo, diri ado doop bahayo onto' dinuduh atas karusuhot ari nyain karamo ano' ado alasan ameopun nang biso diri jelasot tentang parukuman nang ano' aman nyian." ⁴¹ dah ako' io ngatoot hal-hal nyian, io mubarot kumpulot urok koo.