¹ ame nagur angaki-angaki nang lebih tuho make caro karas, tapi ngamuat io angayo bapak lantas amuat angaki-angaki nang lebih mudo angayo kamaru. ² amuat ambini nang lebih tuho angayo uma lantas ambini nang lebih mudo angayo kamaru ambini nang panuh kasucian. MAHAS SAMUAE JANDE ³ hormati jande-jande nang batol-batol jande. ⁴ makae, kade jande ado baranak ato bacucu, ne'udolah nang mulo-mulo harus baajar mare contoh ka samuae doop isi rumahe sandiri. nang caro koo, ne'udo dah malas budi ka urokng tuho ne'udo, nyianlah hal nang Allah sukai. ⁵ sadangkan jande nang batol-batol jande lantas idup sorok, io harus naro arapane ka Allah sambel tarus nyampeot kamaoan lantas ba doa siok maam. ⁶ makae, jande nang idup kahe gak bapoya-poya, io dah mati waloupun io masih idup. ⁷ diparintohot ugo hal-hal nyian ka jemaat supayo ne'udo ano' cacat. ⁸ maka dari koo, kade urokng ano' miharo paranak kaluargae sandiri, kususe kaluarga nang paling samak, bararti io dah ngaoki imane lantas io lebih borok dari pado urokng nang ano' picayo. ⁹ jande nang dimaksut doop daftar kahe ambini nang ba umur paling sadikit anam puluh tahut, jadi bini dari seko aki ¹⁰ lantas dikanal karamo kalakuan-kalakuan baeke iolah nang ngarawat kamuda-kamudae, mare tumpangan, nyasoh poho urokng-urokng kudus, nolong urokng nang kasusohot lantas batekun doop samuae karajaan nang baek. ¹¹ makae, jande-jande nang labih mudo ame dimsokot doop daftar, karamo kade nafsu pangantene ngamuat ne'udo menjauhi kristus, ne'udo pasti maok panganten agi. ¹² hal nyian ngundang ukuman karamo ne'udo dah ngaoki ne'udo nang doho ngamuat sanapee. ¹³ selaen koo, ne'udo mulai terbiaso bamalas-malasan, bakaliling dari sete rumoh ka rumoh nang laen. buke koo sajo, ne'udo ugo nyabuti lantas nyampuri urusan urokng laen, ngatoot hal-hal nang saharuse ano' ne'udo katoot. ¹⁴ jaji, aku maoe jande-jande nang mudo panganten agi, maranakot kamudo, lantas ngurus rumoh tangoe supayo ano' ado kesempatan bagi lawane onto' majahat ne'udo. ¹⁵ karamo, manyak urokng dah bapaleng ngikuti antu. ¹⁶ kade ado seko bambini nang picayo ado bakamaru keluarga nang jande, biarlah ne'udo nang miharo jande-jande koo supayo garejo ano' dibebani, lantas garejo biso nolong jande-jande laen nang batol-batol parlu ditolong. TENTANG PANGURUS GAREJO NANG HAL-HAL LAENE ¹⁷ palayan-palayan yang ngurusi jemaat nang baek layak narimo kahormatot dua kai lipat, tarutama ne'udo nang bakarajo barat doop bakhotbah nang ngajar. ¹⁸ makae, kitab suci bakato, "ame nutup moot sapi nang gi ngiling gadom," lantas "urokng nang bakarajo pantas namu upahe." ¹⁹ ame narimo tuduhan nang dinyantoot ka palayan kacoali ado bukti dari duo ato tiga urokng saksi. ²⁰ ne'udo nang babuat doso harus ditagur kaadapot samuae urokng supayo nang laen gai babuat doso. ²¹ kaadapot Allah, Yesus Kristus, lantas samuae malaekat nang dimilih, aku ngingati kao nang sidi-sidi supayo nuruti patunjuk-patunjuk nyian tanpa ba angapan ato milih kasih. ²² ame talalu anceh maamas kokot ka apepun ato ame maok ngicok bagian doop doso urokng laen. jagolah supayo kao tatap suci. ²³ ame kahe ja nyocok ai putih, tapi pake sadeket anggor onto' parotngu lantas tubuhngu nang sega saket. ²⁴ doso ampat kasebagian urokng jalas sidi ditanang makae biso nuntun ne'udo ka pengadilan. tapi, doso dari sebagian urokng laen baru gari kanio ari. ²⁵ jakoo ugo ado kalakuan baek nang jelas ditanang. tapi kalakuan baek nang ano' ditanang pon, ano' tarus biso disambunyiot.