¹ Paulus atok ugo ka Derbe ba Listra. Tan- ang'lah ado seko urokng murit ka'koo, nama'e Timotius, anak ampat ka seko urokng ambini Yahudi nang udoh picayo, tapi bapa'E urokng Yunani. ² Io di nganal baik kamaru-kamaru nang ado ka Listra ba Ikonium. ³ Paulus ma'o Timotius ampus barage diri'E, lantas io ma'o mabo ba nyuna'to karamo io urokng Yahudi nang diop ka daeroh ang'koo. Karamo,ne'ido sauma'e nahui bapa'E urokng Yunani. ⁴ Samintaro ne'ido bajo'ot ngalewati koto-koto, ne'ido madohot pituoh-pituoh bagi urokng-urokng picay'o supayo patuh, nang udoh di mutusot Para Rasul ba Penatua nang ado ka Yerusalem. ⁵ Lantas,samua'e jemaat di kuo'tot ka doop iman ba jumbaloh ne'ido ba'tamboh sa'tiap ari. ALLAH NYARU PAULUS KA MAKEDONIA ⁶ Tarus, ne'ido ampus ngalewati wilayoh Frigia ba Galatia karamo kano ipo Roh Kudus ma'o nyampeato firman ka Asia. ⁷ Pado saat ne'ido garamus ka Misia, ne'ido barusoho ampuso ka Bitinia,tapi Roh Yesus ano gijinan ne'ido. ⁸ Lalu, dah ako gaintasi Misia, ne'ido turut ka Troas. ⁹ Ado penampakan muok ka Paulus pado waktu ari maam. Seko urokng nang ampat ka Makedonia takahan badiri tarus minto ka'iyo, kata'e, "Atok'lah ka Makedonia tarus bantu'boh kami." ¹⁰ Dah ako Paulus nanang penampakan ang'koo, kami baru'soho langsung barangkat ka Makedonia, dah ako nyimpulot Allah udoh nyaru kami supayo ngabarot Injil ka ne'ido. PANYASALOT LIDIA ¹¹ Kareno ko'o, dah udoh balayar ampat ka Troas, diri ngantas balayar ka Samotrake, ba ari salanjute ka Neapolis, ¹² ba ampat ka ka'koo ngantas ka Filipi, koto utamo ka wilayoh Makedonia ba saloh sege koto jajohot Roma. Diri diop ka koto ang'koo labih dari saari . ¹³ Lantas, ari minggu, diri ampus ka'uas pagar koto nang notok sisi batangan, tampat ka mae diri bapikir ka'koo ado tampat badoa. Tarus, kami duduk ba sambil galakar banang bini nang cakahan bako'mo. ¹⁴ Seko urok ambini ba namo Lidia, ampat ka koto Tiatira, nang pakaraja'ane panyu'o saput ungu nang nyamboh Allah . Tuhan muko ati'e supayo mara'tiot ameo nang Paulus gatoot. ¹⁵ Ba, ako Lidia ba samua'e urokng nang diop karumahe di baptis, io minto ka kami, kata'e, "kira'e kade kau ba'angapan aku picayo teguh ka Tuhan, atoklah ka rumahku ba dioplah ka'naan." Lalu, io nasak kami. PAULUS BA SILAS DI MINJARO ¹⁶ Samintaro, kami cakahan ampus ka tampat basampok,seko urokng budak ambini, nang ado Roh nang biso garamal namui kami. Io nabanan manyak kauntungan ka majikan'e ngalalu ramalan-ramalan'e. ¹⁷ Nambini ang'koo nunaan Paulus ba kami sambil ngampak, "urokng-urokng anyian hambo -hambo Allah nang maha tinggi, nang mataki marago kasalamatot ka kito!" ¹⁸ Io tarus ngalakuot'nyo salamo ba ari-ari. Paulus, bero sidi, babalik lantas bakato ka roh ang'koo, "Aku marintohot kau kadoop namo Kristus Yesus supayo kauwar ampat katubuhe!" Tarus, roh ko'o pun kauwar, saat ang'koo ugo. ¹⁹ Tapi, pado saat majikane nanang udoh an'o ado agi arapan ne'ido namu'oo ka untungan nang udoh ilang, ne'ido nangkap Paulus ba Silas, sarato nyeret ne'ido ka tampat umum ka hadapot samua'e penguaso. ²⁰ Ba, saat ne'ido udoh nabanan Paulus ba Silas ka hakim-hakim kapalo , ne'ido ba kato, "Urokng-urokng anyian urokng-urokng Yahudi nang cakahan ngaco ka koto diri. ²¹ Ne'ido ngajarot adat istiadat nang an'o banar supayo di tarimo ba diri laku'oot sebagai urokng Roma." ²² Urokng manyak ang'koo umpat sabayo-sabayo nyarang Paulus ba Silas lantas hakim koto ngarantak baju Paulus ba Silas, tarus marintohot ne'ido untuk mao'wi kadua'e pake tungkat. ²³ Dah ako nganiayo Paulus ba Silas ba manyak pangkongan, ne'ido muang io ka doop pinjaro ba marintohot ka kapalo pinjaro supayo nyago Paulus ba Silas nang katat. ²⁴ Dah ako narimo parintoh ang'koo, kapalo pinjaro namaan Paulus ba Silas ka pinjaro bagian doop tarus masok poho ba ngikat ne'ido. ²⁵ Kiro-kiro tangoh maam, Paulus ba Silas cakahan basampok sambil genyahan lagu-lagu pujian bagi Allah, ba tahanan laine pun nangarot ne'ido. ²⁶ Lantas, tibo-tibo tajadi gempo bumi nang ayo nyabapoot fondasi pinjaro ang'koo ta guncok. Ba, tibo-tibo samua'e pintu tabuko ba pangikat tiap urokng talapas. ²⁷ Saat kapalo pinjaro umpat ba nanang pintu-pintu pinjaro udoh tabuko, io ma'but mando'e ba ampir munuh'o diri'E sandiri kareno io ngiro samuae sandra udoh badariati. ²⁸ Lantas, Paulus ngampak nyarek baayo-ayo'e "usoh mahayooto diri'nyu sandiri kareno kami samua'e ado kasi'o!" ²⁹ Salanjute, kapalo pinjaro nang'koo minto colop tarus batalamo ta'amo, sambil bagagar, lo sujut ka hadapot Paulus ba Silas. ³⁰ Ako ang'koo, io nabanan ne'ido ka'uwar tarus bakato, "Tuan-tuan, ameo nang harus aku lakuot supayo disalamatot?" ³¹ Lalu, ne'ido nyahut, "Picayolah ka doop Tuhan Yesus ba kau'e tatap di salamatot, kau ba samua'e urokng nang diop ka rumahnyu." ³² Salanjute, Paulus ba Silas gabaroot firman Tuhan ka kapalo pinjaro ba kasamua'e urokng nang ado ka doop rumahe. ³³ Ako ang'koo, io nabanan Paulus ba Silas, ma'am ang'koo ugo, ba nyasoh uko-uko ne'ido, lantas io ba samua'e kaluargae langsungo di baptis. ³⁴ Salanjute, kapalo pinjaro nabanan Paulus ba Silas ka rumahe ba nyiapot makanan. Sabab, io basukur sidi, io ba samua'e urokng nang diop ka rumahe udoh picayo ka Allah. ³⁵ Tapi, pas ari siok atok, hakim-hakim koto ngutus polisi, lalu ba kato, "Bebasot urokng-urokng ang'koo!" ³⁶ Ba, kapalo pinjaro madohot pasot ang'koo ka Paulus, sambil bakato , "Hakim-hakim koto udoh nyuruh supayo kau di bebasot. Kareno ang'koo, kauwarlah kanio tarus barangkatlah kadoop kadamayan!" ³⁷ Tarus, Paulus ba kato ka ne'ido, "urokng-urokng ang'koo udoh maowi kami ka'adapot umum, ano diadili doho, urokng-urokng nang asale penduduk nagari Roma, ba muang kami ugo ka doop pinjaro. Lantas, sidike ne'ido ngauwaroto kami diam-diam? An'o! Biarot ne'ido sandiri atok ba ngauwarot kami." ³⁸ Samua'e polisi ang'koo nyampayot kato-kato ang'koo ka hakim-hakim koto. Ne'ido gai saat ne'ido udoh nangar Paulus ba Silas panduduk asli nagari Roma. ³⁹ Lantas, ne'ido atok ba minto maaf ka Paulus ba Silas. Dah ako ne'ido ngauwarot Paulus ba Silas, ne'ido minto supayo kaduo-kaduo'e ningoot koto ang'koo. ⁴⁰ Tarus, ne'ido kauwar ampat kapinjaro lantas ta'mo ka rumoh Lidia, ne'ido nanang kamaru-kamaru nang saiman, Paulus ba Silas nguatot ati ne'ido, tarus barangkat.