¹ Aku , Paulus, aku sandiri mohon ka kao dengan kalamutot lantas kamurohot Kristus--aku, nang ano' barani waktu baradapot muho nang kao, tapi barani waktu jauh dari kao! ² Aku mohon ka kao supayo waktu aku atok, aku anok parlu jadi barani dengan kayakinan nang dengannya aku maretungan onto' barani ngalawan sangape manyak urok nang nganggap kami idup secaro kainginan. ³ memang kami masih idup doop kainginan, tapi kami anok bajuang sacaro kainginan. ⁴ sebab, sanjato-sanjato baparang kami buke ampat kainginan, malaenkan ampat kakoatot ilahi kaancorot benteng-benteng. ⁵ kami ngaruntuhot pamikirot-pamikirot lantas satiap hal tinggi nang dimangun oleh kaangkuhot manusio onto' nantok panganalot akan Allah. kami nahan segala pikiran lantas naklukot io ka Kristus, ⁶ lantas kami siap ngukum samua nang anok taat waktu kao taat disampurnaot. ⁷ tanang kaameo nang ado ka adapotngu. kalo ado urok nang ngayakini diri'e adalah milik Kristus, biarlah io mikiri agi hal nyian, jakoo sajamae io adalah milik Kristus, kamipon jakowo ugo. ⁸ bahkan, kadepon aku agak balabihot manggaot kuaso, nang Allah mare ka kami onto' mangun kao lantas buke onto' ngancorot kao, aku anok akan malu. ⁹ aku bai katanangan saolah-olah aku akan magaei kao nang surat-suratku. ¹⁰ sebab, ne' udo bakato, "surat-surate memang tagas lantas karas, tapi sacaro kaadoot tubuh, io lamoh lantas pakataatne anok baguno." ¹¹ biarlah urok nang ngayo koo mikiri hal nyian, koolah ameo nang kami ngatoot dengan surat waktu kami anok sabayo-bayo ba kao, sabayo angayo kalakuan waktu kami ba kao. ¹² sebab, kami anok barani onto' ngalompokot ato mandingkan diri' kami dengan samanyak urok nang muji-muji diri'e sandiri. namun, waktu ne' udo ngukur diri'e dengan diri' ne' udo sandiri lantas mandingkan diri'e dengan diri' ne' udo sandiri, ne' udo koo anok lalu nanggapi. ¹³ tapi, kami anok akan bangga atas hal-hal nang ngalewati batas kami, malaenkan manurut batas ampat ka katatapot nang Allah dah magiot ka kami, iyokoo batas onto' nyangkau sampe ka kao ugo. ¹⁴ sebab, kami anok ngalampaui batas kami, saolah-olah kami anok nyangkau sampe ka kao. kamilah nang doho sidi sampe ka kao dengan Injil Kristus. ¹⁵ kami ugo anok bangga ngalewati batas kami dengan bangga atas jerih lelah urok laen, malaenkan dengan pangarapot kade sajamae imanngu batumbuh, wilayah pakarajaan kami ka antaro kao akan semangkin dipaluas agi, ¹⁶ supayo kami biso ngabarot Injil ka wilayah-wilayah ka luar kao, lantas anok bangga atas ameo nang dah di ngakoot ka wilayah pakarajaan urok laen. ¹⁷ sape nang mao bangga, biarlah io bangga kadoop Tuhan." ¹⁸ sebab, buke urok nang muji diri'e sandiri nang tabukti tahan uji, malaenkan urok nang Tuhan puji.