¹ samuae urokng nang nangong beban kamudo harus ngangap majikane angayo urokng pantas namu kahormatot supayo namo Allah lantas pangajaran diri ano' dipajahat. ² sadangkan samuae kamudo nang majikane iyolah urokng picayo, amelah ngurangi raso hormat ka ne'udo karamo ne'udo iyolah kamaru-kamaru saiman. sebalike, samuae kamudo harus ngalayani majikane nang lebih baek agi karamo nang narimo barakat palayanan iyolah urokng-urokng picayo lantas nang ne'udo kasihi. ajarot nang nasehati hal-hal nyian ka ne'udo. TENTANG AJAROT LAEN NANG CINTA DOET ³ kade ado urokng nang ngajar ajarot laen ano' sasuai nang pakatoot nang banar dari Tuhan diri Kristus Yesus lantas ano' sasuai nang ajaran ketaatane, ⁴ io koolah pangalok lantas ano' ngarati dameo-dameo. io kahe maok dibantoh nang ano' sehat, nang kahe mantohot kato-kato nang justru nimbulot saket ati, kaadaan, mitnah, lantas nyurigai nang jahat, ⁵ nang ugo tarus-tarusan ngamuat pandapat laen ka antaro urokng-urokng nang pikirane nang dah rusak lantas nolak kabanarot, nang ngiro kade kasalahane koolah caro onto' namu kauntungan. ⁶ antoh unang, kesetiaan nang dinyertai raso cokop pasti mare manfaat nang ayo. ⁷ makae, diri ano' nabanan dameo-dameo waktu atok kadunio lantas diri ugo ano' biso nabanan dameo-dameo waktu kauar dari dunio nyian. ⁸ kade dah ado mangkanan nang pakean, diri pasti maraso cokop. ⁹ urokng nang maok jadi kayo janto kadoop cobaan nang jebakan, nang ugo samuae nafsu nang gio lantas babahayo nang ningoopot urokng-urokng kadoop kaancorot lantas cilako. ¹⁰ makae, cinta doet koolah akar dari samuae kajahatot. urokng-urokng nang bagago doet dah sasat dari imane lantas nyikso dirie sandiri nang bamacam dukacita. SANGAPEETE HAL NANG HARUS DIINGATOT ¹¹ tapi, kao angayo manusio dari Allah, jauhotlah diri'ngu dari samuae koo. taap kabanarot, kesetiaan, iman, kasih, katatapot ati, lantas kalamutot. ¹² bajuanglah doop pajuangan iman nang baek lantas mampautlah ka idup nang abadi nang onto'e kao dinyaru waktu kao mareot pengakuan nang baek kaadapot manyak saksi. ¹³ kaadapot Allah nang mare idup atas samuae nang ado lantas kaadapot Yesus Kristus nang mare pengakuan nang baek waktu baadapot nang Pontius Pilatus, aku marintohot kao, ¹⁴ kiraee kao majaanan parintoh nyian nang ano' rusak lantas ano' borok sampe Tuhan diri Yesus Kristus atok ¹⁵ pado waktu nang dinantuot Io, Io akan magariot diri-Nya angayo seko-sekoe panguaso, Rajo atas samuae rajo, lantas Tuan atas samuae Tuan. ¹⁶ Iolah seko-sekoe nang abadi. nang ado doop tarok nang ano' terhampiri, nang ano' seko urokng pun suoh nanang ato biso nanang Io, bagi Io, samuae hormat nang kuaso nang abadi! amin. ¹⁷ samantaro koo, parintohot urokng-urokng kayo jaman kanio supayo ame sombong ato ame baarap kakayoot nang ano' pasti, tapi baaraplah ka Allah, nang nyadiot samuae nang ado onto' diri nikmati. ¹⁸ parintohot ne'udo onto' babuat baek, jaji kayo doop babuat babuat baek, jaji urokng nang muroh ati, lantas maok babagi. ¹⁹ nang jaiyo, ne'udo ngumpulot harta onto' ne'udo sandiri angayo dasar nang baek onto' waktu nang kadepane ne'udo biso bapaut kaidup nang sabanare. ²⁰ Timotius, jagolah ame nang dah dimicayoot ka kao. jauhi bahaso nang duniawi nang bakato samadi ano' nang ugo batantangan secaro saloh dinyabut "kapintarot", ²¹ nang maok ngakui iyo, iman manyak urokng jadi nyempok. anugrah menyertai kao.